6715. SENSUS INTERNUS

vers. 1-4. Et ivit vir e domo Levi, et duxit filiam Levi. Et concepit mulier, et peperit filium, et vidit illum quod bonus ille, et abscondit illum tribus mensibus. Et non potuit amplius abscondere illum, et accepit sibi capsam junci, et bituminavit illam bitumine et pice, et posuit in illa natum, et posuit in alga ad ripam fluminis. Et stabat soror ejus e longinquo ad cognoscendum quid fieret illi. ‘Ivit vir e domo Levi’ significat originem veri ex bono: ‘et duxit filiam Levi’ significat conjunctionem cum bono: ‘et concepit mulier’ significat primum ortus: ‘et peperit filium’ significat legem Divinam in sua origine: ‘vidit illum quod bonus ille’ significat apperceptionem quod per caelum: ‘et abscondit illum tribus mensibus’ significat plenum temporis quo non apparuit: ‘et non potuit amplius abscondere illum’ significat tempus cum apparere debuit: ‘et accepit sibi capsam junci’ significat vile quod circumcirca, sed usque a vero derivatum: ‘et bituminavit illam bitumine et pice’ significat bonum mixtum malis et falsis: ‘et posuit in illa natum’ significat quod intime ibi lex Divina in ¹ sua origine: ‘et posuit illum in alga ad ripam fluminis’ significat quod primum inter scientifica ² falsa: ‘et stabat soror ejus e longinquo ad cognoscendum quid fieret illi’ significat verum Ecclesiae procul inde, et advertentiam.

Poznámky pod čarou:

6724. ‘Et bituminavit illam bitumine et pice’: quod significet bonum mixtum malis et falsis, constat ex significatione ‘bituminis’ quod sit bonum mixtum malis; et ex significatione ‘picis’ quod sit bonum mixtum falsis; quod ‘bitumen’ et ‘pix’ illa significent, inde est quia in se ignea sunt, et per ‘igneum’ in Verbo significatur bonum, et in opposito sensu malum; sed quia sulfurea sunt et quoque nigra, significant malum et falsum, ut apud Esaiam,

Dies ultionis Jehovae, convertentur torrentes ejus in picem, et pulvis ejus in sulfur, et erit terra ejus in picem ardentem, 34:8, 9;

‘pix’ et ‘sulfur’ pro falsis et malis: inde nunc est quod per ‘bituminavit illam bitumine et pice’ significetur bonum mixtum malis et falsis.

[2] Quod ipsam rem attinet, quod nempe circum verum Divinum esset bonum mixtum malis et falsis, nemo potest intelligere nisi sciat quomodo se habet cum reformatione hominis; is cum reformatur, quoad internum suum tenetur a Domino in bono et vero, at quoad externum immittitur in sua mala et falsa, consequenter inter spiritus infernales qui in illis malis et falsis sunt, hi circum volitant, et ¹ intentant omni modo perdere illum; sed bonum et verum quae per internum influunt illum ita tutum reddunt ut spiritus infernales ne hilum damni queant inferre; quod enim interius agit, hoc immensum praevalet super id quod exterius agit, nam interius quia purius agit in singula ipsaque individua exterioris, et sic externum ad sui nutum disponit; ² sed tunc erit bonum et verum in externo, in quo influxus ab interno figi potest, ita potest bonum esse inter mala et falsa, et tamen in tuto esse'; in hunc statum mittitur omnis qui reformatur, ita ³ mala et falsa, in quibus est, removentur, ac bona et vera loco illorum ⁴ inseruntur.

[3] Hoc arcanum nisi sciatur, nequaquam sciri potest cur circum Divinum Verum apud hominem sint bona mixta malis et falsis, quae ⁵ significantur per ⁶ bitumen et picem, quibus arcula in qua positus fuit infans bituminata fuit. Sciendum porro quod bonum misceri possit cum malis et ⁷ falsis, sed usque ideo non conjunguntur, unum enim fugit alterum, et ex lege ordinis se a se mutuo ⁸ separant; bonum enim est caeli, ac malum et falsum est inferni, ideo sicut caelum et infernum separata sunt, ita quoque omnia et singula quae inde se separant.

Poznámky pod čarou: