Ryureihtuhpazy 20

¹ Izarel pathla zydua cha pua chaimâh ei ta, reih kha tlapa ta Dana khih tawhta Besheba khih taihta Kilia râh liata chyhsa zy chhaota Mizpah khih liata ABEIPA lâta a pakhy ei ta.

² Chatawhcha chyhsa zydua, hyutuhpa zy, Izarel chi zydua taih chhao cha Khazohpa chyhsa zy pakhyna liana chata a hlao ei ta, pheisaih zaozi a chabapa thy sypalih châ ei ta.

³ (Benzami pathlazy chata Izarel pathlazy cha Mizpah khih lâta ama khy tahpa vaw thei ei ta). Izarel pathlazy chata, “Kheihtazie ta ma he hawhta hmoparaona he a vaw y tly, maniah chho teh u?” tah ei ta.

⁴ Chatawhcha Livai chi, chanô ama thiepa vahpa chata, “Benzami chizy yna Kibia khih liata ei nôthonô nata a rie a chhuahpa ta a ngia pi ta.

⁵ Chatawhcha Kibia mozy chata nâ vaw dyuh ei ta, zâ ta o vaw dôh ei ta; thie nâ chhuah ei ta, ei nôthonô cha thata taochhie ei ta, thie haw ta.

⁶ Chatawhcha ei nôthanô ri cha la na ta, pachhaih na ta, Izarel mo râh pahrâpa zydua lâta paphao na ta; Izarel râh liana heta hmo pasichhi ngaitapa nata rarôy ngaitapa tao haw tlôh ei ta.

⁷ Nâmo Izarel pathlazy saih u, nama zydua ta pachâ teh u, nama pachâna zie nata nama paryhsana zie cha reih teh u,” tah ta.

⁸ Zawpi zydua cha reih kha tlapa ta thyu ei ta, “Ahyhmah ta eima poh-o lâta a di leipa aw pi ta, ahyhmah ta eima o lâta a ngia hra aw ma pi.

⁹ Kibia mozy eima taona zie awpa cha he hawhna he a châ: pachaopa ta eima khy hnao aw.

¹⁰ “Izarel mozy chô liata hmo do lei ngaitapa ama taona zie lymâ hawhta taopa ta, Kibia su liata Benzami mo eimâ dyuhna liata zawpi zy nie awpa a luahtuhpa chata, Izarel pho zydua hry liatahpa za kha liata pahrawh lymâ, sâh kha liata za kha lymâ, thy kha liata sâh kha lymâ eimâ tlyh aw,” tah ei ta.

¹¹ Chahawhna chata Izarel mo zydua cha reih kha tlapa ta cha khihpi adyuh awpa ta a pahmaohpakhy ei ta.

¹² Izarel phozy chata Benzami pho zydua hnohta, “Nama hry liata he hawhta moleina a vaw ypa he, kheihta zie ta e a châ?

¹³ Kibia khih liata moleipa sawzy cha a vaw chhi teh u, chatanachata Izarel râh liata moleina he a lei thei nawpa ta eima thie aw na,” tahpa ta chyhsa tuah ei ta. Châhrasala Benzami chizy chata ama unawhpa Izarel pathlazy bie reipa cha a pyh khoh leipa ei ta.

¹⁴ Benzami pathlazy cha, Izarel pathlazy a dyuh awpa ta khihpi zy tawhtapa cha pua ei ta, Kibia khih liata a pahmaohpakhy ei ta.

¹⁵ Cha noh liata Benzami pathlazy khihpi tawhtapa zaozi chabapa ta a puapa sahlao cha Kibia khih liata chyhsa za sari a tlypa rei leipa ta, thy no nata sâh charu ama châ.

¹⁶ Cha zydua hry liata chaveipa za sari a tlypa y ei ta; ama zydua ta vawna ta sâbu tie chhao a chhei leipa ama châ.

¹⁷ Izarel mo cha Benzami mozy rei leipa ta zaozi a chabapa sai ta thy sypalih ama châ; cha zydua cha a dyuhpa chyhsa sai ama châ.

¹⁸ Izarel pathlazy cha thyu ei ta. Bethel lâ khy ei ta, Khazohpa a chhohia ei ta, Benzami pathlazy cha, “Ahyma a dyuh tua aw tly?” tah ei ta. ABEIPA ta, “Zudah mo sie tua ei se,” tah ta.

¹⁹ Chatanachata Izarel pathlazy cha myta thyu ei ta, Kibia khih cha dôh ei ta.

²⁰ Izarel mozy cha Benzami sahlao adyuh awpa ta pua ei ta; Izarel mozy chata Kibia khih liana chata adyuh awpa ta a pachyh ei ta.

²¹ Benzami pathlazy cha Kibia tawhtapa cha pua ei ta, cha noh liana chata Izarel mozy hry liata chyhsa thy no nata sâh no vaw thie ei ta.

²² Chatawhcha zawpi sahlao Izarel mozy cha a pasyu heih ei ta, amâ dyuh tua nota amâ dyuhna su liana chata adyuh awpa ta a pachyh heih ei ta.

²³ Izarel pathlazy cha khy ei ta, ABEIPA hmiakô liata zâlâ taihta kaw châh ei ta; “Eima unawhpa Benzami pathlazy he adyuh awpa ta eimâ thao heih aw mâ?” tahpa ta ABEIPA hiahri ei ta. Chatawhcha ABEIPA chata, “Adyuh heih teh u,” tah ta.

²⁴ Chatawhcha a noh no nota Izarel pathlazy chata Benzami pathlazy cha a kei hnia ei ta.

²⁵ Benzami sahlao chhao cha, a noh no chata adyuh awpa ta Kibia khih tawhtapa cha pua hra ei ta, Izarel pathlazy hry liatahpa thy kha nata sâh charie vaw thie ha heih ei ta; cha zydua cha zaozi a chabapa ama châ.

²⁶ Chatanachata Izarel pathla zydua nata zawpi sahlao zydua cha khy ei ta, Bethel lâta khy ei ta, cha ei ta; ABEIPA hmiakô liata a tyuh ei ta, cha noh liana chata zâlâ taihta nie leipa ta y ei ta, ABEIPA lâta raopa hlâna nata adyhna hlâna zy hlâ ei ta.

²⁷ Izarel pathlazy chata ABEIPA a chhohia ei ta, (cha nona chata cha liana cha Khazohpa Biehrai Byh cha y ta,

²⁸ cha nona chata Arawna saw Eliaza sawchapawpa Phineha chata chakao tyh ta, “Eima unawhpa Benzami pathlazy cha eimâ dyuh heih aw mâ, eima bâhsai aw ma?” tahpa ta. Chatawhcha ABEIPA ta, “Khy teh u; mylâ la nama ku liata ei cha pie aw ei,” tah ta.

²⁹ Chatawhcha Izarel sahlaozy chata Kibia khih chheipâh liana chata a byhtuhpa a ru lâta a soh ei ta.

³⁰ Izarel pathlazy cha Benzami pathlazy adyuh awpa ta noh thôh noh ta a thao heih ei ta, noh hro hawhna khata Kibia khih adyuh awpa ta a pachyh heih ei ta.

³¹ Benzami pathlazy cha chyhsa zy adyuh awpa ta pua ei ta, khihpi cha puasai ei ta; chatanachata noh hro hawhna hra khata chyhsa zy cha adyuhpa ta thie pathao heih ei ta, sibiepa su Bethel khih khyna nata Kibia khih lâpi lâlai zy liana chata Izarel mozy cha sythôh thie ei ta.

³² Chatawhcha Benzami pathlazy chata, “Hmialâ hawhna khata eima hmiakô liata ama nawh haw,” tah ei ta. Izarel pathlazy deikua chata, “A râ ei suh u, khihpi tawhtapa he lâlai lâta papua ei suh u,” tah ei ta.

³³ Chatanachata Izarel sahlao zydua chata amâ pachyna su cha puasai ei ta, Baaltama su liata a pachyh heih ei ta; Izarel sahlao a ru lâta a byhtuhpa zy kha, amâ byhna su Marekeba su tawhtapa vaw pua ei ta.

³⁴ Izarel sahlao zydua hry ta a tlypa thy kha ta Kibia khih cha a dyuh ei ta, ama dyuhpa cha a ru ngai ta, châhrasala âmo chata âmo tovyuh a chhie aw tahpa pahno veih ei.

³⁵ ABEIPA ta Benzami sahlao cha Izarel sahlao zy hmiakô liata thata thie ta; Izarel pathlazy chata cha noh liana chata Benzami sahlao cha chyhsa thy no nata sâh pangawh nata za kha pahleipadia ei ta; cha sahlao zydua cha zaozi a chabapa sai ama châ.

³⁶ Chatanachata Benzami pathlazy chata ama nawh haw tahpa a pahno ei ta. Izarel pathlazy chata Kibia khih adyuh awpa ta a ru lâta a byhtuhpa zy ama sopa kha ama ngâpa vâta Benzami sahlao cha amâ sysaipa a châ.

³⁷ Chatawhcha a ru lâta a byhtuhpa zy chata Kibia khih cha sôkha ta thyuhnao ei ta; chatanachata a ru lâta a byhtuhpa zy cha pua hnao ei ta, khihpi liatahpa zydua zaozi ta adyuh ei ta.

³⁸ Izarel sahlao zy nata a ru lâta a byhtuhpa zy khata bie amâ taina cha khihpi chhôh liata meikhu pakhu ngâpa a châ,

³⁹ Izarel sahlaozy cha hnôh lâ a sy chy ei ta. Chatanachata Benzami sahlao chata adyuh pathao ei ta, Izarel mozy cha sythôh thie ei ta; “Eimâ dyuh tua no hawhna khata, eima hmiakô liata ama nawh haw heih hih,” tah ei ta.

⁴⁰ Châhrasala khihpi chhôh liana chata meikhuh a vaw duah pata nahta Benzami sahlao cha ama hnôh lâ a heih ei ta; khihpi cha a ualua ta avâ lâta a khuh a charih ngâ ta.

⁴¹ Chatanachata Izarel sahlao zy cha vaw kua hnao heih ei ta; Benzami sahlao chata ama noâh ngaita ta, ama tovyuh a chhie aw tahpa pahno haw tlôh ei ta.

⁴² Chavâta Izarel sahlaozy hmiakô liana chata râhpathohpa lâta a râpai ei ta; châhrasala a chadai lymâ ei ta, khihpi tawhta a vaw puapa zy chata, cha liana chata vaw thie ei ta.

⁴³ Benzami mozy cha liahsa dôh haw ei ta, a chadai ei ta, nohchhina lâ Kibia daih lâ amâ pahâna su liata pha ei ta.

⁴⁴ Benzami sahlao cha chyhsa thy kha nata sâh charie thie ei ta, ama zydua ta chyhsa thatlôpa riahphapa sai ama châ.

⁴⁵ Chatawhcha a sy ei ta, râhpathohpa lâ Rimô lôpanô lâta râpai ei ta; chyhsa sâh pangawh cha lâlaizy liata thie ei ta; Kidaw taihta a chadai ei ta, chyhsa sâh no thie ei ta.

⁴⁶ Chatanachata cha noh liata Benzami sahlao a thiepa zydua cha zaozi a chabapa sai thy no nata sâh pangawh châ ei ta, ama zydua ta chyhsa thatlôpa riahphapa sai ama châ.

⁴⁷ Chyhsa za charu deikua cha râhpathohpa lâ Rimô lôpanô lâta a râpai ei ta, cha Rimô lôpanô liana chata thla palih y ei ta.

⁴⁸ Chatawhcha Izarel sahlao zy cha Benzami sahlao chô liana chata thyuhnao heih ei ta, khihpi chhôh liatahpa maih cha, sahroh zy ama hmôpa maihta zaozi ta chhawh sao lymâ ei ta. Cha leipa chhao cha khih ama hmôpa maih rao lymâ ei ta.