31
Tu, rex, videbas, et ecce quasi statua una grandis : statua illa magna, et statura sublimis stabat contra te, et intuitus ejus erat terribilis.
Daniel 2:31
Apocalypsis Revelata # 781
781. "Et equorum et rhedarum et corporum, et animas 1 hominum," significat illa omnia secundum intellectum Verbi et doctrinam inde, et secundum bona et vera Sensus literae ejus, quae illis non sunt, quia falsificant et adulterant Verbum, applicando illa quae ibi contra genuinum sensum ejus ad dominium super Caelum et Mundum.--Haec dicuntur in casu genitivo, quia sunt illarum rerum quae praecedunt. Quod per "equos" significetur intellectus Verbi, videatur 298; quod per "currus" significetur doctrina e Verbo, 437, inde simile per "rhedas:" quod per "corpora et animas hominum" significentur bona et vera Sensus literae Verbi, est quia per illa significantur similia quae per Corpus et Sanguinem in Sacra Caena; per "Corpus" in illa significatur Divinum Bonum Domini, et per "Sanguinem" Divinum Verum Domini; et quia significant illa, etiam significant Divinum Bonum et Divinum Verum Verbi, quia Dominus est Verbum: sed pro "sanguine" hic dicitur "anima;" causa est, quia per "animam" pariter significatur Verum (681), et quia sanguis in Verbo dicitur "Anima," (Genesis 9:4-5; Leviticus 17:12-14; Deuteronomius 12:23-25). 2
Simile significatur per "Animam hominis," (Ezechiel 27:13);
tum per "Semen hominis," (Daniel 2:43).
Similia per "equos" et "rhedas" significantur apud Esajam:
'Tunc ducent omnes fratres vestros super equis et super curru et super rhedis, et super mulis et super veredariis ad montem sanctitatis Meae Hierosolymam," (66:20); 3
haec dicuntur de Nova Ecclesia Domini, quae est Hierosolyma, de illis ibi qui in intellectu Verbi et in doctrina inde sunt, quae sunt "equi," "currus," "rhedae."
Nunc quia illi, qui ex Religioso Romano Catholico sunt,
falsificant et adulterant Verbum per applicationem ad dominium super Caelum et Mundum, significatur quod illis non aliqua bona et vera sint ex Verbo, et ideo nec in doctrina illorum. De hoc ita dicit Jeremias:
"Comedit me, conturbavit me Rex Babelis, constituit me vas vacuum, deglutivit me sicut cetus, implevit ventrem suum ex deliciis meis," (Jeremias 51:34); 4
"Gladius contra equos Babelis, et contra currus ejus; et contra thesauros ejus, ut diripiantur; siccitas super aquas ejus, ut exarescant; quia terra sculptilium illa, et de horrendis gloriantur," (Jeremias 50:37-38).
Poznámky pod čarou:
Apocalypsis Revelata # 681
681. "Et factus est sanguis tanquam mortui, et omnis anima viva mortua est in mari," significat apud illos falsum infernale, per quod omne verum Verbi et inde Ecclesiae et fidei, exstinctum est. -Per "sanguinem tanquam mortui" seu per cruorem et saniem significatur falsum infernale; per "sanguinem" enim significatur Divinum Verum, et in opposito sensu illud falsificatum (379); sed per "sanguinem sicut mortui" significatur falsum infernale, nam per "mortem" significatur exstinctio vitae spiritualis, et inde per "mortuum" significatur infernale (321, 525); per quod "omnis anima viva mortua sit" significatur quod omne verum Verbi, Ecclesiae et fidei exstinctum sit; per "animam vivam" enim significatur verum fidei, inde per "animam vivam mortuam" significatur verum fidei exstinctum. Per "animam" in Verbo, ubi de homine, significatur vita spiritualis ejus, quae etiam est vita intellectus ejus; et quia intellectus est intellectus ex veris, et vera sunt fidei, ideo per "animam" significatur verum fidei; quod per "animam" hoc significetur, constare potest ex multis locis in Verbo, et quoque ex illis ubi dicitur "anima et cor." Quod per "animam et cor" intelligatur vita hominis, patet; sed vita ejus est ex voluntate et ex intellectu, aut spiritualiter loquendo est ex amore et sapientia, tum ex charitate et fide; ac vita voluntatis ex bono amoris seu charitatis intelligitur per "cor," ac vita intellectus ex veris sapientiae seu fidei, intelligitur per "animam." Haec per "animam et cor" intelliguntur, Matthaeus 22:37; 1 Marcus 12:30, 33; Luca 10:27; Deuteronomius 6:5; 10:12; 2 11:13; 3 26:16; Jeremias 32:41; et alibi;
etiam in locis ubi "cor" per se, et "anima" per se, dicitur. Quod causa denominationis illorum sit ex correspondentia Cordis cum Voluntate et Amore, ac Animationis Pulmonis cum Intellectu et Sapientia, videri potest in Sapientia Angelica de Divino Amore et Divina Sapientia (Classe Quinta), ubi de correspondentia illa actum est.
Poznámky pod čarou:
