1 Samuel 25

Study

          |

1 Samuel cha thi haw ta; Izarel chyhsa zydua cha a aw pakhy ei ta, chahkhei ei ta, Ramah khih liata ano o liana cha pabu haw ei ta. Davi cha thyu ta, Paran râhpathohpa lâta zu ta.

2 Maôn khih liana chata chyhsa pakha y ta, a khih sana cha Kamel liata a châ. Chyhsa hneirôh ngaitapa châ ta; mietahkupa sâh thôh nata mie sâh kha hnei ta.

3 Cha chyhsa moh cha Naba châ ta, a lahpinô moh cha Abikai châ ta, cha chanô cha so ngaitapa, hmi pha ngaitapa châ ta, a chapawpa deikua cha nôchhie ngaitapa nata molei ngaitapa a châ; Kaleba pathla a châ.

4 Davi ta râhpathohpa tawhna chata Naba ta a mietahkupa hmi a ngyu tahpa vaw thei ta.

5 Davi chata satlia pahrawh tuah ta; satlia zy hnohta Davi ta, “Kamel lâna chata khy ula, Naba lâta sie ula, ei moh ta a kaw naoh muh vy.

6 Chyhsa hneirôh ngaitapa hnohna chata he tana heta reih teh u, “Na chô liata na chhôhkha zy chô liata thlalôhna y mawh sy, na hneipa zydua chô liata zy thlalôhna y mawh sy.

7 Na mietahkupa hmi a ngyutuhpa zy ama y tahpa vaw thei na ta; na mietahkupa a vaihtuhpa zy cha ei hnohta y tyh ei ta, kheihtama tah leipa pi ta, Kamel Tlâh liata ama y chhôh ta ama khâpahmah pahlei veih ei.

8 Na satlia zy hiahri la, ama cha chho aw. Chatanachata satliazy he vaw ngiachhie mah y; a rypaoh ngaitana noh liata ama vaw tlô hih. Na hneipa hawhpa maih cha na chakaotuhpa zy nata na sawchapawpa Davi he vaw pie mah y,’ a tah na, kei tah teh u,” tah ta.

9 Davi satlia zy cha ama kei tlô nahta, Davi mohta cha bie zydua cha Naba hnohta reih ei ta; a chalihsai haw ei ta.

10 Naba chata Davi chakaotuhpa zy cha a chhy ta, “Davi cha ahyma a châ tly? Zese sawchapawpa cha ahyma a châ tly? Tahmâ hlâta sei a hluhpi ama zibeipa zy a râsai a hmahpa hluh kaw ei ta.

11 Ei viahchhâ zy, ei ti zy nata ei mietahkupa hmi ngyutuhpa zy chata ei sâh thiehpa cha ahyzy ma ama châ tahpa chhao ei pahno leipa zy he zua ei pie aw mâ?” tah ta.

12 Davi satlia zy cha a lie ei ta, kua haw ei ta, cha bie zydua cha vaw chho ei ta.

13 Davi chata a chyhsa zy hnohta, “Nama zaozi a vao chyu teh u,” tah ta. Chatawhcha ama zaozi a vao chyu ei ta; Davi chhaota a zaozi a vao ta; chyhsa za palih tlai ta Davi cha kaw zi ei ta. Chyhsa za no cha hmodâh a vaipa ta y ei ta.

14 Satlia pakha chata Naba lahpinô Abikai hnohta “Pachâ teh, Davi chata râhpathohpa tawhta eima zibeipa a naoh awpa ta chyhsa vaw tuah ta; ano chata vaw ra ta.

15 Châhrasala cha chyhsa zy cha eima chô liata pha kaw ei ta, kheihta hmah maniah tah leipa ei ta, sibiepa su liata eima y nota hmaohkha ta eima y chhôh zydua khata khâpa hmah paphlei leipa pi ta.

16 mietahku vaihpa ta ama hnohta eima y chhôh zydua ta chhô nata zâ eima châta thokhy châ ei ta.

17 Chavâta khâpa na tao aw pakhâta ta pachâ tua; eima zibeipa chô liata nata a chhôhkhapa zydua chô liana heta hmo pha leipa tao a chhuahpa ama y, ano hra he pathi chhie ngaita ta, ahyhmah ta bie a chho thei leipa châ tlôh ta,” tahpa ta reih ta.

18 Abikai chata a parah ngaitapa ta viahchhâ tlâ za no, kresawti ôh no, mietahkupa pô pangawh pasyu awpa ta amâ chiehpa, sâh raopa panuana sâpangaw, kre thei pachawhpa sao za kha, theiku tlâ za no chhaota la ta, alâ paphaosa ta.

19 A chakaotuhpa satlia zy hnohna chata, “Ei hmiakô liata sie lymâ ula; ei cha vaw pazi aw ei,” tah ta. Châhrasala a vahpa Naba cha chho vei.

20 Alâ chô liana chata kiah ta, saikah liata a chô nota, Davi nata a chyhsa zy chata vaw pangai ei ta; chatanachata a tyh haw ei ta.

21 Davi chata, “A khâpahmah ta a pahlei lei nawpa ta râhpathohpa liata he chyhsa hneipa zydua he a saipa ta ei vaipa a châ he zaw; hmo phapa cha hmo pha leipa ta viari na thô tlôh ta.

22 Mylâ my khih pavâhna taihta ano eih zydua hryta chapaw hawti pakha deita chhao ei pahlôh tlai khiahtala, Khazohpa ta Davi khakhaipa zy cha ano tao ta tao mawh sy, cha hlâta a tha via chhaota tao mawh sy,” tah ta.

23 Abikai chata a hmô nahta a alâ tawhtapa cha chô parah ta, Davi hmiakô liata a hmia alei lâ a khupa ta a naoh ta.

24 A phei thaby liata a khu lâta pao ta, “Keima ta ei zibeipa y, keima tlaita hmoparaona cha ei to aw; châ chakaotuh nô heta na nah theina liata bie reih sala, na chakaotuhnô bie reipa cha ngiachhiepa ta nahthliepa mah y.

25 Ei zibeipa y, pathi chhiepa chyhsa Naba cha khâpahmah pachâ khâ; a moh hawhna tlai he châ ta, Naba tahna la lyu ta, a hru ha hih; kei na chakaotuh nô he la, ei zibeipa satliapa vaw tuapa zy cha vaw hmô va na.

26 Chavâta atahmâ he ei zibeipa y, ABEIPA hrona nata na hrona reipa ta ei reih, ABEIPA ta thisaih palo lei awpa nata na ku ta phuh la leipa awpa ta cha tao tlôh ta, na khakhaipa zy nata ei zibeipa pha leina taopa a tluatuhpa zy cha Naba hawhta châ mawh sy.

27 Ei zibeipa chata na chakaotuhpa ta hmosaipiepa cheipa he ei zibeipa a vaw zituhpa satlia zy he piepa châ mawh sy.

28 Na chakaotuh nô moleina he ngiachhiepa ta a ngiahthai mah y; ABEIPA chata ei zibeipa chhôhkha â i ngaitapa ta padua tlai aw ta, ei zibeipa cha ABEIPA adyuhna zy adyuhpa châ tlôh ta; na hro chhôh zydua ta nâma liata moleina rai hmô awpa y aw vei.

29 Nâma a chadai awpa nata na hrona pahlei awpa ta chyhsa zy vaw thyu hra ei sala, ei zibeipa hrona cha ABEIPA na Khazohpa nata hrona a hlaopa hry liata a hlaopa châ aw ta; na khakhaipa zy hrona deikua cha alô vawna ta vawpa hawhta a lei aw.

30 ABEIPA ta nâma kyh liata a hmo phapa taihpa zydua hawhta ei zibeipa chô liata a tao tita, Izarel zy abei ta a cha tao tita.

31 a chhâpa y leipa ta thisaih palo leipa ta ei zibeipa chata phuh na la hra leipa he, na châta pachârôhna sai châ leipa aw ta, ei zibeipa chata palôh châ leina rai châ hra aw vei. ABEIPA ta ei zibeipa chô liata hmo phapa a tao tina chata na chakaotuh nô he a thei thlâh ha mah y,” tah ta.

32 Davi chata Abikai hnohta, “Atanoh na vaw dy awpa ta cha tuahtuhpa ABEIPA, Izarel zy Khazohpa cha reithaipa ta y mawh sy.

33 Na ryhpaona pahnona cha byhnâ aw pata y sala, na thisaih palopa thai lei châna tawhtapa na pabohtuhpa nata keima ta phuh la leipa ta na taotuhpa cha byhnâ aw pata y hra mah y.

34 Nâ chata na vaw dy pato leipa na châ khiahtala, ABEIPA Izarel zy Khazohpa hrona reipa ta ei reih, mylâ khih pavâna taihta Naba cha hawti pakha deita chhao pahlôhpa cheita aw va na,” tah ta.

35 Davi chata a hmo vaw cheipa zy cha la ta; a hnohta, “Thlalôh ngaitapa ta na o lâ a kaw di la; na bie cha zo na ta, na hiapa cha ei châ pyhpa lah y,” tah ta.

36 Abikai cha Naba lâta khy ta; a o liana chata abei kyhchhipa hawhta kyh vaw chhi ta. A pari kawpa vâta Naba cha a thapha kaw ta; chavâta a mylâ khih pavâh hla lei cha khâpahmah chho leipa ta.

37 My ta Naba kresawti paripa cha a vaw thei ta, a lahpinô chata cha biezy cha chho ta, a palôhrupa zoh ha ta, alô hawh tlaita vaw y haw ta.

38 Noh hrawh tawhna chata ABEIPA ta Naba chô liata a ku pathla ta; thi haw ta.

39 Davi ta Naba a thi tahpa a thei nahta, “Ei moh chhie nawpa ta Naba hmotaopa tawhtapa na reikheipa ta a chakaotuhpa cha hmo pha leipa tao leipa ta na pakhâtuhpa ABEIPA cha reithaipa ta y mawh sy; Naba hmo pha leipa taopa cha ABEIPA ta ano chô lia tlaita a patlasa haw,” tah ta. Davi chata Abikai cha a lahpinô châta hiah awpa ta chyhsa tuah ta.

40 Davi chakaotuhpa zy chata Kamel liata Abikai lâta ama tlô nahta, “Davi chata a lahpinô châta eima châ chhi awpa ta maniah a tuah,” tahpa ta ano chho ei ta.

41 Abikai cha thyu ta, â khu lâta paopa ta a naoh ta, “Pachâ teh u, nama chakaotuh nô he, ei zibeipa chakaotuhpa zy phei pasi awpa ta chakaotuhpa ei châ,” tah ta.

42 Abikai chata thlai thyu ta, alâ chô liata kiah ta, a hnôh a zipa laihsa papangawh zy chhaota; Davi chyhsa tuapa zy cha zi ta, a lahpinô ta y haw ta.

43 Davi chata Zezrel liata chyhsa Ahinô vaw hnei haw hra ta; chatanachata a lahpinô ta y rairieh ei ta.

44 Sawla chata a sawchanônô Mikhal, Davi lahpinô kha, Kalima khihpa Laisha sawchapawpa Palti vaw pahneisa haw ta.