5
Hauriet quoque de sanguine vituli, inferens illum in tabernaculum testimonii.
Apocalypsis Revelata # 279
279. (Vers. 9.) "Et canebant Canticum novum," significat agnitionem et glorificationem Domini, quod Solus sit Judex Redemptor et Salvator, ita Deus Caeli et Terrae. - Haec continentur in cantico quod canebant, et illa quae continentur etiam significantur; ut agnitio quod Dominus sit Judex, in nunc sequentibus his:
"Dignus es accipere librum, et aperire sigilla ejus:"
Quod sit Redemptor, in his:
"Quia occisus es, et redemisti nos in sanguine Tuo:"
quod sit Salvator, in his:
"Fecisti nos Deo nostro Reges et Sacerdotes, et regnabimus super terra:"
quod sit Deus Caeli et terrae, in his:
"Prociderunt et adoraverunt Viventem in saecula saeculorum," (vers. 14).
Quoniam agnitio quod Dominus Solus sit Deus Caeli et terrae, et quod Humanum Ipsius sit Divinum, et quod alioquin non possit Redemptor et Salvator dici, non prius fuit Ecclesia, ideo dicitur "canticum novum." Quod "canticum" etiam significet glorificationem" quae est confessio ex gaudio cordis, est quia cantus exaltat, et facit ut affectio e corde erumpat in sonum, et se intense sistat in sua vita. Psalmi Davidis nec aliud sunt quam cantica, psallebantur enim ac canebantur quare etiam in multis locis vocabantur cantica (Ut Psalm. 18:1; 1 Psalm. 33:1, 3; 2 Psalm. 45:1; Psalm. 46:1; Psalm. 48:1; Psalm. 65:1; Psalm. 66:1; Psalm. 67:1; Psalm. 68:1; Psalm. 75:1; Psalm. 76:1; 3 Psalm. 87:1; Psalm. 88:1; Psalm. 92:1; Psalm. 96:1; Psalm. 98:1; Psalm. 108:1; Psalm. 120:1; Psalm. 121:1; Psalm. 122:1; Psalm. 123:1; Psalm. 124:1; Psalm. 125:1; Psalm. 126:1; Psalm. 127:1; Psalm. 128:1; Psalm. 129:1; Psalm. 130:1; Psalm. 132:1; Psalm. 133:1; Psalm. 134:1).
Quod cantica fuerint propter exaltationem vitae amoris, et inde gaudii, patet ex his:
"Cantate Jehovae Canticum novum, clangite Jehovae omnis terra, personate, jubilate," (Psalm. 98:1, 4-8);
"Cantate Jehovae Canticum novum: laetetur Israel in Factore suo, psallant Ipsi," (Psalm. 149:1-3);
"Cantate Jehovae Canticum novum, extollant vocem," (Esaias 42:10-12),;
"Cantate Caeli, jubilate inferiora terrae, personate montes Cantu, (Esaias 44:23; 49:13);
"Jubilate Deo robori nostro, acclamate Deo Jacobi, extollite Cantum," (Psalm. 81:2-4 (B.A. 1-3));
"Laetitia et gaudium invenietur in Sione, confessio et vox Cantus," (Esaias 51:3; 52:8-9);
"Cantate Jehovae, exclama et jubila filia Sionis, quia magnus in medio tui Sanctus Israelis," (Esaias 12:1-6);
"Paratum est cor meum, cantabo et psallam; excita te gloria mea, confitebor Tibi inter gentes, Domine, psallam Tibi inter populos," (Psalm. 57:8-10 (B.A. 7-9)).
(Et multoties alibi.)
Poznámky pod čarou:
