7111. ‘Exactoribus in populo et moderatoribus ejus, dicendo’: quod significet illos qui proxime infestant et qui proxime recipiunt, constat ex significatione ‘exactorum’ quod sint qui ad serviendum adigunt, de qua n. 6852; et quia hoc fit per infestationes, etiam per ‘exactores’ significantur illi qui infestant sed qui proxime infestant, de quibus ¹ infra; et ex significatione ‘moderatorum’ quod sint qui proxime recipiunt; erant enim moderatores a filiis Israelis, at exactores ab Aegyptiis, ut patet a sequentibus; ita in sensu interno sunt moderatores illi qui proxime recipiunt, et exactores qui proxime infestant;

[2] quinam illi sunt, ² sciri potest ab illis in altera vita qui infestant ac injiciunt falsa et mala, et qui recipiunt illa et communicant; qui infestant et injiciunt falsa et mala sunt inferna, sed ut ³ efficere possint, emittunt a se emissarios per quos agunt; apparent illi non procul ab illis qui infestantur; ⁴ hoc fit ideo ut cogitationes ac intentiones plurium concentrentur, alioquin dissiparentur; emissarii illi apparent in suis certis locis in mundo spirituum, exque ipsis locis ubi apparent, cognosci potest ex quo inferno sunt; quidam apparent supra caput ad variam altitudinem, et ad variam obliquitatem; quidam juxta caput ⁵ ad dextrum sive ad sinistrum, etiam post illud; quidam infra caput varie ⁶ ad corpus, in planis a capite usque ad plantas ⁷ pedis; illi influunt cum talibus quae ab inferno ejiciuntur, et ⁸ quae influunt, spiritus seu homo non aliter sentit, et inde non ⁹ aliter scit quam quod ¹⁰ in ipso sint, hoc est, quod ipse ¹¹ cogitet illa ac intendat; emissarii illi vocantur subjecta, de quibus videantur quae ab experientia prius n. 4403, 5856, 5983-5989, ostensa sunt; hi quia proxime infestant, significantur per exactores; qui autem ab illis recipiunt et communicant sunt moderatores, ac sunt spiritus intermedii; moderatores enim, ut supra dictum, ¹² erant ex filiis Israelis, ¹³ sed exactores ab Aegyptiis.

[3] Moderatores dicebantur apud populum Israeliticum et Judaicum, qui ¹⁴ dicerent quid agerent, et qui ¹⁵ praeciperent; quapropter cum judicibus et senioribus etiam sedebant in portis, et loquebantur ad populum quae ¹⁶ judicabantur, tum quoque quae a duce mandabantur, ut constare potest a sequentibus his locis:

apud Moschen, Judices et moderatores dabis in omnibus portis tuis juxta tribus tuas, qui judicabunt populum judicio justitiae, [Deut. ] 16:18:

apud eundem,

Quando ¹⁷ exibunt ad bellum, loquetur sacerdos ad populum, et admonebit ne timerent; postea moderatores dicent quod qui aedificavit domum reverteretur, et quoque ¹⁸ timidi, [Deut. ] xx [1, 2, ] 5, 8, 9:

apud Joschuam, Joschua praecepit moderatoribus ut dicerent ad populum, ut pararent viaticum, antequam transirent Jordanem, 1:10, 11:

apud eundem,

A fine trium dierum factum est, cum transirent moderatores per medium castrorum, et praeciperent, ut cum viderent arcam foederis Jehovae, etiam proficiscerentur, 3:2, 3.

Quod ‘moderatores’ fuerint praefecti populi distincti a principibus illius, videatur Deut. 1:15;

quod a senioribus, Deut. 31:28;

et quoque a judicibus, Jos. 8:33.

Poznámky pod čarou: