Theihthaina 15

¹ ABEIPA ta Mawsi nata Arawna hnohta.

² Izarel pathlazy cha chho ula, amo hnohta, ‘Chapaw ahyrai a sapa tawhta khâpaleipa a lohpa vâna chata pathaih leipa a châ.

³ A loh chhôh zydua cha pathaih leipa a châ, a sapa liana chata a loh ngâthlâh ha tlyma, a lohpa cha a yzie tlyma rai châsala, pathaih leipa a châ.

⁴ A lohpa ziana rakhô maihta cha pathaih leipa châ aw ta; â tyuna maihta cha pathaih leipa a châ hra aw.

⁵ Ahyrai a rakhô a hriapa maih chata ama pohzy pasu aw ei ta, ti liata ama ngai amâ si awpa châ ta, zâlâ taihta pathaih leipa ama châ aw.

⁶ A lohpa a tyuna liata a lyupa maih chata ama pohzy pasu aw ei ta, ti liata ama ngai amâ si awpa châ ta, zâlâ taihta pathaih leipa ama châ aw.

⁷ Ahyrai a lohpa sapa cha a hriapa maih chata ama pohzy pasu aw ei ta, ti liata ama ngai amâ si awpa châ ta, zâlâ taihta pathaih leipa ama châ aw.

⁸ Chatawhcha a lohpa chata chyhsa pathaihpa a pachih ta a pachhao khiahtala, a pohzy pasu aw ta, ti liata a ngai â si awpa châ ta, zâlâ taihta pathaih leipa a châ aw.

⁹ A lohpa chyhsa kiana maih cha pathaih leipa a châ aw.

¹⁰ Ahyrai â hniehna chiehpa hmo a hriapa maih cha, zâlâ taihta pathaih leipa ama châ aw; cha hmozy a pasituhpa maih chata ama pohzy pasu aw ei ta, ti liata ama ngai amâ si awpa châ ta, zâlâ taihta pathaih leipa ama châ aw.

¹¹ Chatawhcha ahyrai a lohpa chata ti liata a ku pasi leipa ta a hriapa maih chata ama pohzy pasu aw ei ta, ti liata ama ngai amâ si awpa châ ta, zâlâ taihta pathaih leipa ama châ aw.

¹² Chatawhcha a lohpa alei beih hria chiehpa cha pakei awpa a châ; tho hmobao zydua cha ti liata pasi khai awpa a châ.

¹³ Chatawhcha a lohpa cha, a lohpa pathaipa a châ khiahtala, a pathai nawpa ta noh sari a rao aw ta, a pohzy pasu aw ta, chavah ti liata a ngai a si aw ta, a vaw pathaih ha aw.

¹⁴ Chatawhcha a noh charie noh chata vachhuh pô no tlyma, pivaw pô no tlyma cheipa ta, ABEIPA hmiakô liata ahmaohpakhyna poh-o chhikao kiapâh lâta vawh aw ta, theihthaipa a pie awpa a châ.

¹⁵ Chatawhcha theihthaipa chata moleina hlâna châta pô kha raopa hlâna châta pô kha a hlâ awpa a châ; theihthaipa chata a lohpa kyh châta ABEIPA hmiakô liata aryhna a taopa aw.

¹⁶ Chatawhcha ahyrai chi ano tawhta a pua khiahtala a pôhpa dua ta ti liata a ngai a si khai awpa châ ta, zâlâ taihta pathaih leipa a châ aw.

¹⁷ Chysia zy, vo zy, chi yna mai cha pasupa ta, ti liata pasi khai awpa châ ta, zâlâ taihta pathaih leipa a châ aw.

¹⁸ Chatawhcha chanô â ziakheipa chhaota, ama pano ta, ti ta ama ngai amâ si rairieh awpa châ ta, zâlâ taihta pathaih leipa ama châ aw.

¹⁹ Chatawhcha chanô ta khâpaleipa lohpa hneipa ta, a sapa liata a lohpa cha thi a châ khiahtala, noh sari chhôh cha pathaih leipa a châ aw, ahyrai ano a hriapa maih cha zâlâ taihta pathaih leipa ama châ aw.

²⁰ Chatawhcha a pathaih lei chhôhta â ziana maih cha pathaih leipa châ aw ta; â tyuna maih chhao pathai leipa a châ hra aw.

²¹ Ahyrai a rakhô a hriapa maih chata ama pohzy pasu aw ei ta, ti liata ama ngai amâ si awpa châ ta, zâlâ taihta pathaih leipa ama châ aw.

²² Ahyrai â tyuna a hriapa maih chata ama pohzy pasu aw ei ta, ti liata ama ngai amâ si awpa châ ta, zâlâ taihta pathaih leipa ama châ aw.

²³ Rakhô liata hmo a ypa tlyma, a tyuna liata hmo a ypa tlyma, a hriapa maih cha, zâlâ taihta pathaih leipa ama châ aw.

²⁴ Chapaw ahyrai â ziakheipa ta a pathaih leina cha â hlao khiahtala noh sari pathaih leipa châ aw ta; â ziana rakhô maih cha pathaih leipa a châ aw.

²⁵ Chanô a pathaih leina daihti tyhpa châ leipa ta, noh hluhpi a thi a loh tlyma, a pathaih leina yzie tyhpa hlâta noh hluh via ta a thi a loh tlyma khiahtala, a pathaih leina yzie tyhpa chhôhta a y tyhpa hawhta thi lohpa ta a pathaih lei chhôh zydua chata a y hra awpa a châ; pathaih leipa a châ.

²⁶ A thi loh chhôh zydua ta, â ziana rakhô maih cha a pathaih leizie tyhpa daihti nota a rakhô hawhta châ aw ta, â tyuna maih cha, a pathaih leina yzie tyhpa daihti nota a pathaih leipa hawhta, pathaih leipa a châ aw.

²⁷ Ahyrai cha hmozy a hriapa maih cha pathaih leipa châ aw ta, ama pohzy pasu aw ei ta, ti liata ama ngai amâ si awpa châ ta, zâlâ taihta pathaih leipa ama châ aw.

²⁸ Anodeikuacha a thi lohpa cha pathaisapa a châ khiahtala noh sari a rao aw ta, cha khai tawhna chata a vaw pathaih ha aw.

²⁹ Chatawhcha a noh charie noh ta, vachhuh pô no tlyma, pivaw taw pô no tlyma cheih aw ta, ahmaohpakhyna poh-o chhikao liata theihthaipa a vaw pie awpa a cha.

³⁰ Chatawhcha theihthaipa ta moleina hlâna châta pô kha, raopa hlâna châta pô kha a hlâ awpa a châ; chatanachata theihthaipa chata thi lohpa ta a pathaih leina kyh liata ABEIPA hmiakô liata aryhna a taopa aw.

³¹ He hawhna heta Izarel pathlazy cha ama pathai leina tawhtapa cha a panano awpa a châ, ama hry liata ei achhyna byureih ama papua palei no chhaota ama pathaih leina vâta ama thi lei nawpa ta,

³² He he khâpaleipa a lohpazy nata pathaih leina taihta chi a puapazy châta ryhpa cha a châ.

³³ ama pathaih leina vâta a tlâh leipazy chapaw, chanô, khâpaleipa a lohpa sahlaozy, chanô ama pathaih lei nota a ziakheituhpazy châta chhao,” tahpa ta chho ta.