614. (Vers. 2.) "Et audivi vocem e Caelo, tanquam vocem aquarum multarum," significat Dominum loquentem per Novum Caelum ex Divinis Veris. - Per "vocem e Caelo" significatur vox seu loquela a Domino per Caelum; nam dum auditur vox e Caelo, est a Domino: hic per Novum Caelum ex Christianis, quod intelligitur per "Montem Sionis" super quo "Agnus visus est stare, et cum Ipso centum quadraginta quatuor millia (612, 613); per "aquas multas" significantur Divina Vera (50). Similiter de Domino loquente per Caelum ex Divinis Veris, dicitur in sequentibus his locis:

Audita est vox Filii Hominis, "sicut Vox aquarum multarum," (Apocalypsis 1:15); ¹

Et vox e Throno "tanquam Vox aquarum multarum," (Apocalypsis 19:6);

Et vox Dei Israelis "tanquam Vox aquarum multarum," (Ezechiel 43:2);

"Vox Jehovae super aquis, Jehovah super aquis multis," (Psalm. 29:3); ²

Sonus alarum Cheruborum "sicut Sonus aquarum magnarum," (Ezechiel 1:24);

per "Cherubos" significatur Verbum (239), ita Divinum Verum, ex quo Dominus loquitur.

Poznámky pod čarou: