Apocalypsis Revelata # 757
757. "Et custodia omnis spiritus immundi, et custodia omnis avis immundae et exosae," significat quod mala voluntatis et inde facti, ac falsa cogitationis et inde consilii illorum, qui in infernis illis sunt, diabolica sint, quia aversi a Domino ad semet ipsos sunt. - Per "custodiam" significatur Infernum, quia ibi incarcerati sunt; per "spiritum" significatur omne quod affectionis seu voluntatis et inde facti est; et per "avem" significatur omne quod cogitationis seu intellectus et inde consilii est; quare per "spiritum immundum" et "avem immundam" significantur omnia mala quae voluntatis et inde facti sunt, et omnia falsa quae cogitationis et inde consilii sunt; et quia haec sunt in infernis apud illos, ideo significatur quod illa diabolica sint: et quia sunt aversi a Domino ad semet ipsos, dicitur etiam "avis exosa." Per similia describitur Babel apud Prophetas, ita apud Esajam:
"Erit Babel sicut eversio Dei, Sodoma et Gomorrha; non habitabitur in aeternum, ita ut non moretur ibi Arabs; cubabunt ibi tziim, et implebuntur domus eorum ochim, et habitabunt ibi filiae noctuae, et satyri saltabunt ibi: respondebunt etiam ijim 1 in palatiis ejus, et dracones in palatiis deliciarum ejus," (13:19-22);
apud eundem:
"Exscindam Babeli nomen et residuum; ponam eam in haereditatem anatariae," (14:22-23);
et apud Jeremiam:
In Babele "habitabunt tziim et ijim et filiae noctuae, juxta eversionem Dei, Sodomam et Gomorrham et vicinas ejus; non habitabit ibi filius hominis," (50:39-40).
Ex his patet, quod per "custodiam omnis spiritus immundi, et omnis avis immundae et exosae," significetur quod mala voluntatis et inde facti, ac falsa cogitationis et inde consilii, illorum qui in infernis illis sunt, diabolica sint, quia aversi a Domino ad semet ipsos sunt. Quod "aves" significent talia quae intellectus et cogitationis et inde consilii sunt, in utroque sensu tam malo quam bono, patet ex Verbo. In sensu malo ibi in his locis:
"In medio septimanae cessare faciet 2 sacrificium: tandem super Avem abominationum desolatio, usque ad consummationem stillabit super devastationem," 3 (Daniel 9:27);
"Possidebunt terram platea et anataria, ulula et corvus habitabunt in ea," (Esaias 34:1).
Non aliud quam falsa infernalia significantur per "ochim," "tziim," "filias noctuae," "dracones," in locis supra adductis;
Tum per Aves quae descenderunt super cadavera, quas Abram abegit, (Genesis 15:11); 4
Per Aves, quibus darentur cadavera eorum in cibum, (Jeremias 7:33; 15:3; 16:4; 19:7; 34:20; Ezechiel 29:5; Psalm. 79:1-2);
Tum per Aves quae comedunt id quod seminatum est, (Matthaeus 13:3-4).
In bono sensu in his locis Laudent Nomen Jehovae "reptile et Avis," (Psalm. 148:10);
"Feriam illis foedus in die illo cum Avi caelorum et reptili terrae," (Hoschea 2:18);
"Interroga bestias et docebunt te, et Aves caeli et annuntiabunt tibi; quis non novit ex his omnibus quod manus Jehovae faciat illud," (Hiob 12:7-9);
"Vidi cum ecce non homo, omnis Avis caelorum avolarunt," (Jeremias 4:24-26);
"Ab Ave caelorum usque ad bestiam avolarunt, quia dabo Hierosolymam acervos, habitaculum draconum," (Jeremias 9:9-10 (B.A. 10-11); 12:9);
"Non veritas, non misericordia, non cognitio Dei: propterea lugebit terra quoad bestiam agri et quoad Avem caelorum "(Hoschea 4:1, 3);
"Ego Deus, vocans ab ortu Avem, e terra longinqua virum consilii," (Esaias 46:9, (11));
"Aschur cedrus in Libano; in ramis ejus nidificarunt omnes aves caelorum, et in umbra ejus habitarunt omnes gentes magnae," (Ezechiel 31:3, 6); 5
similia ut hic de Aschure ut cedro dicuntur alibi (Ut Ezechiel 17:23; Daniel 4:7-11, 17-18 (B.A. 10-14, 20-21); Matthaeus 13:31-32; Marcus 4:32; 6 Luca 13:19);
"Dic Avi omnis alae, et omni bestiae agri, Venite ad sacrificium magnum super montibus Israelis: sic dabo gloriam Meam inter gentes," (Ezechiel 39:17, 21; Apocalypsis 19:17).
(Praeter alibi, ut Esaias 18:1, 6; Ezechiel 38:20; Hoschea 9:11; 11:9, 11; 7 Zephanias 1:3; Psalmuss 8:7-9 (B.A. 6-8); Psalm. 50:11; Psalm. 104:10, 12). 8
Quod "aves" significent illa quae intellectus et inde cogitationis et consilii sunt, patet manifeste ex avibus in mundo spirituali, ubi etiam apparent aves omnis generis et omnis speciei, in Caelo pulcherrimae, paradisiacae, turtures, Columbae, in Inferno dracones, ululae, bubones, et similes aliae, quae omnes sunt repraesentationes ad vivum cogitationum ex affectionibus bonis in Caelo, et cogitationum ex affectionibus malis in Inferno.
Poznámky pod čarou:
1. ijim pro "zjim"
2. faciet pro "faciam"
3. super devastationem pro "devastatio"
4. 11 pro "10"
5. 3 pro "5"
6. Marc. pro "Matth."
7. 11 pro "10"
8. 12 pro "11"
Matthaeus 13
1
In illo die exiens Jesus de domo, sedebat secus mare.
2
Et congregatæ sunt ad eum turbæ multæ, ita ut naviculam ascendens sederet : et omnis turba stabat in littore,
3
et locutus est eis multa in parabolis, dicens : Ecce exiit qui seminat, seminare.
4
Et dum seminat, quædam ceciderunt secus viam, et venerunt volucres cæli, et comederunt ea.
5
Alia autem ceciderunt in petrosa, ubi non habebant terram multam : et continuo exorta sunt, quia non habebant altitudinem terræ :
6
sole autem orto æstuaverunt ; et quia non habebant radicem, aruerunt.
7
Alia autem ceciderunt in spinas : et creverunt spinæ, et suffocaverunt ea.
8
Alia autem ceciderunt in terram bonam : et dabant fructum, aliud centesimum, aliud sexagesimum, aliud trigesimum.
9
Qui habet aures audiendi, audiat.
10
Et accedentes discipuli dixerunt ei : Quare in parabolis loqueris eis ?
11
Qui respondens, ait illis : Quia vobis datum est nosse mysteria regni cælorum : illis autem non est datum.
12
Qui enim habet, dabitur ei, et abundabit : qui autem non habet, et quod habet auferetur ab eo.
13
Ideo in parabolis loquor eis : quia videntes non vident, et audientes non audiunt, neque intelligunt.
14
Et adimpletur in eis prophetia Isaiæ, dicentis : Auditu audietis, et non intelligetis : et videntes videbitis, et non videbitis.
15
Incrassatum est enim cor populi hujus, et auribus graviter audierunt, et oculos suos clauserunt : nequando videant oculis, et auribus audiant, et corde intelligant, et convertantur, et sanem eos.
16
Vestri autem beati oculi quia vident, et aures vestræ quia audiunt.
17
Amen quippe dico vobis, quia multi prophetæ et justi cupierunt videre quæ videtis, et non viderunt : et audire quæ auditis, et non audierunt.
18
Vos ergo audite parabolam seminantis.
19
Omnis qui audit verbum regni, et non intelligit, venit malus, et rapit quod seminatum est in corde ejus : hic est qui secus viam seminatus est.
20
Qui autem super petrosa seminatus est, hic est qui verbum audit, et continuo cum gaudio accipit illud :
21
non habet autem in se radicem, sed est temporalis : facta autem tribulatione et persecutione propter verbum, continuo scandalizatur.
22
Qui autem seminatus est in spinis, hic est qui verbum audit, et sollicitudo sæculi istius, et fallacia divitiarum suffocat verbum, et sine fructu efficitur.
23
Qui vero in terram bonam seminatus est, hic est qui audit verbum, et intelligit, et fructum affert, et facit aliud quidem centesimum, aliud autem sexagesimum, aliud vero trigesimum.
24
Aliam parabolam proposuit illis, dicens : Simile factum est regnum cælorum homini, qui seminavit bonum semen in agro suo :
25
cum autem dormirent homines, venit inimicus ejus, et superseminavit zizania in medio tritici, et abiit.
26
Cum autem crevisset herba, et fructum fecisset, tunc apparuerunt et zizania.
27
Accedentes autem servi patrisfamilias, dixerunt ei : Domine, nonne bonum semen seminasti in agro tuo ? unde ergo habet zizania ?
28
Et ait illis : Inimicus homo hoc fecit. Servi autem dixerunt ei : Vis, imus, et colligimus ea ?
29
Et ait : Non : ne forte colligentes zizania, eradicetis simul cum eis et triticum.
30
Sinite utraque crescere usque ad messem, et in tempore messis dicam messoribus : Colligite primum zizania, et alligate ea in fasciculos ad comburendum : triticum autem congregate in horreum meum.
31
Aliam parabolam proposuit eis dicens : Similis est regnum cælorum grano sinapis, quod accipiens homo seminavit in agro suo :
32
quod minimum quidem est omnibus seminibus : cum autem creverit, majus est omnibus oleribus, et fit arbor, ita ut volucres cæli veniant, et habitent in ramis ejus.
33
Aliam parabolam locutus est eis : Similis est regnum cælorum fermento, quod acceptum mulier abscondit in farinæ satis tribus, donec fermentatum est totum.
34
Hæc omnia locutus est Jesus in parabolis ad turbas : et sine parabolis non loquebatur eis :
35
ut impleretur quod dictum erat per prophetam dicentem : Aperiam in parabolis os meum ; eructabo abscondita a constitutione mundi.
36
Tunc, dimissis turbis, venit in domum : et accesserunt ad eum discipuli ejus, dicentes : Edissere nobis parabolam zizaniorum agri.
37
Qui respondens ait illis : Qui seminat bonum semen, est Filius hominis.
38
Ager autem est mundus. Bonum vero semen, hi sunt filii regnum. Zizania autem, filii sunt nequam.
39
Inimicus autem, qui seminavit ea, est diabolus. Messis vero, consummatio sæculi est. Messores autem, angeli sunt.
40
Sicut ergo colliguntur zizania, et igni comburuntur : sic erit in consummatione sæculi.
41
Mittet Filius hominis angelos suos, et colligent de regno ejus omnia scandala, et eos qui faciunt iniquitatem :
42
et mittent eos in caminum ignis. Ibi erit fletus et stridor dentium.
43
Tunc justi fulgebunt sicut sol in regno Patris eorum. Qui habet aures audiendi, audiat.
44
Simile est regnum cælorum thesauro abscondito in agro : quem qui invenit homo, abscondit, et præ gaudio illius vadit, et vendit universa quæ habet, et emit agrum illum.
45
Iterum simile est regnum cælorum homini negotiatori, quærenti bonas margaritas.
46
Inventa autem una pretiosa margarita, abiit, et vendidit omnia quæ habuit, et emit eam.
47
Iterum simile est regnum cælorum sagenæ missæ in mare, et ex omni genere piscium congreganti.
48
Quam, cum impleta esset, educentes, et secus littus sedentes, elegerunt bonis in vasa, malos autem foras miserunt.
49
Sic erit in consummatione sæculi : exibunt angeli, et separabunt malos de medio justorum,
50
et mittent eos in caminum ignis : ibi erit fletus, et stridor dentium.
51
Intellexistis hæc omnia ? Dicunt ei : Etiam.
52
Ait illis : Ideo omnis scriba doctus in regno cælorum, similis est homini patrifamilias, qui profert de thesauro suo nova et vetera.
53
Et factum est, cum consummasset Jesus parabolas istas, transiit inde.
54
Et veniens in patriam suam, docebat eos in synagogis eorum, ita ut mirarentur, et dicerent : Unde huic sapientia hæc, et virtutes ?
55
Nonne hic est fabri filius ? nonne mater ejus dicitur Maria, et fratres ejus, Jacobus, et Joseph, et Simon, et Judas ?
56
et sorores ejus, nonne omnes apud nos sunt ? unde ergo huic omnia ista ?
57
Et scandalizabantur in eo. Jesus autem dixit eis : Non est propheta sine honore, nisi in patria sua, et in domo sua.
58
Et non fecit ibi virtutes multas propter incredulitatem illorum.
