9505. Vers. 17-22. Et facies propitiatorium auro puro, duo cubiti et dimidius longitudo ejus, et cubitus et dimidius latitudo ejus. Et facies binos cherubos, auro solido facies illos, a duabus extremitatibus propitiatorii. Et fac cherubum unum ab extremitate hinc, et cherubum unum ab extremitate illinc; ex propitiatorio facietis cherubos super duabus extremitatibus ejus. Et erunt cherubi expandentes alas sursum, obtegentes alis suis super propitiatorium; et facies eorum viri ad fratrem suum; ad propitiatorium erunt facies cheruborum. Et dabis propitiatorium super arcam desuper, et ad arcam dabis testimonium, quod dabo ad te. Et conveniam ¹ tibi ibi, et loquar tecum desuper propitiatorio ab inter binos cherubos qui super arca testimonii, omne quod praecipiam tibi ad filios Israelis. ‘Et facies propitiatorium auro puro’ significat auditionem et receptionem omnium quae cultus ex bono amoris: ‘duo cubiti et dimidius longitudo ejus’ significat omne quoad bonum: et cubitus et dimidius latitudo ejus' significat plenum quoad verum: ‘et facies binos cherubos’ significat intromissionem et aditum ad Dominum non nisi quam per bonum amoris: ‘auro solido facies illos’ significat repraesentativum boni illius: ‘a duabus extremitatibus propitiatorii’ significat bonum caeleste et bonum spirituale: et fac cherubum unum ab extremitate hinc, et cherubum unum ab extremitate illinc significat aditum bono caelesti et aditum bono spirituali: ‘ex propitiatorio facietis cherubos super duabus extremitatibus’ significat receptionem omnium quae cultus ex illis bonis: ‘et erunt cherubi expandentes alas suas sursum’ significat elevationem veri fidei: ‘obtegentes alis suis super propitiatorium’ significat spiritualia integentia: ‘et facies eorum viri ad fratrem suum’ significat conjunctionem veri et boni: ‘ad propitiatorium erant facies cheruborum’ significat interiora jugiter spectantia bonum, ita Dominum: ‘et dabis propitiatorium super arcam desuper’ significat sic auditionem et receptionem omnium cultus quae ex bono amoris: ‘et ad arcam dabis testimonium’ significat a Domino in caelo: ‘quod dabo ad te’ significat repraesentativum: ‘et conveniam ¹ tibi ibi’ significat auditionem et receptionem: ‘et loquar tecum desuper Propitiatorio’ significat conjunctionem: ‘ab inter binos cherubos’ significat ubi bonum caeleste et bonum spirituale conjuncta sunt: qui super arca testimonii significat cum Domino in caelo: ‘omne quod praecipiam tibi ad filios Israelis’ significat cultum Ecclesiae repraesentativae.

სქოლიოები: