1 Samuel 23

Studie

          |

1 ‘Philistina mozy chata Keilah khih adyuh ei ta, sawhri liata sâhzy cha lapa khai ei ta,” tahpa ta Davi cha chho ei ta.

2 Davi chata ABEIPA cha, “Cha Philistina mozy cha ei zâ dyuh aw mâ?” tahpa ta a chhohia ta. ABEIPA chata Davi hnohta, “Philistina mozy cha zâ dyuh la, Keilah khih cha za paboh teh,” tah ta.

3 Davi chyhsa zy chata a hnohta, “Pachâ teh, Zudah râh liata yna chô chhao heta chi pi ta; Keilah khih lâta zupa ta Philistina pheisaihzy a zâ dyuh awpa cha chi a chhih pachai aw dia!” tah ei ta.

4 Davi ta ABEIPA cha a chhohia heih ta, ABEIPA chata a chhy ta, a hnohta, “Thyu la, Keilah khih lâta zu teh, Philistina mozy cha na ku liata ei pie aw na,” tah ta.

5 Davi nata a chyhsa zy cha Keilah khih lâta zu ei ta, Philistina mozy cha a zâ dyuh ei ta, ama sahroh zy cha chhu ei ta, thata thie ei ta. Cha hawhna chata Davi ta Keilah khih liata chyhsa zy cha pabohsa haw ta. Ahimele sawchapawpa Abiatha Keilah khih lâta Davi lâta â râ nona khata ephod cheipa ta a zupa châ ta.

7 Keilah khih lâta Davi cha a sie tahpa Sawla chho ei ta. Sawla chata, “Khazohpa ta ei ku liata a pie haw chu; kuh chhikao nata ahraina a hneipa khih lâna chata a ngiapa ta a khô haw tlôh ta,” tah ta.

8 Sawla chata chyhsa zydua adyuh awpa ta Keilah khih a zâ dyuhpa ta, Davi nata a chyhsa zy za dô awpa ta aw pakhy ta.

9 Davi chata Sawla ta a chô liata hmo pha leipa a pachâ tahpa vaw pahno ta; theihthaipa Abiatha hnohna chata, “Ephod kha vaw cheih tua,” tah ta.

10 Davi chata, “Hy ABEIPA Izarelzy Khazohpa y, na chakaotuhpa heta Sawla ta keima vâta khih cha parao awpa ta Keilah khih lâna chata a zu a chhuah tahpa pahno na ta.

11 Keilah khih liata chyhsa zy heta a ku liata maniah ama pie aw ma? Na chakaotuhpa ta ei vaw pahnopa hawhna chata Sawla a zu aw ma? Hy ABEIPA, Izarel Khazohpa y, ngiachhiepa ta na chakaotuhpa he na chho mah y,” tah ta. ABEIPA chata, “A zu aw,” tah ta.

12 Davi chata, “Keilah khih liata chyhsa zy chata keima nata ei chyhsa zy he Sawla ku liata maniah ama pi aw ma?” tah ta. ABEIPA chata, “Ama cha pie aw,” tah ta.

13 Davi nata a chyhsa zy za charu lai cha thyu ei ta, Keilah khih tawhtapa cha pua ei ta, siena rypaohpa lâ maihta sie ei ta. Davi cha Keilah khih tawhtapa a râ haw tahpa Sawla chho ei ta, chatanachata pua hnaopa pathlei haw ta.

14 Davi cha râhpathohpa liata kuhzy liata y ta, Zipha râhpathohpa tlâh râh liata y thlâh ha ta. Sawla chata ano cha noh chareih tlua ta, châhrasala Khazohpa ta a ku liata pie leipa ta.

15 Davi chata ano thie a chhuahpa ta Sawla cha a pua tahpa thei ta, chatanachata Davi cha Zipha râhpathohpa lyurâh pa liata y ta.

16 Sawla sawchapawpa Zawnatha cha thyu ta, lyurâhpa lâ Davi lâna chata sie ta. Khazohpa liata a ku tha patlô pa ta.

17 A hnohta, “Chi cheita khâ; ei pâ Sawla ku chata cha hmô aw vei; Izarel zy abei ta y aw chi ta, kei cha pazituhpa ei châ aw; cha chhao cha ei paw Sawla heta a pahno thlâh ha na,” tah ta.

18 Ama pano ta ABEIPA hmiakô liata bie hraih ei ta; Davi cha Hôresa liata y thlâh ha ta, Zawnatha cha a o lâta a di haw ta.

19 Zipha mozy cha Kibia liata Sawla lâta khy ei ta, “Davi cha eima hnohta lyurâhpa liata kuh liata râhpathohpa chho lâchhâh Hakhila tlâh liata a nyu thlâh ha vei ma.

20 Chavâta hy beipa y, na pathipalôh ta a zu a khohpa hawhna tlai chata a zu la; keimo eima vaw tao hra awpa cha beipa ku liata ano hlâpa cha a châ aw,” tah ei ta.

21 Sawla chata, “ABEIPA chata byhnâ cha pie ei se; nâmo ta cha eina ngiachhie ngaita eichi.

22 Sie ula, kei pasia via heih ula; a hniehnôh chathô ula, cha liata a hmôtuhpa chhao kei pasia heih tua teh u; so ngaitapa ta hmo a tao tyh tahpa chyhsa ta eina chho ei.

23 Chavâta a nyuna su zydua liahsa pahno khai ula, chatawhcha kei lâta a vy heih tlai ula, nama hnohta ei vaw sie hra aw; he râh liata a y tlai khiahtala Zudah chyhsa sâh hluhpi hry liatahpa cha tluapa ta ei hmô aw,” tah ta.

24 Chatawhcha thyu ei ta, Sawla sie hlâta Zipha lâna chata sie haw ei ta. Davi nata a chyhsa zy cha râhpathohpa chho lâ Arabah liata Maôn râhpathohpa liana chata y ei ta.

25 Sawla nata a chyhsa zy cha ano tlua awpa ta sie ei ta. Davi chho ei ta, chatanachata lôpanô pangaipa ta pua ta, Maôn râhpathohpa liana chata y ta. Cha cha Sawla ta a thei nata Maôn râhpathohpa lâna chata Davi a chadai ta.

26 Sawla cha tlâh hiakha lâchhâh ta sie ta, Davi nata a chyhsa zy cha tlâh hiakha lâchhâh ta sie ei ta; Davi cha Sawla riahchi ta a parah ngaitapa ta a râ ta, Sawla nata a chyhsa zy hra chata Davi nata a chyhsa zy cha patu a chhuahpa ta dôh tlôh ei ta.

27 Sawla lâna chata, “A parah la, a vy teh; Philistina mozy chata eima râh ama vaw siehnao,” tahpa ta zikyurâpa vaw tlô ta.

28 Sawla chata Davi a chadaipa cha kuasai ta, Philistina mozy adyuh awpa ta si haw ta; chavâta cha su cha Alôpanô Khôkhana bi ei ta.

29 Davi cha cha tawhtapa cha khy ta, Engedi kuh liana chata y ta.