435. "Ex tribu Gadis duodecim millia signati." - Quod significet bonum vitae inde, constat ex repraesentatione tribus Gadis, quod sit bonum vitae (de qua sequitur); et ex significatione "duodecim millium signatorum", quod sit quod omnes illi in caelo sint et in caelum veniant (de qua supra in binis praecedentibus articulis). Antequam ex Verbo ostenditur quid per Gadem et per tribum ab illo nominatam in ecclesia repraesentabatur, aliquid dicetur quid intelligitur per bonum vitae, quod hic per "tribum Gadis" significatur: - Datur bonum vitae ex origine caelesti, ex origine spirituali, et ex origine naturali. Bonum vitae ex origine caelesti est bonum vitae quod fit ex bono amoris in Dominum per vera ex illo bono; bonum vitae est effectus illorum: hoc bonum vitae est quod hic per "tribum Gadis" significatur; quare dicitur bonum vitae inde, nempe ex bono amoris in Dominum quod per "tribum Jehudae" significatur, per vera ex illo bono quae per "tribum Reubenis" significantur. Bonum vitae ex origine spirituali est bonum vitae quod fit ex bono charitatis erga proximum per vera ex illo bono; hoc bonum vitae intelligitur per "Menassen. "

[2] Duodecim enim tribus Israelis hic divisae sunt in quatuor classes, et sunt tres tribus in qualibet classe; quae tres in serie significant talia quae plene a principio ad finem seu a primo ad ultimum constituunt ipsum universale essentiale ecclesiae quod per primam tribum significatur; tres tribus primum nominatae, nempe tribus Jehudae, Reubenis et Gadis, significant illa quae constituunt plene bonum caeleste; tres autem tribus sequentes, nempe tribus Ascheris, Naphthali et Menasses, significant illa quae constituunt plene bonum spirituale; similiter tribus postea sequentes.

[3] Sunt etiam tria quae plene constituunt et formant unumquodvis universale essentiale; nempe, bonum amoris, verum ex illo bono, et inde bonum vitae; bonum vitae est effectus illorum, nam nisi tertium sit quod producitur, bina priora non dantur; hoc est, nisi bonum vitae sit, bonum amoris et verum ex illo bono non dantur. Haec tria sunt sicut causa finalis, causa efficiens, et effectus; bonum amoris est causa finalis, verum ex illo bono est causa efficiens seu per quod bonum efficit, et bonum vitae est effectus in quo priores causae existunt; quae non existunt nisi effectus sit in quo existant et sub sistant. Sunt etiam tria illa sicut pulsus cordis, respiratio pulmonum, et actio corporis; haec unum faciunt; nam si non corpus agit aut se non agi patitur, ut fit cum homo moritur, duo illa cessant: simile est cum bono amoris, vero ex illo bono, et bono vitae; bonum amoris est instar cordis, etiam intelligitur per "cor" in Verbo; verum ex illo bono est instar pulmonum, etiam intelligitur in Verbo per "spiritum" et "animam" et bonum vitae est instar corporis in quo illa agunt et vivunt: similia tria sunt in unaquavis re quae existit, et cum tria illa simul existunt est formatio plena.

[4] Quid per "Gadem" seu per "tribum Gadis" in omni sensu significatur, primum dicetur: per "Gadem" in supremo sensu significatur Dominus quoad omnipotentiam et omniscientiam, in sensu interno bonum veri, et in sensu externo opera inde quae sunt bonum vitae. Quod talia per "Gadem" significentur, est quia in omnibus et singulis Verbi est sensus intimus, internus, et externus: in sensu intimo est solus Dominus, agitur enim ibi de Ipso, de glorificatione Humani Ipsius, de ordinatione caelorum, subjugatione infernorum, et de instauratione ecclesiae ab Ipso; quare singulae tribus significant Dominum quoad aliquod Ipsius attributum et opus, in sensu intimo: in sensu autem interno agitur de caelo et de ecclesia, et traditur doctrina: Verbum vero in sensu externo est quale est in sensu litterae. Quod tres sensus in Verbo sint, est quia tres caeli sunt: sensus intimus seu caelestis est pro intimo seu tertio caelo; sensus internus seu spiritualis est pro medio seu secundo caelo; et sensus externus seu spiritualis naturalis est pro primo seu ultimo caelo.

[5] Quod "tribus Gadis" in hoc loco Apocalypseos, ubi duodecim tribus nominantur, significet bonum vitae, est quia in ordine sequitur post Jehudam et Reubenem, ac per "Jehudam" significatur bonum amoris, per "Reubenem" verum ex illo bono, inde per "Gadem" significatur bonum vitae; nam ex bono amoris, per vera ex illo, existit bonum vitae, est enim bonum vitae tertium in ordine quod sequitur, nam est effectus illorum, ut supra dictum est.

Quoniam bonum vitae est bonum naturalis hominis, ideo hereditas tribui ¹ Gadis data est trans Jordanem, et simul tribui Reubenis et dimidiae tribui Menassis ibi; terra enim, quae trans Jordanem erat, significabat ecclesiam externam (ut in superiori articulo ostensum est), et ecclesiae externae sunt illa quae procedunt ex naturali homine: ipsa ecclesia in se spectata est in interno seu spirituali homine, externa autem in externo seu naturali, quae tamen unum agent sicut causa et effectus.

[6] Quod tribui ² Gadis hereditas data sit trans Jordanem, constat apud Mosen,

Data est hereditas Reubeni, Gadi et dimidiae tribui Menassis citra Jordanem, ubi terra pecoris; ac data est cum conditione, si armati transirent cum reliquis ad acquirendum terram Canaanem (Numeri 32:1 ad fin. ; cap. 34:14):

porro,

"Reubenitis et Gaditis dedi Gilead usque ad fluvium Arnonis, intra fluvium et terminum, et usque ad Jabbokum fluvium, terminum filiorum Ammonis; tum planitiem et Jordanem et terminum a Cinnereth usque ad mare, planitiem, mare salis, infra aquaeductus Pisgae versus ortum" (Deuteronomius 3:16, 17):

et apud Josuam,

"Dedit Moses.... filiis Gadis, .... ut esset illis terminus Jaeser, et omnes urbes Gileadis, et dimidium terrae filiorum Ammonis usque ad Aroerem, quae ante facies Rabbae, tum a Chesbone usque ad Ramath Mizpae et Betonim", etc. (13:24-28).

Quid per "Gadem" significatur, non modo constare potest ex locis in Verbo ubi Gad nominatur, sed etiam a terris quae datae tribui illi in hereditatem, ubi illae quoque in Verbo nominantur, sicut ubi nominantur Chesbon, Jaeser, Rabba, Ramath Mizpae, fluvius Arnonis, Cinnereth, aquaeductus Pisgae, et plura; quid illae terrae in sensu spirituali significant, nemo scire potest nisi sciat quid significant "tribus Reubenis", "Gadis" et "dimidia tribus Menassis", quibus illae terrae datae sunt in possessionem; significant enim talia quae in sensu lato et stricto significantur per illas tribus:

[7] - Sicut apud Jeremiam,

"Contra filios Ammonis:.... Num filii non Israeli? Num heres non illi? Quare ergo hereditavit rex eorum Gadem, et populus illius in urbibus ejus habitavit? Propterea ecce dies venientes, quibus audiri faciam contra Rabbath filiorum Ammonis clangorem belli, fietque in acervum desolationis, et filiae ejus igne comburentur, et hereditabit Israel heredes suos:.... ejula Chesbon, quia devastata est Ai, clamate filiae Rabbae, accingite saccos, plangite et vagamini inter macerias; quia rex eorum in exilium abibit, sacerdotes et principes ejus simul" (49:1-3):

qui non scit quid per "Gadem" et "Israelem" significatur, nec scire potest quid ibi significatur per "filios Ammonis", per "Chesbonem" et per "Rabbam"; erant enim Rabba, Chesbon et dimidium terrae Ammonis data tribui Gadis in hereditatem; quare per illas terras talia significantur in specie quae per "Gadem" in genere; nam dicitur, "Quare ergo hereditavit rex filiorum Ammonis Gadem, et populus illius in urbibus ejus habitavit?" Omnia enim nomina terrarum, regionum, urbium, fluviorum et populorum in Verbo significant, res ecclesiae: per "Gadem" ibi significatur bonum vitae secundum vera doctrinae, per "Israelem" ecclesia quoad verum, per "filios Ammonis" significantur falsificationes veri, per "Chesbonem" fructificatio veri in naturali homine, per "filias Rabbae" affectiones veri etiam in naturali homine, ac per "Ai" doctrina veri; ex his cognitis sequitur sensus spiritualis illorum verborum in hac serie: "contra filios Ammonis" significat contra falsificationes veri: "Num filii non Israeli? num heres non illi?" significat nonne in ecclesia sunt cognitiones veri et boni; "Israel" est ecclesia, "filii ejus" sunt vera, "heres" est bonum veri: "quare ergo hereditavit rex eorum Gadem, et populus illius in urbibus ejus habitavit?" significat unde est quod verum falsificatum destruxerit bonum vitae, et quoque perverterit doctrinalia secundum quae vita: "ecce dies venientes quibus audire faciam contra Rabbath filiorum Ammonis clangorem belli, fietque in acervum desolationis, "significat destructionem illius doctrinae nempe falsificati veri, et destructionem illorum qui in illa sunt; "et filiae ejus igne comburentur" significat quod affectiones illius fient concupiscentiae mali; "et hereditabit Israel heredes suos" significat quod peritura ecclesia quoad bona: "ejula Chesbon, quia devastata est Ai", significat quod non amplius fructificatio veri ex bono, quia deperdita est doctrina veri; "clamate, filiae Rabbae, accingite saccos, plangite", significat quod non amplius affectiones veri; "et vagamini inter macerias" significat cogitationem et vitam ex falsis; "quia rex eorum in exilium abivit "significat quia verum non amplius"; "sacerdotes ejus et principes ejus simul" significat quod non amplius bona et vera boni. Ex his patet quod per "terras hereditatis Gadis" similia in specie significentur quae per "Gadem" in genere, et quod terrarum in Verbo nominatarum significationes noscantur ex significatione tribuum quibus datae sunt in hereditatem. Aliud quid intelligitur per terras quae dicuntur dandae tribui Gadis in hereditatem apud Ezechielem (cap. 48:27): quod non tribus Gadis intellecta sit, sed tale ecclesiae quod per "Gadem" significatur, patet; nam tribus Gadis non tunc fuit, nec erit.

[8] Quod per "Gadem" significetur bonum vitae ex veris doctrinae, constat ex benedictione illius tribus a Mose,

"Gadi dixit, Benedictus qui latitudinem dedit Gadi; sicut leo habitat, et rapit brachium, etiam verticem; et videt primitias sibi; ibi namque portio legislatoris absconditi; unde venerunt capita populi; justitiam Jehovae fecit, et ³ judicia cum Israele" (Deuteronomius 33:20, 21):

per "Gadem" hic describitur bonum vitae secundum vera ex Verbo, et influxus caeli in id bonum; influxus veri in id bonum a Domino, significatur per "Benedictus qui latitudinem dedit Gadi"; per "latitudinem" significatur verum, per "Gadem" bonum vitae, per "Benedictum" Dominus; quod tutus sit a falsis significatur per "sicut leo habitat"; quod nutriatur a veris externis et internis, significatur per "rapit brachium etiam verticem", "brachium" enim et "vertex" in sacrificiis illa significabant; quod ex primariis, significatur per "vidit primitias sibi"; vera Divina quae inibi latent, significantur per "ibi namque portio legislatoris absconditi"; intelligentia inde, significatur per "unde venerunt capita populi"; bona opera inde, significantur per "justitiam Jehovae fecit"; et vera ecclesiae inde, significantur per "judicia Ejus cum Israele."

[9] Quod per "Gadem" significetur bonum vitae, est quia nominatus est a turma (Genesis 30:10, 11), nam Gad in lingua Hebraea significat turmam, ac per "turmam" in sensu spirituali significantur opera, et bonum vitae consistit in faciendo bona quae sunt opera (de qua re videatur in Arcanis Caelestibus, n. 3934). Quid autem significatur per "Gadem" in benedictione patris ejus Israelis, quae talis apud Mosen,

"Gad, turma depopulabitur illum, et is depopulabitur calcaneum" (Genesis 49:19),

videatur explicatum in Arcanis Caelestibus (n. ⁴ 6403-6406); tum quid significatur per haec apud Esaiam,

"Vos qui deseritis Jehovam, qui obliviscimini montis sanctitatis meae; qui disponitis Gadi mensam, et qui impletis Menio libamen" (65:11)

(n. 6405 ibi).

അടിക്കുറിപ്പുകൾ:

3934. ‘Et dixit Leah, Venit turma’: quod significet in supremo sensu Omnipotentiam et Omniscientiam, in interno bonum fidei, in externo opera, constat a significatione ‘turmae’ hic; quod ‘turma’ in supremo sensu sit Omnipotentia et Omniscientia, est quia turma hic est multitudo, et multitudo cum praedicatur de Divino Domini, est multitudo infinita, quae non aliud est quam Omnipotentia et Omniscientia; sed omnipotentia praedicatur ex quantitate quae est magnitudinis, et omniscientia ex quantitate quae est multitudinis; tum omnipotentia praedicatur ex infinito bono, seu quod idem, ex Divino amore, ita ex Divina voluntate, omniscientia autem ex Infinito vero, seu quod idem, ex Divina intelligentia. Quod ‘turma’ in sensu interno sit bonum fidei, est ex correspondentia, omnipotentiae enim Divinae Domini correspondet bonum quod est charitatis, et omniscientiae verum quod est fidei.

[2] Quod ‘turma’ in ¹ sensu externo sint opera, est quia haec correspondent bono fidei; bonum fidei enim producit opera, nam dari bonum fidei non potest absque operibus, sicut bonum cogitare et bonum velle non absque bonum facere; ² illud est infernum, hoc est externum correspondens; porro cum operibus ita se habet: opera nisi correspondent bono fidei, non sunt opera charitatis, nec opera fidei, nam a suo ³ interno non veniunt, sed sunt opera mortua,

⁴ in quibus non bonum nec verum; at cum correspondent, tunc sunt opera vel charitatis vel fidei; opera charitatis sunt quae a charitate ut a sua anima fluunt, opera autem fidei sunt quae a fide; illa, nempe opera charitatis sunt apud regeneratum, opera autem fidei sunt apud illum qui nondum regeneratus est, sed qui regeneratur; se habent similiter ac se habent affectiones, nempe affectio boni et affectio veri; regeneratus agit bonum ex affectione ejus, ita ex velle bonum; regenerandus autem agit bonum ex affectione veri, ita ex scire bonum; quae qualis differentia sit, saepius prius ostensum est; inde patet quid opera;

[3] ⁵ praeterea se habet bonum fidei ad opera, sicut comparative' voluntas hominis et inde cogitatio ad faciem ejus, quae, nempe facies, quod sit imago animi, hoc est, voluntatis hominis et inde cogitationis, notum est; si non sistitur voluntas et cogitatio in facie ut in sua imagine, tunc ⁶ non est voluntas et cogitatio,

⁷ vel est hypocrisis aut dolus, quia aliam faciem sistit quam vult et cogitat; similiter se habet cum omni actu corporis respective ad interiora quae sunt cogitationis et voluntatis; internum hominis vivit in externo ejus per actum seu per agere; si actus seu agere non est secundum ejus internum, ⁸ indicium est quod vel non internum sit quod producit actum, ⁹ sed motus ex consuetudine et habitu recurrens, vel ¹⁰ sit mentitum quid quale est in hypocrisi et in dolo; inde iterum patet quid opera: inde sequitur quod qui profitetur fidem, et magis qui bonum fidei, et negat opera, et magis ¹¹ si rejicit illa, ¹² is sit absque fide, et adhuc magis absque charitate.

[4] Quia opera charitatis et fidei illa sunt, et homo nusquam in charitate et fide est nisi sit in operibus, ideo in Verbo toties nominantur opera, ut constare potest a sequentibus his locis;

apud Jeremiam,

Oculi Tui aperti sunt super omnes vias filiorum hominis, ad dandum unicuique secundum vias ejus, et secundum fructum operum ejus, 32:19:

apud eundem,

Convertimini unusquisque a via sua mala, et bona facite opera vestra, 35:15:

apud eundem,

Reddam eis secundum opus eorum, et secundum opus manuum eorum,

25:14:

apud Hoscheam,

Visitabo super eum vias ejus, et opera ejus reddam ei, 4:9:

apud Micham, Erit terra in desolationem super habitatores ejus, propter fructum operum illorum, 7:13:

apud Zachariam,

Sic dixit Jehovah Zebaoth, Convertimini a viis vestris malis, et operibus vestris malis:... cogitavit Jehovah Zebaoth facere nobis secundum vias nostras, et secundum opera nostra, sic fecit ¹³ nobis, 1:4, 6:

apud Johannem, Beati mortui qui in Domino moriuntur a nunc; Immo, dicit spiritus, ut requiescant ex laboribus, opera enim illorum sequuntur illos, Apoc. 14:13:

[5] apud eundem,

Vidi mortuos parvos et magnos, stantes coram Deo, et libri aperti sunt: et liber alius apertus, qui est vitae, et judicati sunt mortui juxta ea quae scripta in libris, secundum opera illorum. Dedit mare eos, qui in illo, mortuos, et mors et infernus dedit eos, qui in illis, mortuos; judicati itaque sunt quilibet secundum opera illorum, Apoc. 20:12, 13:

apud eundem,

Ecce venio cito, merces Mea Mecum, ut dem unicuique secundum opus ejus, Apoc. 22:12:

apud Johannem Evangelistam, Hoc est judicium, quod lux venit in mundum, sed dilexerunt homines magis tenebras quam lucem, erant enim opera illorum mala; omnis qui mala facit, odit lucem, et non venit ad lucem, ne coarguantur opera ejus; qui autem facit veritatem, venit ad lucem, ut manifestentur ejus opera, quia in Deo facta sunt,

3:19-21:

apud eundem,

Non potest mundus odisse vos, Me autem odit, quia Ego testor de illo, quod opera illorum mala sint, 7:7:

apud eundem,

Jesus ad Judaeos, Si filii Abrahami essetis, opera Abrahami faceretis; vos facitis opera patris vestri, 8:39, 41:

apud eundem,

Si haec scitis, beati estis si feceritis illa, 13:17:

[6] apud Matthaeum,

Luceto lux vestra coram hominibus, ut videant vestra bona opera.... Qui facit et docet, hic magnus vocabitur in regno caelorum, 5:16, 19:

apud eundem,

Non omnis dicens Mihi, Domine, Domine, intrabit in regnum caelorum, sed faciens voluntatem Patris Mei Qui est in caelis: multi dicent Mihi in die illo, Domine, Domine, nonne per nomen Tuum prophetavimus, et per nomen Tuum daemonia ejecimus, et in nomine Tuo virtutes multas fecimus? sed tunc confitebor illis, Non novi vos, discedite a Me, operarii iniquitatis, 7:[21], 21, 22:

apud Lucam,

Paterfamilias respondens dicit eis, Non novi vos unde sitis, tunc incipietis dicere, Edimus coram te, et bibimus, in plateis nostris docuisti; sed dicet, Dico vobis, non novi vos unde sitis, discedite a Me omnes operarii iniquitatis, 18:25-27:

apud Matthaeum,

Omnis qui audit Mea verba, et facit illa, comparabo viro prudenti; ... at omnis audiens verba Mea, sed non faciens illa, comparabitur viro stulto, 7:24, 26:

apud eundem,

Venturus est Filius hominis in gloria Patris Sui cum angelis Suis, et tunc reddet unicuique secundum opera ejus, 16:27.

[7] Ex his patet quod opera sint quae salvant hominem, et quae condemnant hominem, quod nempe bona opera salvent, et quod mala condemnent; in operibus enim est velle hominis; qui vult bonum, is facit bonum; qui autem non bonum facit, utcumque dixerit quod velit bonum, usque non vult illud cum non facit illud; est sicut dixerit, Volo id, sed non volo; et quia ipsa voluntas est in operibus, et voluntatis est ¹⁴ charitas, et charitatis est fides, patet quid voluntatis seu quid charitatis et fidei est apud hominem ¹⁵ , cum non facit, et magis cum contraria facit, nempe t}mala opera;

[8] praeterea sciendum quod regnum Domini apud hominem incohetur a vita quae est operum, tunc enim in principio regenerationis est, at cum regnum Domini est apud hominem, terminatur illud in operibus, et tunc regeneratus est; internus enim homo tunc correspondenter inest in externo, et externi hominis sunt opera, ac interni est charitas et inde fides, quare opera tunc sunt charitas: ¹⁶ quia in operibus externi hominis existit ita vita interni hominis, ideo Dominus ubi de ultimo judicio agit, apud Matthaeum 25:32-46, non nisi quam opera recenset, et quod intrabunt in vitam aeternam qui bona opera fecerunt, et in ¹⁷ damnationem qui mala opera. Ex illis quae dicta sunt, etiam constare potest quid significat quod de Johanne legitur, quod ad pectus et in sinu ¹⁸ Jesu, et quod illum prae reliquis amaverit, Joh. 13:23, 25; 21:20;

repraesentabantur enim per ‘Johannem’ bona opera, videatur Praefat.

ad cap. xviii, et Praefat. ad cap. xxii Gen. Quid opera fidei, quae etiam fructus ejus ex apparentia vocari possunt, et quid opera charitatis, ex Divina Domini Misericordia, alibi plenius dicetur.

അടിക്കുറിപ്പുകൾ: