172. De Profano et Profanatione (de qua supra, 169, in Doctrina).

Quod profanatio sit commixtio boni et mali, tum veri et falsi apud hominem (Arcana Coelestia 6348).

Quod profanare bona et vera, seu sancta ecclesiae et Verbi, non possint alii quam qui primum agnoscunt illa, credunt illa, et magis si vivunt secundum illa, ac postea recedunt a fide, non credunt illa, et vivunt sibi et mundo (Arcana Coelestia 593, 1008, 1010, 1059, 3398, 3399, 3898, 4289, 4601, 10284, [8394?], 10287).

Quod qui in pueritia credit vera, et postea non credit, leviter profanet; at quod qui vera apud se postea confirmat, et dein illa negat, graviter profanet (Arcana Coelestia 6960, 6963, 6971, [6959?],.

Quod etiam profanent qui credunt vera et vivunt male; tum qui non credunt vera, et vivunt sancte (Arcana Coelestia 8082 (8882).

Quod homo, si post paenitentiam cordis ad mala priora relabitur, profanet, et quod tunc status ejus posterior sit pejor priori (Arcana Coelestia 8394).

Quod qui in Christiano orbe conspurcant sancta Verbi per immundas cogitationes et loquelas, profanent (Arcana Coelestia 4050, 5390).

Quod varia genera profanationum sint (Arcana Coelestia 10287).

Quod illi sancta profanare non possint qui non agnoverunt illa, minus qui non sciunt illa (Arcana Coelestia 1008, 1010, 2059, 9188, 10284, [10287?],).

Quod qui intra ecclesiam sunt, profanare sancta possint, non autem qui extra (Arcana Coelestia 2051).

Quod gentes, quia extra ecclesiam, et non habent Verbum, non profanare possint (Arcana Coelestia 1327, 1328, 2051, 2081, [9021?],.

Quod nec Judaei sancta interiora Verbi et ecclesiae, quia non agnoscunt illa (Arcana Coelestia 6963).

Quod ideo Judaeis nec detecta fuerint interiora vera, nam si detecta et agnita, profanavissent illa (Arcana Coelestia 3398, 3489, [3479?], 6963).

Profanatio intelligitur per Domini verba supra (169) allata, nempe,

"Quando..immundus spiritus exit ab homine, perambulat arentia loca, quaerens requiem, sed non invenit; tunc dixit, Revertar in domum meam, unde exivi; cumque venit et reperit illam vacuam, et scopis purgatam et ornatam sibi, tunc abit et adjungit sibi septem alios spiritus pejores se et ingressi habitant ibi; et fiunt posteriora hominis pejora primis" (Matthaeus 12:43-45).

Per quod "exeat immundus spiritus ab homine," intelligitur paenitentia illius qui in malo est; per quod "perambulet arentia loca, et non inveniat requiem," intelligitur quod vita boni ei talis sit; per "domum," in quam, quia reperit vacuam et sibi ornatam, revertitur, intelligitur ipse homo et ejus voluntas, quod sit absque bono; per "septem spiritus" quos sibi adjungit, et cum quibus revertitur, intelligitur malum conjunctum bono; per "statum ejus tunc pejorem priori," intelligitur profanatio: hic sensus est sensus internus horum verborum, nam Dominus per correspondentias locutus est. Simile intelligitur per Domini verba ad illum quem sanavit in piscina Bethesda,

"Ecce sanus factus es; ne pecca amplius, ne fiat tibi aliquid quod pejus est quam prius" (Johannes 5:14);

Tum per haec verba,

"Occaecavit oculos eorum, et obduravit corda eorum, ne videant oculis et intelligant corde, et se convertant et sanem eos" (Johannes 12:40):

"se convertere et sanari" est profanare, quod fit cum agnoscuntur vera et bona, et dein rejiciuntur: ita fuisset si Judaei se converterint et sanati fuissent, ut supra dictum est.

Quod sors profanatorum in altera vita omnium pessima sit, quoniam bonum et verum, quae agnoverunt, manent, et quoque malum et falsum; et quia cohaerent fit discerptio vitae (Arcana Coelestia 571, 582, 6348).

Quod ideo a Domino maxime provideatur ne fiat profanatio (Arcana Coelestia 2426, 10384 (10287)).

Quod homo idcirco detineatur ab agnitione et fide, si non ad finem vitae in illis permanere possit (Arcana Coelestia 3398, 4402, [3402?],).

Quod ideo homo teneatur potius in ignorantia, et in cultu externo (Arcana Coelestia 301-303, 1327, 1328).

Quod etiam Dominus vera et bona, quae homo per agnitionem recepit, recondat in interioribus ejus (Arcana Coelestia 6595).

Quod interiora vera, ne profanentur, non prius revelentur quam cum ecclesia in suo fine est (Arcana Coelestia 3398, 3399).

Quapropter Dominus tunc in mundum venit, ac interiora vera aperuit, cum ecclesia prorsus vastata fuit (Arcana Coelestia 3398; videantur quae de his in opusculo De Ultimo Judicio et Babylonia destructa, 73, 74, allata sunt).

Quod per "Babelem" in Verbo significetur profanatio boni, et per "Chaldaeam" profanatio veri (Arcana Coelestia 1182, 1283, 1295, 1304, 1306-1308, 1321, 1322, 1326).

Quod gradibus prohibitis, seu foedis adulteriis, de quibus in Verbo, profanationes illae correspondeant (Arcana Coelestia 6348).

Quod profanatio repraesentata sit per esum sanguinis in Ecclesia Israelitica et Judaica, quapropter id tam severe prohibitum fuit (Arcana Coelestia 1003)