Theihthaina 14

Studie

         |

1 ABEIPA ta Mawsi hnohta,"

2 He he phawhpa a pathai noh liata a taona ryhpa awpa cha a châ aw. Theihthaipa lâta a chhi awpa châ ta;

3 theihthaipa cha ariena su khôtho lâ pua aw ta a moh aw. Chatawhcha phawhpa cha a phawhna hri a tlâ khiahtala,

4 theihthaipa chata a pathai awpa cha pavaw hropa pathaihpa pô no nata sidy tho nata pala saihpa nata hisaw chei pa awpata bie pie aw ta;

5 theihthaipa chata pavaw pô kha cha alei beih liata chavah ti chô liata thie awpata bie pie aw ta.

6 Pavaw hropa cha, sidy tho zy, pala saihpa zy, hisaw zy, pavaw hropa chhao chata cheih aw ta, chavah chô liata pavaw thiepa thisaih liana chata ny khai aw ta;

7 phawhna tawhtapa a pathai awpata ei sari hie aw ta, a pathaih tahpa phuah aw ta, pavaw hropa cha lyurâhpa liata a pathlie aw.

8 Chatawhcha a pathai awpa châ ta, a pohzy pasu aw ta, a hmi zydua ngyu khai aw ta, a ngai a si aw ta, a vaw pathaih aw; cha khai tawhna chata ariena su lâta vawh aw ta, anodeikuacha a poh-o khôtho liata noh sari a y awpa a châ.

9 Chatawhcha a noh sari nohna chata a luh sa zydua nata a kâhmi nata a mokhitlâh hmi zy ngyu khai aw ta, a hmi zydua a ngyu khai aw, a pohzy pasu aw ta, ti liata a ngai a si awpa a châ, chatanachata a vaw pathaih ha aw.

10 Noh charie noh chata mietahkupa taw a chapawpa pô no, seina hnei leipa nata mietahkupa taw a chanôpa pô kha seina hnei leipa kô khapa nata niepa hlâna châta viahdie di ngaitapa ephah su hraw pachhai ta su thôh sathaw ta nypa nata sathaw log* kha a chei awpa a châ.

11 Chatawhcha a pathaituhpa theihthaipa chata a pathai awpa nata cha hmozy cha, ahmaohpakhyna poh-o chhikao kiapâh liata ABEIPA hmiakô liata soh aw ta,

12 theihthaipa chata mietahkupa taw chapawpa pô kha cha, sathaw log kha nahta la aw ta, paraopa hlâna châta hlâ aw ta, ABEIPA hmiakô liata niepa hlâna châta a hie awpa a châ;

13 moleina hlâna nata raopa hlâna ama thie tyhna su, su pathaihpa liana chata mietahkupa taw chapawpa cha a thie awpa a châ; moleina hlâna cha theihthaipa tovyuh a châpa hawhta paraopa hlâna chhao cha theihthaipa tovyuh châ tlôh ta, pathaih ngaitapa a châ.

14 Theihthaipa chata paraopa hlâna thisaih cha la aw ta, a pathai awpa nahkao chachâh lâ pawhmao liata zy, a ku chachâh lâ kupi liata zy, a phei chachâh lâ pheipi liata zy, theihthaipa chata a hnia aw.

15 Chatawhcha sathaw log kha liatahpa cha theihthaipa chata la aw ta, ano chavei lâ pazah liata soh aw ta,

16 a ku chavei lâta sathaw chata ABEIPA hmiakô liata a kudy ta ei sari hie aw ta.

17 Chatawhcha a ku liata sathaw a ypa zydua chata a pathai awpa nahkao chachâh lâ pawhmao zy, a ku chachâh lâ kupi zy, a phei chachâh lâ pheipi zy liata paraopa hlâna thisaih chô lianazy chata hnia aw ta.

18 theihthaipa chata a ku liata sathaw a ypa zydua chata a pathai awpa luh hnia aw ta. Chatawhcha theihthaipa chata ABEIPA hmiakô liata aryhna a taopa awpa a châ.

19 Chatawhcha theihthaipa chata moleina hlâna cha hlâ aw ta, a pathaih leina vâta a pathai awpa cha aryhna taopa aw ta. Cha khai tawhna chata raopa hlâna cha a thie aw.

20 theihthaipa chata raopa hlâna nata niepa hlâna cha maisâh liata hlâ aw ta. Theihthaipa chata aryhna taopa aw ta, a vaw pathaih ha aw.

21 Chatawhcha sipasapa châ sala cha hawhpa cha a tloh leipa khiahtala, mietahkupa taw chapawpa pô kha paraopa hlâna aryhna tao nawpa ta hie awpa nata niepa hlâna châta viadie di ngaitapa ephah su hrawh pachhaih ta su kha, sathaw pahlaopa sathaw log kha chhaota cheih aw ta.

22 vachhuh pô no tlyma, pivaw taw pô no tlyma, a hnei viapa thithaw; pô kha cha moleina hlâna, pô kha cha raopa hlâna ta a châ aw.

23 Noh charie noh ta a pathai nawpata theihthaipa hnohta ahmaohpakhyna poh-o chhikao kiapâh liata ABEIPA hmiakô liata a vaw cheih awpa a châ.

24 theihthaipa ta paraopa hlâna mietahkupa taw nata sathaw log kha cha la aw ta, hiepa hlâna ta ABEIPA hmiakô liata theihthaipa chata paraopa hlâna cha a hie aw.

25 Paraopa hlâna chata mietahkupa thie aw ta, theihthai ta paraopa hlâna thisaih cha la aw ta, a pathai awpa nahkao chachâh lâ pawhmao liata zy, ku chachâh lâ kupi liata zy, a phei chachâh lâ pheipi liata zy a hnia aw.

26 Chatawhcha theihthaipa chata sathaw cha ano ku pazah chavei lâ liata patlai aw ta.

27 a ku chavei lâta sathaw cha ku chachâh lâta ABEIPA hmiakô liata ei sari hie pa aw ta;

28 theihthaipa chata a ku liata sathaw chata a pathai awpa nahkao chachâh lâ pawhmao zy, a ku chachâh lâ kupi zy, a phei chachâh lâ pheipi zy liata paraopa hlâna thisaih a hniana su liana chata a hnia aw.

29 theihthaipa ku liata sathaw a laibâhpa zydua chata ABEIPA hmiakô liata aryhna taopa nawpata a pathai awpa luh cha a hnia awpa a châ.

30 Chatawhcha vachhuh tlyma, pivaw taw tlyma, a hnei theipa thithaw pô kha cha hlâ aw ta.

31 a hnei theipa thithaw moleina hlâna châta pô kha, raopa hlâna châta pô kha, niepa hlâna chhaota; chatawhcha theihthaipa ta a pathai awpa cha, ABEIPA hmiakô liata aryhna a taopa aw.

32 He he phawhpa hri a ohpa a pathaina ryhpa hawhta a tloh leipazy châta ryhpa a châ,” tahpa ta.

33 ABEIPA ta Mawsi nata Arawna hnohta.

34 “Pahrâ awpata ei cha piepa ei, Kana râh namâ ngia tita, nama pahrâ awpa râh, kheihhawpa o liata rai phawhpa hri ei soh khiahtala,

35 cha o hneituhpa chata, ‘He o liana heta hri a lyu ngaitapa a ypa hawhta ei pahno,’ tahpa ta, theihthaipa a chho awpa a châ.

36 Chatawhcha theihthaipa cha hri moh awpa ta â ngia hlâta, a chhôh liata hmo a ypa zydua cha, pathaih leipa a châ lei nawpa ta o cha parua awpa ta theihthaipa ta bie pie aw ta; cha khai tawhna chata theihthaipa cha o moh awpa ta â ngia aw.

37 Chatawhcha hri cha moh aw ta; hri chata a hrohpa ta tlyma, a saihpâpa ta tlyma ta, pâchhôh nie haw ta, pâchhôh hlâta â thuhpa ta â lâ khiahtala.

38 theihthaipa cha o tawhtapa chhikao liata pua aw ta, o cha noh sari a khaw aw.

39 Chatawhcha noh sari noh ta theihthaipa chata moh heih aw ta; hri cha o pâchhôh liata a kawh khiahtala

40 hri yna alôzy cha lapa ta, khihpi khôtho lâ su pathaih leipa liata thy awpa ta, theihthaipa chata bie pie aw ta;

41 o chhôh cha pahaosa aw ta, chatawhcha alô baina ama haopa cha, khihpi khôtho lâ su pathaih leipa liata patlai aw ei ta.

42 alô hropa la aw ei ta, cha alôzy su liana chata ama soh aw, chatawhcha alô baina hropa la aw ta, o cha a bai aw.

43 Alô lapa ta, o cha haopa ta, a bai khai tawhta hri cha o liata a vaw pua heih khiahtala.

44 theihthaipa cha a ngia aw ta a moh heih aw; hri cha o liata a vaw kawh khiahtala, cha o liata phawhpa cha a kawh ngâpa chi châ ta; pathaih leipa a châ.

45 O cha phi aw ta, alôzy, a thozy, alô baina zydua chhao; khihpi khôtho lâta su pathaih leipa liata a paly aw.

46 Ahyrai cha o khaw chhôh ta a ngiapa cha, zâlâ taihta pathaih leipa ama châ aw.

47 Chatawhcha ahyrai cha o liata a ziapa maih chata, ama pohzy pasu aw ei ta; ahyrai cha o liata pati a niepa maih chata, ama pohzy ama pasu awpa a châ.

48 Chatawhcha theihthaipa cha a ngiapa ta, mohpa ta, o cha a phapa ta baipa a châ tawhta, hri cha a kawh leipa khiahtala, o cha a pathaih tahpa theihthaipa ta a phuah aw, hri cha a pai hawpa vâta.

49 Chatawhcha a pathaina awpa ta pavaw pô no nata sidy tho nata pala saihpa nata hisaw cheih aw ta.

50 pavaw pô kha cha alei beih liata chavah ti chô liata thie aw ta.

51 sidy tho nata hisaw nata pala saihpa nata pavaw hropa cha la aw ta, pavaw thie chiehpa thisaih liata nata chavah ti liana chata ny aw ta, o cha ei sari a hie aw.

52 Chatawhcha o cha pavaw thisaih zy, chavah ti zy, pavaw hropa zy, sidy tho zy, hisaw zy, pala saihpa zy ta a pathai aw.

53 pavaw hropa deikua cha khihpi tawhta lyurâhpa lâta a pazaw awpa a châ, cha hawhna chata o châta aryhna taopa aw ta, chatanachata a vaw pathaih ha aw.

54 He he phawhpa hri chi to nata riatha kyh liata ryhpa cha a châ,

55 pôh liata phawhpa a ypa nata o liatahpa zy.

56 a byuhpa zy, riatha zy, a pabôpa kyh zy liata chhao,

57 a pathaih leipa nata a pathaihpa pahnona awpa ta, he he phawhpa kyh liata ryhpa cha a châ,” tahpa ta chho ta.