Hlazy 77

Study

          |

1 Ei ao ta Khazohpa cha aw aw na ta, ei ao ta Khazohpa tlai cha aw awna ta, ano chata kei lâta nah a pachôh aw.

2 Ei nôpo noh liana chata Abeipa tluana ta; ei ku he zâ ta chhao pathla leipa ta pazawh thlu ha na ta; thlahlôhna deikua hmô thei va na.

3 Khazohpa a thei thlâh ha na ta, ei tymâ tyh; pachâ na ta, palôh nouh-mâpa ta ei y. Selah

4 A mô thei leipa ta na tao ta; rei thai leina taihta ei nô a po tyh.

5 Hlâno nohzy pachâ na ta, zâkhano kôzy cha.

6 Zâ ta cha a tha tlaita pachâna ta hmâhna ta, pachâ na ta, keimasasyh ta hetana heta ei hiahri:

7 “ABEIPA chata chhâzaw ta a thy pathla aw ma? Keima liata aly heih khao aw vei ma?

8 A zawngiahna cha chhâzaw ta a lei pathla aw ma? A bietai cha chhâ zydua taihta a lei aw ma?

9 Khazohpa chata ngiachhie awpa ta amy ma? Pathi-iapa ta a zawngiahna tha pasana zy cha a khaw ha ma?” Selah

10 Chatawhcha, “He he ei palôh na chakhei chaipa cha a châ, Khazohpa cha hmotao thei ngâthlâh leipa a châ,” tahpa hih.

11 ABEIPA hmo taona kyh zy kha a thei thlâh aw na ta; hlâno ta na hmonoâh taopazy kha ei thei thlâh ha aw na.

12 Na raihria zydua kha pachâ hra aw na ta, na hmotaopazy chhao kha ei laichadai aw na.

13 Hy Khazohpa, na hmotaopa to cha pathaihpa châ ta. Eima Khazohpa hawhpa he khazoh rôhnahpa ahy e a y?

14 Nâ cha hmonoâhpa a tao tyhtuhpa Khazohpa cha châ chi ta, pho to hry liana zy chata na thatlôna zie na pahnosa tyh.

15 Na bâh ta na chyhsa zy chatlai chi ta, Zakaw nata Zawsi pathlazy cha. Selah

16 Hy Khazohpa, tizy chata cha hmô ei ta, tizy chata a cha hmô ei, chi ei ta, ti athuh ngaitapa zy cha a chalyu hra ei ta.

17 Meihdozy khita ti leihtha ei ta; avâzy khita ama ao papua ei ta; na châtaizy chhao pathlie ngâ ta.

18 Na tôkalô a thuapa pyu cha khisô liata y ta; dôhlazy chata khizaw he pakhai ngâ ta; alei he a chalyupa ta a chatho ngâ.

19 Na lâpi cha tilaipi liata y ta, na lâthlôhzy cha ti kawh ngaitapa liata y ta; na hniezy chhao pahnopa châ vei.

20 Mawsi nata Arawna ku ta na chyhsa zy cha mietahkuvaituhpa hawhta a chhi tyh chi ta.

Scroll to see more.