Zawba 22

¹ Chatawhcha Temani chyhsa Elipha chata a chhy ta:

² “Chyhsapa he Khazohpa chata phahnaina a hnei rai aw ma? Chyhsa sopa cha ano châta phahnai tlai ta.

³ Chyhsa siapa na châpa cha Atotaotheipa châta alyna a y ma, cha leipa ta na siena zy na pasiapakipa cha ano châta a thôhna a y ma?

⁴ Ano na china awpa ta ma cha chhorei ta, na hnohta ryureina liata a châ ngialâh?

⁵ Na hmoparaona cha thata châ vei ma? Na hmoparaopa ta chhâna rai hnei hra vei.

⁶ Khâpa hrao leipa ta nama unawhpa hnohta soka haw eichi ta, thluahruapazy cha ama chysia hlaipa eichi ta.

⁷ Thazeipa ota dopa ti pie leipa eichi ta, nodipa zy ota niepa pasai leipa eichi ta.

⁸ Chyhsa thatlôpa châta râh hnei ta, a khokheipa chyhsa cha cha liana chata a pahrâ.

⁹ Nôhmeizy tahruapa ta pasiesa ta, paw hnei leipa bâhzy cha thlie ta.

¹⁰ Chavâta na kiapâh ta khoheih zy y ta, china chata thlah a cha pazosa;

¹¹ na hmô theina cha zoh ha ta, chavâta na hmô thei vei, ti a hluhpi chhaota a cha khu.

¹² “Khazohpa cha avâ sâhpa liata y vei ma? Awhsi a sâh chaipazy khi moh la, amâ sâh zie cha!

¹³ ‘Khazohpa cha khâpa e a pahno? Zohna chhakaluhpa pahleipa ta ryu a reih thei ma?

¹⁴ A hmô thei leina awpa ta meido chhakalupa ta khu ta, avâ chahlôna liata a khie laih,’ tah chi ta.

¹⁵ Lâpi parohpa chyhsa moleipa zy siena cha, nâ chhi hra aw ma?

¹⁶ Âmo cha ama daihti hlâta lapa ta y haw ei ta; amâ bohna cha phaoh pathlapa ta a y.

¹⁷ Khazohpa ota, ‘Maniah siesai teh, Atotaotheipa cha khâpa ma a taothei?’ tah ei ta.

¹⁸ Chata hra sala âmo cha hmophapa ta pabie ta, Hmoparaopa zy pachâna cha pahno thei va na.

¹⁹ Chyhsa siapa zy ta hmô ei ta amâ ly; athaipa zy chata âmo pahneisao ei ta,

²⁰ ‘Maniah adyutuhpa zy pahleipadiapa ta y ei ta, a laibâhpa cha mei ta a kâ khai,’ ama tah.

²¹ “Khazohpa nata a paryhpa ta, adyhna tao teh; chatanachata na châta hmophapa a vaw pua aw.

²² A pakah tawhta pachuna a puapa cha nahthlie teh, na palôhrupa liata ano bie cha khoh mah y.

²³ Atotaotheipa lâna cha a reisipa ta vaw kuapa ta, na poh-o tawhtapa sia leina cha thy pathlapa ta,

²⁴ na ngôhzy dolei hawhta na tao khiah la, Ôphira ngôh zy cha vatie alô hry liatahpa y ta,

²⁵ chatanachata Atotaotheipa cha na ngôh vaw châ aw ta, na tâkâ sôh ngaitapa châta chhao;

²⁶ Atotaotheipa liana cha aly aw chi ta, Khazohpa lâna cha nâ hei na aw.

²⁷ A ota thlahchhâ aw chi ta, ano ta a cha nahthlie aw; na bietai chhao na patlô ha hra aw.

²⁸ Hmo rao aw chi ta, na châta a-ipa ta a duah aw, khaihna chata na lâpi zy a khaih ha aw.

²⁹ Khazohpa ta a palaipa cha panawh aw ta, a reisipa cha a pachha aw.

³⁰ Athaipa chyhsa zy pachha aw ta; na ku pathaina zawhzi ta pachhapa ta a y aw,” tah ta.