1 Samuel 22

¹ Davi cha cha tawhtapa cha pua ta, Adula lôpu lâna chata a râ ta; chatawhcha a unawhzy nata a paw chhôhkha zydua ta ama thei nata cha lâna chata ano lâta zu ei ta."

² Chipa a hneipa maih zy, leibâh a hneipa zy, palôh châ leina a hneipa maih ano lâna chata ahmaohpakhy ei ta; ama hyutuhpa ta y ta. A hnohta chyhsa za palih lai y haw ei ta.

³ Davi cha cha tawhtapa cha Môaba râh liata Mizpah lâta sie ta; Môaba beipa hnohta, “Khazohpa ta hmo eina taopa awpa ei pahno hlâ lei cha, ei nâ nata ei pâ zy na hnohta vaw y mawh sy,” tah ta.

⁴ Môaba beipa hmiakô lâna chata a a chhi ta, Davi cha kuh liata a y chhôh zydua cha a hnohta y ei ta.

⁵ Hrohsopa Kada chata Davi hnohta, “Kuh liata y ngâthlâh ha khâ; pua la, Zudah râh lâta sie teh,” tah ta. Chatanachata Davi cha pua ta, Hereta thothi lâna chata a ngia ta.

⁶ Sawla chata Davi nata a hnohta a ypa zy cha ama hmô haw tahpa vaw thei ta. Sawla cha Kibia liata Ramah khih liata Tamaris tho ry liata a asei chabapa ta a tyuh ta, chatawhcha a chheipâh liana chata a chakaotuhpa zydua cha a duah ei ta.

⁷ Sawla chata a chheipâh liata a duapa a chakaotuhpa zy hnohta, “Nâmo Benzami mozy saih u, nahthlie teh u; Zese sawchapawpa chata lyuzy nata kresadôzy cha pie chyupa ta, a pheisaih sâh kha hyutuhpa ta zy, a pheisaih za kha hyutuhpa ta zy, a cha tao khai aw ei mâ.

⁸ nama zydua ta kei liata namâ paraoh? Ei sawchapawpa ta Zese sawchapawpa lâta bie â taihpa kei lâta a palâsapa rai y leipa eichi ta, pachâ na rôhkheipa rai y leipa eichi ta, ei sawchapawpa ta ei chakaotuhpa he nâ dyuh awpa nata atanoh nôzy chhaota nâ byh awpa ta a pasyuna kyh kei lâta a palâsapa y veih eichi,” tah ta.

⁹ Sawla chakaotuhpa zy kiapâh liata a duahpa Edôma chyhsa Dôeka chata a chhy ta, “Zese sawchapawpa cha Nôba khih liata Ahitu sawchapawpa Ahimele lâta a vypa hmô na ta.

¹⁰ ano chata ABEIPA a chhohiapa ta, niepa pie ta, Philistina chyhsa Kôliatha zaozi a pie hra,” tah ta.

¹¹ Beipa chata, Ahitu sawchapawpa theihthaipa Ahimele nata a paw chhôhkha Nôba khih liata theihthaipa a ypa zydua cha pa-awsa ta; ama zydua ta beipa lâta amâ vy.

¹² Sawla chata, “Na Ahitu sawchapawpa y, nahthlie teh,” tah ta. Ano chata, “Ei zibeipa y, he liata ei y,” tah ta.

¹³ Sawla ta a hnohta, “Viahchhâ nata zaozi zy vaw piepa ta, ABEIPA lâta a chhohiapa ta, atanoh noh liata a taopa hawhta nâ dyuh awpa nata nâ byh awpa ta khazia e nâma nata Zese sawchapawpa heta namâ paraoh?” tah ta.

¹⁴ Ahimele chata abeipa cha achhy ta, “Abei piahpa, nâ chhohia chai tyhpa, nama chhôhkha liata chyhsa zachhihpa Davi hawhta chyhsa ngâchhihpa he, na chakaotuhpa zydua hry liata ahy e a y.

¹⁵ Atanoh he Khazohpa ei chhohiapa pathao noh ma a châ? Châ vei! Abeipa chata a chakaotuhpa tlyma, ei paw chhôhkha zy rai tlyma maniah bai cheita kha se; na chakaotuhpa heta he kyh zydua he a kheihawhpa hmahta pahno va na,” tah ta.

¹⁶ Beipa chata, “Ahimele y, na thi tlai awpa na a châ, nâ nata na paw chhôhkha zydua chhaota,” tah ta.

¹⁷ Beipa chata a kiapâh liata a duahpa pheisaih zy hnohta, “A heih ula, ABEIPA theihthaipa sahlao he thie teh u; Davi chhâ a châh ei ta, a râ tahpa pahno thlâh hapa ta keima lâta ama reih leipa vâta,” tah ta. Châhrasala abeipa chakaotuhpa zy chata, ABEIPA theihthaipa zy adyuh awpa ta ama ku hy khoh leipa ei ta.

¹⁸ Beipa chata Dôeka hnohta, “Nâ, a heih la, theihthaipa zy cha adyuh teh,” tah ta. Edôma chyhsa Dôeka cha a heih ta, theihthaipa zy cha adyuh ta, cha noh liana chata poh rih dipa ephod a kypa chyhsa sycharie nata papangawh thie ta.

¹⁹ Chatawhcha Nôba theihthaipa khih cha zaozi ta siehnao ta; a chanô a chapaw ta, hawti nata sâhpi a pazy haipa zy taihta, viahchao zy, alâ zy, mietahkupa zy chhao zaozi ta chhawh sao ta.

²⁰ Ahitu sawchapawpa Ahimele sawchapawpa zy hry liata pakha, a moh Abiatha cha a râ ta, Davi lâta a râ ta.

²¹ Abiatha chata Sawla ta ABEIPA theihthaipa zy a thiepa kyh cha Davi chho ta.

²² Davi chata Abiatha hnohta, “Edôma chyhsa Dôeka cha liata a y no tlai khata, Sawla a chho thlyu aw tahpa ei pahno thlâh hapa raina a châ. Na paw chhôhkha zydua cha keima vâta a thipa châ ei ta.

²³ Nâma cha kei hnohta y la, chi khâ; keima thie nâ chhuahpa chata nâma chhao a cha thie aw, ei hnohta na y khiahta deikua cha nâ boh aw,” tah ta.