Novokřesťanské studium Bible

Bible

 

Ezechiel 25

Studie

   

1 Et factus est sermo Domini ad me, dicens :

2 Fili hominis, pone faciem tuam contra filios Ammon, et prophetabis de eis.

3 Et dices filiis Ammon : Audite verbum Domini Dei. Hæc dicit Dominus Deus : Pro eo quod dixisti : Euge, euge, super sanctuarium meum, quia pollutum est ; et super terram Israël, quoniam desolata est ; et super domum Juda, quoniam ducti sunt in captivitatem :

4 idcirco ego tradam te filiis orientalibus in hæreditatem : et collocabunt caulas suas in te, et ponent in te tentoria sua : ipsi comedent fruges tuas, et ipsi bibent lac tuum.

5 Daboque Rabbath in habitaculum camelorum, et filios Ammon in cubile pecorum : et scietis quia ego Dominus.

6 Quia hæc dicit Dominus Deus : Pro eo quod plausisti manu et percussisti pede, et gavisa es ex toto affectu super terram Israël,

7 idcirco ecce ego extendam manum meam super te, et tradam te in direptionem gentium, et interficiam te de populis, et perdam de terris, et conteram : et scies quia ego Dominus.

8 Hæc dicit Dominus Deus : Pro eo quod dixerunt Moab et Seir : Ecce sicut omnes gentes, domus Juda :

9 idcirco ecce ego aperiam humerum Moab de civitatibus, de civitatibus, inquam, ejus, et de finibus ejus, inclytas terræ Bethiesimoth, et Beelmeon, et Cariathaim,

10 filiis orientis cum filiis Ammon, et dabo eam in hæreditatem, ut non sit ultra memoria filiorum Ammon in gentibus.

11 Et in Moab faciam judicia, et scient quia ego Dominus.

12 Hæc dicit Dominus Deus : Pro eo quod fecit Idumæa ultionem ut se vindicaret de filiis Juda, peccavitque delinquens, et vindictam expetivit de eis :

13 idcirco hæc dicit Dominus Deus : Extendam manum meam super Idumæam, et auferam de ea hominem et jumentum, et faciam eam desertam ab austro : et qui sunt in Dedan gladio cadent.

14 Et dabo ultionem meam super Idumæam per manum populi mei Israël, et facient in Edom juxta iram meam et furorem meum, et scient vindictam meam, dicit Dominus Deus.

15 Hæc dicit Dominus Deus : Pro eo quod fecerunt Palæstini vindictam, et ulti se sunt toto animo, interficientes, et implentes inimicitias veteres,

16 propterea hæc dicit Dominus Deus : Ecce ego extendam manum meam super Palæstinos, et interficiam interfectores, et perdam reliquias maritimæ regionis,

17 faciamque in eis ultiones magnas, arguens in furore : et scient quia ego Dominus, cum dedero vindictam meam super eos.

   

Bible

 

Ezechiel 21:3

Studie

       

3 Et dices terræ Israël : Hæc dicit Dominus Deus : Ecce ego ad te, et ejiciam gladium meum de vagina sua, et occidam in te justum et impium.

Ze Swedenborgových děl

 

Doctrina Novae Hierosolymae de Domino # 27

Prostudujte si tuto pasáž

  
/ 65  
  

27. Quod Dominus dicatur "Filius hominis" ubi agitur de Redemptione, Salvatione, Reformatione et Regeneratione, constat ex his:-

"Filius hominis venit,... ut det animam redemptionem pro multis" (Matthaeum 20:28; Marcus 10:45);

"Venit Filius hominis ad salvandum," et non ad perdendum (Matthaeum 18:11; Lucam 9:56);

"Venit Filius hominis ad quaerendum et salvandum id quod perierat" (Lucam 19:10);

Venit Filius hominis, "ut mundus salvetur per Ipsum" (Johannem 3:17);

"Qui seminat bonum semen est Filius hominis" (Matthaeum 13:37):

Ibi de redemptione et salvatione agitur; quae quia a Domino fiunt per Verbum, ideo Se vocat ibi "Filium hominis." Dicit Dominus,

Quod Filius hominis potestatem habeat remittendi peccata (Marcum 2:10; Lucam 5:24),

Hoc est, salvandi. Tum,

Quod sit Dominus Sabbathi, quia est Filius hominis (Matthaeum 12:8; Marcus 2:28; Lucam 6:24 [NCBSP: 6:5]),

Quia est Verbum, quod Ipse tunc docet. Praeterea dicit apud Johannem,

"Operamini cibum, non qui perit, sed cibum qui manet in vitam aeternam, quem Filius hominis vobis dabit" (6:27):

Per "cibum" intelligitur omne verum et bonum doctrinae ex Verbo, ita a Domino: hoc quoque ibi intelligitur per "mannam," et per "panem" qui e caelo descendit; et quoque per hoc in eodem capite,

"Nisi comederitis carnem Filii hominis, et biberitis Ipsius sanguinem, non habebitis vitam in vobis" (vers. 53):

"caro" seu "panis" est bonum amoris ex Verbo, "sanguis" seu "vinum" est bonum fidei ex Verbo, utrumque a Domino.

[2] Simile per "Filium hominis," in aliis locis ubi dicitur, significatur. Ut in his:

"Vulpes foveas habent, et volucres... nidos; Filius vero hominis non habet ubi caput inclinet" (Matthaeum 8:20; Lucam 9:55 [NCBSP: 58]);

Per hoc intelligitur quod Verbum non haberet locum apud judaeos, ut quoque dicit Dominus (Johannem 8:37); nec esset manens apud illos, quia non agnoverunt Ipsum (Johannem 5:38-39). Per "Filium hominis" intelligitur Dominus quoad Verbum, etiam in Apocalypsi,

"In medio septem candelabrorum" vidi "similem Filio hominis, indutum talari, et circumcinctum ad ubera zona aurea" (Apocalypsis 1:13, seq.):

Ibi per varia repraesentatus est Dominus ut Verbum; quare etiam vocatur "Filius hominis." Apud Davidem,

"Sit manus tua pro Viro dextrae tuae, pro Filio hominis confortasti Te; tunc non recedemus a Te; vivifica nos" (Psalmus 80:18, [NCBSP: Psalmus 80:17-18]):

"Vir dextrae" est quoque hic Dominus quoad Verbum; similiter "Filius hominis;" vocatur "Vir dextrae," quia Domino ex Divino Vero, quod etiam est Verbum, est potentia, ac Ipsi Divina Potentia fuit quando totum Verbum implevit: inde etiam dixerat,

Quod visuri sint "Filium hominis sedentem a dextris" Patris, cum potentia (Marcum 14:62).

  
/ 65  
  

©2024 New Christian Bible Study Corporation. All rights reserved. Printed from newchristianbiblestudy.org