10370. ‘Et custodient filii Israelis sabbatum ad faciendum sabbatum generationibus illorum’: quod significet quod ipsum essentiale Ecclesiae sit agnitio unionis ipsius Divini in Humano Domini, et quod ¹ haec erit in omnibus et singulis cultus, constat ex significatione ‘custodire sabbatum’ quod sit sancta cogitatio jugiter de unione ipsius Divini cum Humano Domini, de qua supra n. 10356, ita quoque agnitio, nam cogitatio absque agnitione et fide non est cogitatio spiritualis; ex repraesentatione ‘filiorum Israelis’ quod sint Ecclesia, de qua in locis citatis n. 9340; ex significatione ‘facere sabbatum’ quod sit sancte colere illam unionem, ita Dominum quoad Divinum Humanum, nam in Eo est illa unio; et ex significatione ‘ ² generationum filiorum Israelis’ quod sit in omnibus et singulis Ecclesiae, de qua n. 10282; ex his patet quod per quod ‘custodient filii Israelis sabbatum ad faciendum sabbatum generationibus vestris’ significetur agnitio ipsius Divini in Humano Domini in omnibus et singulis cultus; quod id essentiale Ecclesiae sit, et inde essentiale cultus ejus, est quia salus generis humani unice pendet ab illa unione; propter ³ illam unitionem etiam Dominus in mundum venit; ideo etiam totum Verbum in sensu intimo de illa agit, ac ⁴ ritualia Ecclesiae apud filios Israelis institutae, illam repraesentabant et significabant;

[2] ⁵ quod salus generis humani inde sit, consequenter quod ⁶ agnitio illa essentiale Ecclesiae, et ejus cultus sit, docet Dominus pluribus in locis, ut apud Johannem,

Qui credit in Filium, habet vitam aeternam; qui vero non credit Filio, non videbit vitam, 3:36, tum vers. 15, 16, 16 ibi; ut et 6:40, 11:25, 26, 20:31;

‘Filius’ est Divinum Humanum Domini; quod non habeant vitam aeternam illi qui non ex fide agnoscunt Dominum, est quia totum caelum in agnitione illa est, ⁷ Dominus enim est Dominus caeli et terrae, ut Ipse docet apud Matthaeum,

Data est Mihi omnis potestas in caelo et in terra, 28:18;

quapropter illis qui non agnoscunt Ipsum, clauditur caelum; et qui non agnoscit in mundo, hoc est, qui intra Ecclesiam, non agnoscit in altera vita; talis est status hominis post mortem.

Poznámky pod čarou:

10083. ‘Et agitabis illa agitationem coram Jehovah’: quod significet inde vitam Divinam, constat ex significatione ‘agitare agitationem’ quod sit vivificare, ita vita; et quia dicitur a ‘coram Jehovah’, significatur vita Divina ¹ . Quod ‘agitare agitationem’ sit vivificare seu vitam Divinam dare, constat a locis in Verbo ubi ‘agitare agitationem’ dicitur, ut apud Moschen,

Cum adfertis manipulum primitiarum messis vestrae sacerdotem, agitabit manipulum ² coram Jehovah in beneplacitum vestri; a crastino sabbati agitabit illum, sacerdos, Lev. 23:10, 11;

per ‘messem’ significatur status veri fidei ex bono, ita status boni, n. 9295, per manipulum primitiarum' significatur' collectim ³ ejus status; inde per ‘agitari a sacerdote’ significatur vivificari ad recipiendum benedictionem; omnis enim benedictio vitam a Divino in se habebit, ut sit benedictio:

apud eundem,

Aharon agitabit Levitas agitationem coram Jehovah a cum filiis Israelis, ut sint ad ministrandum ministerium Jehovae. Statues Levitas ante Aharonem et ante filios ejus, et agitabis eos agitationem Jehovae: postea venient Levitae ad ministrandum in tentorio conventus, et purificabis eos, et agitabis eos agitationem: cumque purificati sunt Levitae, et Aharon agitavit eos agitationem coram Jehovah, et expiavit eos Aharon ad purificandum eos, Num. 8:11, 13, 15, 21; quid ‘agitare agitationem’, ex his constare potest, quod nempe sit vivificare per agnitionem, quae est primum fidei, ita primum vitae a Divino apud hominem; cognitio quidem praecedit agnitionem, sed cognitioni nihil vitae Divinae inest priusquam ⁴ fit agnitio, et dein fides; Levitae repraesentabant vera ministrantia bono, ac Aharon repraesentabat bonum cui ministrabant, ideo illi agitabantur, hoc est, vivificabantur; quapropter etiam dicitur quod ⁵ purificandi, nam ⁶ veris inerit vita a Divino ut ministrent bono, ⁷ ac vita illa primum influit per agnitionem ⁸

Simile per agitationem auri significatur apud Moschen, Venerunt viri cum feminis, ⁹ attulerunt fibulam, monile, aurum, cingulum, omnia vasa auri, et omnis vir qui agitavit agitationem auri Jehovae, Exod. 35:22;

‘agitare agitationem auri Jehovae’ est vivificare per agnitionem, quod Jehovae, hoc est, Domini esset. Quod ‘agitare agitationem’ talia significet, est ex correspondentia, ¹⁰ omnis namque motus correspondet statui cogitationis; inde ¹¹ progressiones, profectiones, et similia quae motus sunt, in Verbo significant status vitae, videatur n. 3335, 4882, 5493, ¹² 5605, 8103, 8417, 8420, 8557:

apud Johannem,

Ad lacum Bethesdam jacebat multitudo ingens aegrotorum, et angelus certo tempore descendebat ad lacum et commovit aquam qui tunc prius ingrediebatur post motum aquae, sanus factus es quocumque teneretur morbo, 5:2-7;

per ‘commovere aquam’ hic similiter ¹³ significabatur vivificatio per agnitionem et fidem, ita quoque purificatio per vera; ¹⁴ quod ‘motus’ significet status vitae, videatur n. 2837, 3356, 3387, 4321, 4882, ¹⁵ 5605, 7381, 9440, 9967, et quod ‘aquae’ sint vera fidei, n. 2702, 3058, 3424, 4976, 8568, 9323; quod omnes purificationes fiant per vera fidei, n. 2799, 5954 fin. , 7044, 7918, ¹⁶ 9088, et quod sanationes repraesentaverint restitutiones vitae spiritualis, n. 8365, 9031 fin.

¹⁷ Quoniam per ‘agitationem super volis Aharonis’ significatur ¹⁸ vivificatio per agnitionem Domini, et quod ab Ipso omnia, ¹⁹ ideo de agnitione illa et inde fide, paucis dicetur: a Domino saepe dictum est, cum aegroti sanabantur, quod fidem haberent, et ²⁰ ut fiat illis secundum fidem, ut Matth. 8:10-13; 9:2, 22, 27-29; 13:57, 58; 15:28; 21:21, 22, 31, 32; Marcus 5:34, 36, 10:49, 52; 16:16; Luc. 8:9, 48-50, 8:48, 17:19, 18:42, 43;

causa erat quia omnium primum est agnoscere quod Dominus sit Salvator mundi, ²¹ nam absque illa agnitione nemo ²² recipere potest aliquid veri et boni e caelo, ita nec fidem, et quia id omnium primum et essentialissimum est, ideo, ut agnosceretur Dominus cum in mundum venit, cum sanavit aegrotos, interrogavit de fide, et qui fidem habebant sanabantur: fides erat quod Ipse esset Filius Dei ²³ venturus in mundum, et quod ei potestas sanandi et salvandi; omnes etiam sanationes morborum a Domino cum fuit in mundo, significabant sanationes vitae spiritualis, ita quae sunt salvationis, n. 8364, 9031 fin. , ²⁴ 9086.

Quia agnitio Domini omnium primum vitae spiritualis est, et essentialissimum Ecclesiae, et quia absque illa nemo aliquid veri fidei ac boni amoris recipere potest e caelo, ideo Dominus etiam ²⁵ saepe dicit quod qui credit in Ipsum, vitam aeternam habeat, et qui non credit non habeat, ut Joh. 1:1, 4, 12, 13, 3:14-16, 36, 5:39, 40, 6:28-30, 33, 34, 35, 40, 47, 48, 7:37, 38, 8:24, 11:25, 26, 20:30, 31;

sed etiam simul docet quod illi fidem in Ipsum habeant qui vivunt secundum praecepta Ipsius, sic ut vita inde ingrediatur fidem. Haec dicta sunt ad illustrandum et confirmandum quod agnitio Domini, et quod ab Ipso omnis salvatio, sit primum vitae a Divino apud hominem; primum illud vitae significatur per ‘agitationes super volis Aharonis’.

Poznámky pod čarou: