Zawba 22

Studie

          |

1 Chatawhcha Temani chyhsa Elipha chata a chhy ta:

2 “Chyhsapa he Khazohpa chata phahnaina a hnei rai aw ma? Chyhsa sopa cha ano châta phahnai tlai ta.

3 Chyhsa siapa na châpa cha Atotaotheipa châta alyna a y ma, cha leipa ta na siena zy na pasiapakipa cha ano châta a thôhna a y ma?

4 Ano na china awpa ta ma cha chhorei ta, na hnohta ryureina liata a châ ngialâh?

5 Na hmoparaona cha thata châ vei ma? Na hmoparaopa ta chhâna rai hnei hra vei.

6 Khâpa hrao leipa ta nama unawhpa hnohta soka haw eichi ta, thluahruapazy cha ama chysia hlaipa eichi ta.

7 Thazeipa ota dopa ti pie leipa eichi ta, nodipa zy ota niepa pasai leipa eichi ta.

8 Chyhsa thatlôpa châta râh hnei ta, a khokheipa chyhsa cha cha liana chata a pahrâ.

9 Nôhmeizy tahruapa ta pasiesa ta, paw hnei leipa bâhzy cha thlie ta.

10 Chavâta na kiapâh ta khoheih zy y ta, china chata thlah a cha pazosa;

11 na hmô theina cha zoh ha ta, chavâta na hmô thei vei, ti a hluhpi chhaota a cha khu.

12 “Khazohpa cha avâ sâhpa liata y vei ma? Awhsi a sâh chaipazy khi moh la, amâ sâh zie cha!

13 ‘Khazohpa cha khâpa e a pahno? Zohna chhakaluhpa pahleipa ta ryu a reih thei ma?

14 A hmô thei leina awpa ta meido chhakalupa ta khu ta, avâ chahlôna liata a khie laih,’ tah chi ta.

15 Lâpi parohpa chyhsa moleipa zy siena cha, nâ chhi hra aw ma?

16 Âmo cha ama daihti hlâta lapa ta y haw ei ta; amâ bohna cha phaoh pathlapa ta a y.

17 Khazohpa ota, ‘Maniah siesai teh, Atotaotheipa cha khâpa ma a taothei?’ tah ei ta.

18 Chata hra sala âmo cha hmophapa ta pabie ta, Hmoparaopa zy pachâna cha pahno thei va na.

19 Chyhsa siapa zy ta hmô ei ta amâ ly; athaipa zy chata âmo pahneisao ei ta,

20 ‘Maniah adyutuhpa zy pahleipadiapa ta y ei ta, a laibâhpa cha mei ta a kâ khai,’ ama tah.

21 “Khazohpa nata a paryhpa ta, adyhna tao teh; chatanachata na châta hmophapa a vaw pua aw.

22 A pakah tawhta pachuna a puapa cha nahthlie teh, na palôhrupa liata ano bie cha khoh mah y.

23 Atotaotheipa lâna cha a reisipa ta vaw kuapa ta, na poh-o tawhtapa sia leina cha thy pathlapa ta,

24 na ngôhzy dolei hawhta na tao khiah la, Ôphira ngôh zy cha vatie alô hry liatahpa y ta,

25 chatanachata Atotaotheipa cha na ngôh vaw châ aw ta, na tâkâ sôh ngaitapa châta chhao;

26 Atotaotheipa liana cha aly aw chi ta, Khazohpa lâna cha nâ hei na aw.

27 A ota thlahchhâ aw chi ta, ano ta a cha nahthlie aw; na bietai chhao na patlô ha hra aw.

28 Hmo rao aw chi ta, na châta a-ipa ta a duah aw, khaihna chata na lâpi zy a khaih ha aw.

29 Khazohpa ta a palaipa cha panawh aw ta, a reisipa cha a pachha aw.

30 Athaipa chyhsa zy pachha aw ta; na ku pathaina zawhzi ta pachhapa ta a y aw,” tah ta.