Hlazy 77

¹ Ei ao ta Khazohpa cha aw aw na ta, ei ao ta Khazohpa tlai cha aw awna ta, ano chata kei lâta nah a pachôh aw.

² Ei nôpo noh liana chata Abeipa tluana ta; ei ku he zâ ta chhao pathla leipa ta pazawh thlu ha na ta; thlahlôhna deikua hmô thei va na.

³ Khazohpa a thei thlâh ha na ta, ei tymâ tyh; pachâ na ta, palôh nouh-mâpa ta ei y. Selah

⁴ A mô thei leipa ta na tao ta; rei thai leina taihta ei nô a po tyh.

⁵ Hlâno nohzy pachâ na ta, zâkhano kôzy cha.

⁶ Zâ ta cha a tha tlaita pachâna ta hmâhna ta, pachâ na ta, keimasasyh ta hetana heta ei hiahri:

⁷ “ABEIPA chata chhâzaw ta a thy pathla aw ma? Keima liata aly heih khao aw vei ma?

⁸ A zawngiahna cha chhâzaw ta a lei pathla aw ma? A bietai cha chhâ zydua taihta a lei aw ma?

⁹ Khazohpa chata ngiachhie awpa ta amy ma? Pathi-iapa ta a zawngiahna tha pasana zy cha a khaw ha ma?” Selah

¹⁰ Chatawhcha, “He he ei palôh na chakhei chaipa cha a châ, Khazohpa cha hmotao thei ngâthlâh leipa a châ,” tahpa hih.

¹¹ ABEIPA hmo taona kyh zy kha a thei thlâh aw na ta; hlâno ta na hmonoâh taopazy kha ei thei thlâh ha aw na.

¹² Na raihria zydua kha pachâ hra aw na ta, na hmotaopazy chhao kha ei laichadai aw na.

¹³ Hy Khazohpa, na hmotaopa to cha pathaihpa châ ta. Eima Khazohpa hawhpa he khazoh rôhnahpa ahy e a y?

¹⁴ Nâ cha hmonoâhpa a tao tyhtuhpa Khazohpa cha châ chi ta, pho to hry liana zy chata na thatlôna zie na pahnosa tyh.

¹⁵ Na bâh ta na chyhsa zy chatlai chi ta, Zakaw nata Zawsi pathlazy cha. Selah

¹⁶ Hy Khazohpa, tizy chata cha hmô ei ta, tizy chata a cha hmô ei, chi ei ta, ti athuh ngaitapa zy cha a chalyu hra ei ta.

¹⁷ Meihdozy khita ti leihtha ei ta; avâzy khita ama ao papua ei ta; na châtaizy chhao pathlie ngâ ta.

¹⁸ Na tôkalô a thuapa pyu cha khisô liata y ta; dôhlazy chata khizaw he pakhai ngâ ta; alei he a chalyupa ta a chatho ngâ.

¹⁹ Na lâpi cha tilaipi liata y ta, na lâthlôhzy cha ti kawh ngaitapa liata y ta; na hniezy chhao pahnopa châ vei.

²⁰ Mawsi nata Arawna ku ta na chyhsa zy cha mietahkuvaituhpa hawhta a chhi tyh chi ta.