1 Thatihzy Rona 16

¹ Khazohpa Byh cha a ngiakhei ei ta, a sona awpa ta Davi ta a paraipa poh-o chhôh liana chata soh ei ta, raopa hlâna zy nata adyhna hlâna zy Khazohpa hmiakô liata hlâ ei ta."

² Davi ta raopa hlâna nata adyhna hlânazy a hlâ khai nahta, ABEIPA moh ta zawpi zy cha byhnâ aw pata,

³ Izarel mo zydua cha a chapaw a chanô ta, viahchhâ tlâ kha nata sa tlo kha nata kre thei pachawhpa sao kha pie chyu ta.

⁴ ABEIPA Byh hmiakô liata chakao awpa nata ABEIPA Izarel zy Khazohpa cha pahno thlâh hapa ta, ano reithai awpa ta nata a hnohta alyna bie rei awpa ta Livai mo thokha zy rao ta,

⁵ a hyutuh chaipa ta cha Asapha, a pazipa ta cha tlaipi nata totâ a tôpa Zekaria zy, Zeiel zy, Shemiramo zy, Zehiel zy. Matithiah zy, Eliaba zy, Benai zy, Ôbededôma zy, Eeiel zy chhaota; Asapha chata paotlâ a paro ngaitapa ta tô ta,

⁶ theihthaipa Benai nata Zahaziel chata Khazohpa Biehraina Byh hmiakô liata chiahmie zy tô ngâthlâh ha ei ta.

⁷ Chatanachata cha noh liana chata Davi ta ABEIPA lâta alyna bie rei awpa ta Asapha nata a unawhpa zy cha hmâh pathao haw ta.

⁸ ABEIPA lâna cha alyna bie reih ula,a moh pado teh u,chyhsa to hry liana chata a hmotaopa zy cha pahnosa teh u!

⁹ Ano palyupalihpa ta hla sa ulaano reithaipa ta sa teh u, a hmonoâhpa taopa zydua kyh cha a laichadai teh u!

¹⁰ A mo pathaihpa liana chata rôhnahna y se; ABEIPA a tluatuhpa zy pathipalôh cha thahphapa ta y se!

¹¹ ABEIPA nata a thatlôna cha tlua ula,a hmia cha khâ tlua teh u!

¹² A hmo rôhnah ngaitapa taopa zy kha athei thlâh ha ula, a hmotaopazy nata a pakah ta a pachiapa zy cha,

¹³ Hy a chakaotuhpa Izarel pathla sahlao, Zakaw pathla a tlyhpa zy saih u!

¹⁴ Ano cha ABEIPA eima Khazohpa cha châ ta; a ryureina zy cha alei chô zydua liana heta a y,

¹⁵ A biehrai cha chhâzaw ta athei thlâh ha ula, chhâ za hluhpi tawhta a bihpihpa kha.

¹⁶ Abaraha hnohta a bihhraipa nata, Aisika hnohta a chhiesapa cha,

¹⁷ cha tlai cha Zakaw hnohta bieraopa ta, Izarel hnohta chhâzaw biehrai chata pa-i ta,

¹⁸ “Kana râh he ei cha pie aw, na ryuto awpa râh cha,”tahpa ta.

¹⁹ Chyhsa chyhta dei châ eichi ta, a chyhta khitlypa hawhta deita nama châ nona khata,

²⁰ phopi tawhta phopi hropa lâta sie ngâthlâh ei ta, râh hropa tawhta chyhsa a nanopazy lâta,

²¹ ahyhmah pasaipa-i leipa ta; âmo vâta abeizy chhao ra ta,

²² “Ei sathaw thupa zy cha hria khah u, ei hrohsopa zy rai patypamâ khah u! ”tahpa ta.

²³ Leilô pahrâ zydua sahi u, ABEIPA palyupalihpa ta hla sa ula! Noh chareih a pachhana kyh cha pahnosa teh u.

²⁴ Pho to hry liata a rôhnah zie chho ula, chyhsa tozy hry liata a hmonoâhpa taopa zy cha chho teh u!

²⁵ ABEIPA cha rôhnah ta, thata reithai awpa châ tlôh ta, Khazoh zydua hlâta chi awpa a châ.

²⁶ Chyhsa to khazoh zy cha nohthlahpa châ tlôh ei ta; ABEIPA deikua chata avâ zy khi a tao.

²⁷ Zana nata rôhnahna a hmiakô liata y ta; thatlôna nata thaphana a su pathaihpa liata a y.

²⁸ Chyhsa to liata chi tozy saih u, ABEIPA cha patobisa ula, cha rôhnahna nata thatlôna patobisa teh u!

²⁹ ABEIPA cha a moh rôhnahna patobisa ula; hmohlâpa chabapa ta a hmiakô liata a vy teh u! Pathaihna angiana a tobipa ta ABEIPA cha achhy teh u;

³⁰ leilô zydua saih u, a hmiakô liata a chalyu teh u; khizaw he a chalyu lei nawpa ta pa-ipa ta y ta.

³¹ Avâ zy khi aly ngaitapa ta y sala, alei chhao he thahpha ngaitapa ta y mawh sy, pho to hry liana chata “ABEIPA chata ryu a reih! tah mawh sy.

³² Tilaipi nata a chhôh liata hmo a ypa zydua he paro ngâ sala, lyu nata a chhôh liata a ypa zydua he aly ngaitapa ta y maw sy!

³³ Cha tina chata lyurâhpa liata tho zydua he ABEIPA hmiakô liata thahphapa ta ama sa aw, alei ryurei awpa ta a vy tlôh aw ta.

³⁴ ABEIPA lâna cha alyna bie reih muh vy, ano cha pha tlôh ta, a zawngiahna chhao chhâzaw ta y tlôh aw ta,”

³⁶ Izarel zy Khazohpa ABEIPA reithaipa ta y mawh sy, chhâzaw tawhta chhâzaw taih chhaota! ”tah muh vy! Chatawhcha zawpi zydua chata, “Amen!” tah ei ta, ABEIPA cha reithai ei ta.

³⁷ Chatanachata cha liata ABEIPA Biehraina Byh hmiakô liata nohchareih a byuhna zie hawhta chakao awpa ta Asapha nata a unawhpa zy soh ta,

³⁸ Ôbedadôma nata a unawhpa sycharu nata pacharie zy chhaota Zeduthu sawchapawpa Ôbededôma nata Hôsah zy cha ochhivaihtuhpa ama châ.

³⁹ ABEIPA ta Izarel mozy bie a piepa ABEIPA ryhpa liata ropa zydua hawhta raopa hlâna maisâh chô liata,

⁴⁰ my nata zâ ta Kibia su sâhpa liata ABEIPA achhyna byureih liata raopa hlâna zy kha hlâ tuh awpa châ ta, theihthaipa Zadôka nata a unawhpa theihthaipa sahlaozy soh hra ta.

⁴¹ A zawngiahna cha chhâzaw châta a châpa vâta ABEIPA lâta alyna biereituh awpa Hima nata Zeduthu nata mo hropa ama moh ta atlypa zy chhao.

⁴² Hima nata Zeduthu chata parosa awpa ta chiahmie zy nata paotlâ zy a paro ngaitapa nata Khazohpa hla sa nawpa ta chhaichhizy hnei ei ta, ochhi vaihtuh awpa ta Zeduthu sawzy raopa châ ta.

⁴³ Chatawhcha zawpi zydua cha ama o chyu lâta a di haw ei ta, Davi chhao cha a chhôhkha zy byhnâ aw pa awpa ta.