6338. ‘Congregamini’: quod significet ut ipsa se ordinent, constat a significatione ‘congregari’ quod sit ordinari; ‘congregari’ enim in spirituali sensu non aliud est, nam vera et bona non possunt congregari nisi etiam ordinentur; universale enim quod procedit a Domino, hoc facit, ¹ quoniam universale illud omnia singularia usque ad singularissima in se continet, haec ² simul sunt universale quod redigit in ordinem omnia in ³ caelis; cum universale hoc agit, apparet sicut bona et vera ipsa se ordinent et sicut fluant sponte in ordinem; ita se habet cum universo caelo, hoc in ordine est et continue in ordine tenetur ab universali influxu a Domino, ita quoque se habet cum societatibus in communi in ⁴ caelo, et quoque cum societatibus in particulari ibi; ut primum enim congregantur angeli seu spiritus, ilico disponuntur in ordinem sicut a se, et sic constituunt societatem caelestem quae est caeli imago; quod nusquam fieret nisi universale quod procedit a Domino, omnium singularissima in se contineret, et nisi omnia haec in ⁵ perfectissimo ordine forent; si ⁶ universale aliquod absque singularibus influeret a Deo, ut plurimi cogitant, et homo seu spiritus, seu angelus semet in singularibus regeret, tunc loco ordinis foret omnium confusio, nec foret caelum, nec infernum, nec genus humanum, immo nec natura: ⁷

[2] hoc illustrari potest a multis apud hominem, ut nisi cogitationes ejus ordinarentur universaliter et simul singulariter ab affectionibus que amoris, nusquam ⁸ potuissent illae rationaliter et analytice fluere; similiter nec actiones; tum nisi anima in universali et singulari influeret in viscera corporis, nihil ordinatum ⁹ et regulare potuisset existere in corpore, at cum ¹⁰ singulariter et sic universaliter, tunc omnia ordinantur sicut a se. Haec dicta sunt ut sciatur quid intelligitur per quod vera et bona seipsa ordinent.

脚注: