395. (Vers. 5.) "Et accepit Angelus thuribulum et implevit illud (de) igne Altaris, et projecit in terram," significat amorem spiritualem, in quo amor caelestis, et ejus influxum ¹ in inferiora, ubi illi qui in fide separata a charitate erant. - Quod per "thuribulum," aeque ac per "suffitum," significetur cultus ex amore spirituali, patet a supra ostensis; et ex eo, quod in Verbo continens significet idem cum contento, quemadmodum etiam poculum et patina idem cum vino et cibo, (Matthaeus 23:25-26; Luca 22:20; et alibi). Quod per "ignem Altaris holocausti" significetur Divinus Amor caelestis, est quia per illud Altare significabatur cultus ex illo amore, videatur supra (392); et per "ignem" in supremo Sensu significatur Divinus amor (494).

Amor spiritualis, qui est charitas, trahit suam essentiam ex amore caelesti, qui est amor in Dominum; absque hoc amore non est vitale in amore spirituali seu charitate, non enim aliunde est spiritus et vita quam a Domino. Hoc repraesentatum est in Ecclesia Israelitica per quod Non aliunde acciperent ignem in thuribula et suffirent, quam ex Altari holocausti (ut constare potest apud Mosen, Leviticus 16:12-13; Numeri 17:11-12 (B.A. 16:46-47));

et quod Duo Filii Aharonis consumpti fuerint ex igne e Caelo, quia suffiebant ex igne alieno (hoc est, ex igne non desumpto ex Altari) (Leviticus 10:1-2);

quare etiam statutum fuit, quod Ignis jugiter arderet super Altari holocausti, nec exstingueretur, (Leviticus 6 (B.A. 13));

hoc ex causa, quia ignis illius Altaris significabat Divinum Amorem Domini, et inde amorem in Dominum. Per "projicere thuribulum in terram" significatur influxus in inferiora.

Poznámky pod čarou: