5890. ‘Quia ad vivificationem misit me Deus ante vos’: quod significet vitam spiritualem illis ex providentia, constat ex significatione ‘vivificationis’ quod sit vita spiritualis, de qua sequitur; et ex significatione ‘misit me Deus ante vos’ quod significet ex providentia; quod ex providentia, constare potest ex somniis Josephi, quibus praedictum quod se incurvarent ei fratres ejus, ut et pater ejus, quod nisi provisum nec praevisum fuisset. Quod per ‘vivificationem et vivificare’ significetur vita spiritualis, seu vita nova per regenerationem, constare potest ex eo solo quod spirituale Verbi non aliud possit esse; est vita naturalis et est vita spiritualis, vita naturalis intelligitur in Verbi sensu litterae, at spiritualis in sensu interno, et quoque multis in locis per vivificare et per vitam ipsa vita spiritualis intelligitur in sensu litterae; ut apud Ezechielem,

Cum dixero impio, moriendo morieris, nec admonueris illum, nec locutus fueris ad dehortandum impium a via ejus mala ad vivificandum illum, 3:18:

apud eundem,

Profanastis Me apud populum Meum pro pugillis hordeorum et pro frustis panis, ad occidendum animas quae non mori debent, et ad vivificandum animas quae non vivere debent.... Confirmatis manus impii, ut non revertatur a via sua mala vivificando illum, 13:19, 22:

apud Hoscheam,

Jehovah vivificabit nos post biduum, et in die tertio eriget nos, ut vivamus coram Ipso, 6:2:

apud Davidem,

Nisi crederem videre bonum ... in terra vitae, Ps. 27:13:

apud Johannem, Qui vincit, dabo ut comedat de arbore vitae, quae est in medio paradisi Dei, Apoc. 2:7:

apud Johannem Evangelistam, Quemadmodum Pater suscitat mortuos, et vivificat, ita etiam Filius quos vult, vivificat, 5:21:

apud eundem,

Spiritus est qui vivificat, caro non prodest quicquam; quae Ego loquor verba, spiritus sunt et vita sunt, 6:63;

in his locis ‘vivificare et vita’ manifeste pro vita spirituali, quae est vita in caelo, quae quoque simpliciter vita vocatur, ut apud Matthaeum, Angusta ¹ [porta] et stricta via est quae ducit ad vitam, et pauci sunt qui inveniunt illam, 7:14;

et alibi ‘intrare in vitam’ pro in caelum, Matth. 18:8, 9, 19:17, Marcus 9:43, 45, 47, Joh. 5:24.

脚注: