2643. ‘Quis dixisset Abrahamo, Lactabit filios Sarah?’: quo significet quod Dominus propria potentia implantaverit Humanum Divino, constat ex repraesentatione ‘Abrahami’, tum ‘Sarae’, et significatione ‘lactare’ et ‘filiorum’; quod ‘Abraham’ repraesentet Divinum Bonum, et ‘Sarah’ Divinum Verum, ostensum est; quo ‘lac’ sit spirituale ex origine caelesti, seu verum ex bono, videatur n. 2184, ita ‘lactare’ est implantare illud; quod ‘filii’ sint vera, hi quae in Rationali, constat ex significatione ‘filiorum’, n. 489-491, 531 quod haec in sensu interno significent quod Dominus ex propria potentia 1 Humanum implantaverit Divino, est quia Divinum Verum est idem ac Divinum Humanum, de quo cum dicitur quod ‘lactet filios Abrahamo’, significatur quod Humanum implantaverit Divino, et quia Humanum, est ex propria potentia: sed haec aegre queunt clarius ad intellectum explicari; si pluribus, obscurescet sensus adhuc magis, nam sunt Divina, quae solum coram angelis per caelestia et spiritualia sisti queunt; si coram homine aliquo stilo elevatiore, caderent in ideas materiales et corporeas quas homo habet 2 .
[2] Praeterea sciendum, quod Divinum Rationale Domini quoad quale cum primo natum est describatur his verbis, ‘Risum fecit mihi Deus, omnis audiens ridebit mihi: et dixit, Quis dixisset Abraham, Lactabit filios Sarah?’ e more antiquo enim fuit, cum nasceretur infans, quod nomen significativum status inderetur, et quod status tunc quoque describeretur, sicut cum Cain nasceretur Havae et Adamo, Gen. 4:1;
cum Sheth illis, Gen. 4:25;
cum Noah Lamecho, Gen. 5:29;
cum Esavus et Jacobi Isaco, Gen. 25:25, 26;
cum duodecim filii Jacobo, Gen. 29:32-3:30:6, 8, 11, 13, 18, 20, 24; 35:18;
cum Perez et Zerah Tamari Gen. 38:29, 30;
cum Menasheh et Ephraim Josepho, Gen. 41:51, 52;
cum Gershom et Eliezer Mosi, Exod. 2:22; 18:4: quid hi omnes repraesentant, et quid significant in sensu interno, descriptioni adjunctae nomini quod indebatur, involutum est; ita hic quid Jishak; quid autem involvitur, patet aliquantisper a summaria explicatione, sed arcaniora usque recondita sunt, nam sunt Divina, quae nullis formis et formulis vocum expressibilia sunt.
Poznámky pod čarou:
1. The following two (or in some cases more) words are transposed in the Manuscript.
2. The Manuscript inserts in quibus nihil lucis talium.
