1 Thatihzy Rona 16

Studie

          |

1 Khazohpa Byh cha a ngiakhei ei ta, a sona awpa ta Davi ta a paraipa poh-o chhôh liana chata soh ei ta, raopa hlâna zy nata adyhna hlâna zy Khazohpa hmiakô liata hlâ ei ta."

2 Davi ta raopa hlâna nata adyhna hlânazy a hlâ khai nahta, ABEIPA moh ta zawpi zy cha byhnâ aw pata,

3 Izarel mo zydua cha a chapaw a chanô ta, viahchhâ tlâ kha nata sa tlo kha nata kre thei pachawhpa sao kha pie chyu ta.

4 ABEIPA Byh hmiakô liata chakao awpa nata ABEIPA Izarel zy Khazohpa cha pahno thlâh hapa ta, ano reithai awpa ta nata a hnohta alyna bie rei awpa ta Livai mo thokha zy rao ta,

5 a hyutuh chaipa ta cha Asapha, a pazipa ta cha tlaipi nata totâ a tôpa Zekaria zy, Zeiel zy, Shemiramo zy, Zehiel zy. Matithiah zy, Eliaba zy, Benai zy, Ôbededôma zy, Eeiel zy chhaota; Asapha chata paotlâ a paro ngaitapa ta tô ta,

6 theihthaipa Benai nata Zahaziel chata Khazohpa Biehraina Byh hmiakô liata chiahmie zy tô ngâthlâh ha ei ta.

7 Chatanachata cha noh liana chata Davi ta ABEIPA lâta alyna bie rei awpa ta Asapha nata a unawhpa zy cha hmâh pathao haw ta.

8 ABEIPA lâna cha alyna bie reih ula,a moh pado teh u,chyhsa to hry liana chata a hmotaopa zy cha pahnosa teh u!

9 Ano palyupalihpa ta hla sa ulaano reithaipa ta sa teh u, a hmonoâhpa taopa zydua kyh cha a laichadai teh u!

10 A mo pathaihpa liana chata rôhnahna y se; ABEIPA a tluatuhpa zy pathipalôh cha thahphapa ta y se!

11 ABEIPA nata a thatlôna cha tlua ula,a hmia cha khâ tlua teh u!

12 A hmo rôhnah ngaitapa taopa zy kha athei thlâh ha ula, a hmotaopazy nata a pakah ta a pachiapa zy cha,

13 Hy a chakaotuhpa Izarel pathla sahlao, Zakaw pathla a tlyhpa zy saih u!

14 Ano cha ABEIPA eima Khazohpa cha châ ta; a ryureina zy cha alei chô zydua liana heta a y,

15 A biehrai cha chhâzaw ta athei thlâh ha ula, chhâ za hluhpi tawhta a bihpihpa kha.

16 Abaraha hnohta a bihhraipa nata, Aisika hnohta a chhiesapa cha,

17 cha tlai cha Zakaw hnohta bieraopa ta, Izarel hnohta chhâzaw biehrai chata pa-i ta,

18 “Kana râh he ei cha pie aw, na ryuto awpa râh cha,”tahpa ta.

19 Chyhsa chyhta dei châ eichi ta, a chyhta khitlypa hawhta deita nama châ nona khata,

20 phopi tawhta phopi hropa lâta sie ngâthlâh ei ta, râh hropa tawhta chyhsa a nanopazy lâta,

21 ahyhmah pasaipa-i leipa ta; âmo vâta abeizy chhao ra ta,

22 “Ei sathaw thupa zy cha hria khah u, ei hrohsopa zy rai patypamâ khah u! ”tahpa ta.

23 Leilô pahrâ zydua sahi u, ABEIPA palyupalihpa ta hla sa ula! Noh chareih a pachhana kyh cha pahnosa teh u.

24 Pho to hry liata a rôhnah zie chho ula, chyhsa tozy hry liata a hmonoâhpa taopa zy cha chho teh u!

25 ABEIPA cha rôhnah ta, thata reithai awpa châ tlôh ta, Khazoh zydua hlâta chi awpa a châ.

26 Chyhsa to khazoh zy cha nohthlahpa châ tlôh ei ta; ABEIPA deikua chata avâ zy khi a tao.

27 Zana nata rôhnahna a hmiakô liata y ta; thatlôna nata thaphana a su pathaihpa liata a y.

28 Chyhsa to liata chi tozy saih u, ABEIPA cha patobisa ula, cha rôhnahna nata thatlôna patobisa teh u!

29 ABEIPA cha a moh rôhnahna patobisa ula; hmohlâpa chabapa ta a hmiakô liata a vy teh u! Pathaihna angiana a tobipa ta ABEIPA cha achhy teh u;

30 leilô zydua saih u, a hmiakô liata a chalyu teh u; khizaw he a chalyu lei nawpa ta pa-ipa ta y ta.

31 Avâ zy khi aly ngaitapa ta y sala, alei chhao he thahpha ngaitapa ta y mawh sy, pho to hry liana chata “ABEIPA chata ryu a reih! tah mawh sy.

32 Tilaipi nata a chhôh liata hmo a ypa zydua he paro ngâ sala, lyu nata a chhôh liata a ypa zydua he aly ngaitapa ta y maw sy!

33 Cha tina chata lyurâhpa liata tho zydua he ABEIPA hmiakô liata thahphapa ta ama sa aw, alei ryurei awpa ta a vy tlôh aw ta.

34 ABEIPA lâna cha alyna bie reih muh vy, ano cha pha tlôh ta, a zawngiahna chhao chhâzaw ta y tlôh aw ta,”

36 Izarel zy Khazohpa ABEIPA reithaipa ta y mawh sy, chhâzaw tawhta chhâzaw taih chhaota! ”tah muh vy! Chatawhcha zawpi zydua chata, “Amen!” tah ei ta, ABEIPA cha reithai ei ta.

37 Chatanachata cha liata ABEIPA Biehraina Byh hmiakô liata nohchareih a byuhna zie hawhta chakao awpa ta Asapha nata a unawhpa zy soh ta,

38 Ôbedadôma nata a unawhpa sycharu nata pacharie zy chhaota Zeduthu sawchapawpa Ôbededôma nata Hôsah zy cha ochhivaihtuhpa ama châ.

39 ABEIPA ta Izarel mozy bie a piepa ABEIPA ryhpa liata ropa zydua hawhta raopa hlâna maisâh chô liata,

40 my nata zâ ta Kibia su sâhpa liata ABEIPA achhyna byureih liata raopa hlâna zy kha hlâ tuh awpa châ ta, theihthaipa Zadôka nata a unawhpa theihthaipa sahlaozy soh hra ta.

41 A zawngiahna cha chhâzaw châta a châpa vâta ABEIPA lâta alyna biereituh awpa Hima nata Zeduthu nata mo hropa ama moh ta atlypa zy chhao.

42 Hima nata Zeduthu chata parosa awpa ta chiahmie zy nata paotlâ zy a paro ngaitapa nata Khazohpa hla sa nawpa ta chhaichhizy hnei ei ta, ochhi vaihtuh awpa ta Zeduthu sawzy raopa châ ta.

43 Chatawhcha zawpi zydua cha ama o chyu lâta a di haw ei ta, Davi chhao cha a chhôhkha zy byhnâ aw pa awpa ta.