Puasaina 9

¹ ABEIPA ta Mawsi hnohta, “Phirao lâta a kei hnia la, ‘ABEIPA Hebraizy Khazohpa ta, “Ei chyhsazy heta eina chakao thei nawpa ei ta papua teh.

² Na papua pasai leipa ta na pakhâ thlâh ha khiahtala,

³ sibiepa su liata na sahrohzy chô liata ABEIPA ku a y aw, a râ chô liata zy, a lâ chô liata zy, râraoseihpa chô liata zy, viahchao zaw chô liata zy, mietahkupa zaw chô liata zy, potlana thata a vaw charei aw.

⁴ Châhrasala ABEIPA ta Izarel sahlao sahroh nata Izi mozy sahroh cha pnano aw ta, Izarel pathlazy eih cha, miakha hmah thi aw vei,” a tah na,’ tahpa ta chho teh,” tah ta.

⁵ ABEIPA chata, “Mylâ ABEIPA ta he râh liana heta cha hawhpa cha a tao aw na,” tahpa ta daihti rao haw ta.

⁶ ABEIPA chata a mylâ ta cha hawhna cha tao haw ta; chatanachata Izi mozy sahroh zydua thi khai haw ta, châhrasala Izarel pathlazy sahroh deikua cha, pô kha hmah thi vei.

⁷ Phirao chata chyhsa tuah ta, Izarel chyhsazy sahroh cha pô kha hmah thi leipa ta. Châhrasala Phirao pathipalôh cha ku pachhasapa ta y ta, chyhsazy cha papua pasaih leipa ta.

⁸ ABEIPA ta Mawsi nata Arawna hnohta, “Patisana mei liatahpa buchâ kei phâ ula, Phirao mohmô liata Mawsi ta avâ lâ hie mawh sy.

⁹ Izi râh zydua chô liana heta buchâ di ngaitapa ta a vaw lie aw ta, cha chata Izi râh chhôh zydu liatahpa chyhsa nata sa cha kheihluh pathlasa chyu aw ta, a padao aw,” tah ta.

¹⁰ Patisana mei liata buchâ cha la ei ta, Phirao hmiakô liana chata a kei duah ei ta, Mawsi chata avâ lâ hie ta, chatanachata chyhsa to nata sa tota kheihluh padaohpa hnei khai haw ei ta.

¹¹ Chatawhcha kheihluh vâna chata molie a thaipazy chata Mawsi cha pahnie khaoleipa ei ta, molie a thaipazy nata Izi chyhsa zydua chata kheihluh hnei khai tlôh ei ta.

¹² Châhrasala ABEIPA ta Phirao pathiplôh kuh pachhasa ta, ama bie cha nahthlie khoh leipa ta; ABEIPA ta Mawsi hnohta a rei hawpa hawhna khata.

¹³ ABEIPA ta Mawsi hnohta, “Mydi ta thyu la, Phirao hmiakô liata a kei duah la, a hnohta, ‘ABEIPA Hebraizy Khazohpa ta, “Ei chyhsazy ta eina chakao thei nawpa ei ta papua teh.

¹⁴ He daihti liana heta la na chô liata nata na chakaotuhpazy chô liata nata na chyhsazy chô liata ei hriena zydua he ei chareisa aw, chatanachata khizaw zydua liana heta keima hawhtpa rai he ahyhmah y vei ei tahpa na pahno aw.

¹⁵ Chata châ leipa sala ei ku hmah aw nata nâ nata na chyhsazy he hri ta hrie aw na ta, khizaw tawhtapa he ei cha pahleipadia ha awpa ei a châ;

¹⁶ châhraala he vâna heta cha padua na ta, ei hmo tao theina ei cha pamosa awpa nata khizaw zydua liata ei mo a pathâh thei nawpa ta.

¹⁷ Ei chyhsazy hry liana heta a palaipa ta y lymâ chi ta, papua aw va chi mâ?

¹⁸ Pachâ teh, mylâ he daihti liana heta pareih a hluhpi Izi râh a vaw y tua no tawhta atahmâ taih chhaota a tla beih leipa cha, ei patlasa aw.

¹⁹ Chatanachata sibiepa su liata nata sahrohzy nata na hneipa maih cha pasy parasa teh; chyhsa to nata sa to sibiepa su liata a ypa, o liata pasy leipa maih cha, pareih ta daih aw ta ama thi aw,” a tahna,’ tah mah y,” tah ta.

²⁰ Phirao chakaotuhpazy hry liata ABEIPA bie a papeisapa maih chata ama chakaotuhpazy nata ama sahrohzy cha o chhôh liata pangia parah ei ta;

²¹ ABEIPA bie a papeisa leipa maih chata ama chakaotuhpazy nata ama sahrohzy cha sibiepa su liata paysa thlâh ha ha ei ta.

²² ABEIPA chata Mawsi hnohta, “Avâ lâta na ku pazawh teh, Izi râh zydua liana heta, chyhsa chô liata zy, sa chô liata zy, Izi râh chhôh liata lyu liata chicheipa to chô liata zy, pareih a vaw tla nahâh ta,” tah ta.

²³ Mawsi chata a chôhchahrei cha avâ lâta hy ta; chatawhcha ABEIPA chata tôkalôhpa nata pareih za tuah ta, alei liana chata meizy za tla ta. Chatanachata ABEIPA ta Izi râh chô liana chata pareih thata patlasa ta;

²⁴ pareih, mei nata pareih a pahlaopa ru ngaitapa Izi râh zydua liana chata, Izi phopi y rakha tawhta, cha hawhpa rai a y beih leipa cha vaw y haw ta.

²⁵ Pareih chata Izi râh zydua liata, sibiepa su liata a ypa zydua, chyhsazy nata sazy cha daih ta; pareih chata lyu liata chicheipa to cha daih ta, sibiepa su liata tho to cha thlie khai ha ta.

²⁶ Kôse râh, Izarel pathlazy yna liana deita chata pareih tla leipa ta.

²⁷ Chatawhcha Phirao chata Mawsi nata Arawna cha pa-awsa ta ama hnohta, “He daihti liana heta la hmo ei parao haw he; ABEIPA cha a siapa châ ta, kei nata ei chyhsazy he eima molei na.

²⁸ ABEIPA lâta hiah teh u; he tôkalôhpa a thua ngâpazy nata pareihzy he a daih bâ na; chatanachata cha papua aw ei na ta, y khao aw veih ei chi,” tah ta.

²⁹ Mawsi ta a hnohta, “Khi tawhtapa he ei pua pata nahta ABEIPA lâta ei ku pazawh aw na ta; tôkalôhpa pyuzy cha dia aw ta, pareih chhao y khao hra aw vei, chatanachata alei he, ABEIPA eih a châ tahpa na pahno aw.

³⁰ Châhrasala nâ nata na chakaotuhpazy heta la, ABEIPA Khazohpa he chi hlei veih eichi tahpa ei pahno,” tah ta.

³¹ (Pala nata bali sâhzy cha parao ta, bali sâh cha a chhi hai nota châ ta, pala cha a pathei hai nota a châ.

³² Châhrasala uit sâh nata rai sâh cha parao vei, a pyuh mâh leipa vâta.)

³³ Mawsi cha Phirao tawhta nata khih tawhtapa cha pua ta, chatawhcha ABEIPA lâta a ku pazawh ta; chatanachata tôkalôhp a thuapazy nata pareih a tlapa cha a chalih haw ta, alei chô liata vâsua chhao cha suah ngâ khao leipa ta.

³⁴ Châhrasala Phirao ta vâsua nata pareih nata tôkalôhpa a thuapazy cha a bâh haw tahpa a pahno patanahta molei via ha heih ta.

³⁵ Chatanachata ano nata a chakaotuhpazy chhaota ama pathipalôh cha kuh pachhasapa ta y ta, Izarel pathlazy cha papua pasaih khao leipa ta; ABEIPA ta Mawsi hmâpa ta a vaw rei hawpa hawhna khata.