⁵⁶ קולי שמעת אל־תעלם אזנך לרוחתי לשועתי׃

¹ למנצח שיר מזמור הריעו לאלהים כל־הארץ׃

² זמרו כבוד־שמו שימו כבוד תהלתו׃

³ אמרו לאלהים מה־נורא מעשיך ברב עזך יכחשו לך איביך׃

⁴ כל־הארץ ישתחוו לך ויזמרו־לך יזמרו שמך סלה׃

⁵ לכו וראו מפעלות אלהים נורא עלילה על־בני אדם׃

⁶ הפך ים ליבשה בנהר יעברו ברגל שם נשמחה־בו׃

⁷ משל בגבורתו עולם עיניו בגוים תצפינה הסוררים אל־[כ= ירימו] [ק= ירומו] למו סלה׃

⁸ ברכו עמים אלהינו והשמיעו קול תהלתו׃

⁹ השם נפשנו בחיים ולא־נתן למוט רגלנו׃

¹⁰ כי־בחנתנו אלהים צרפתנו כצרף־כסף׃

¹¹ הבאתנו במצודה שמת מועקה במתנינו׃

¹² הרכבת אנוש לראשנו באנו־באש ובמים ותוציאנו לרויה׃

¹³ אבוא ביתך בעולות אשלם לך נדרי׃

¹⁴ אשר־פצו שפתי ודבר־פי בצר־לי׃

¹⁵ עלות מחים אעלה־לך עם־קטרת אילים אעשה בקר עם־עתודים סלה׃

¹⁶ לכו־שמעו ואספרה כל־יראי אלהים אשר עשה לנפשי׃

¹⁷ אליו פי־קראתי ורוםם תחת לשוני׃

¹⁸ און אם־ראיתי בלבי לא ישמע אדני׃

¹⁹ אכן שמע אלהים הקשיב בקול תפלתי׃

²⁰ ברוך אלהים אשר לא־הסיר תפלתי וחסדו מאתי׃