Ryureihtuhpazy 19

Studie

          |

1 Cha nota Izarel râh liata abei ama y vei nona chata Livai chi chyhsa pakha he Ephrai tlâh râh chhâna lâta y ta, Bethlehe Zudah râh liatahpa nôtho ta hnei ta.

2 A nôtho chata a chôta a pathi-ia ta, Bethlehe Zudah râh liata a paw o lâta a râsai ta, cha liana chata thla palih tlai y ta.

3 Chatawhcha a vahpa cha thyu ta, a chakaotuhpa nata râraoseihpa pôno a chhi ta, a phapa ta reipasao ta, palôh tlâhpa ta a vaw chhi heih a chhuahpa ta a chadai ta. Ano chata a paw o lâna chata a ngiakhei ta; laihsa paw chata a vaw hmô nahta a ly kaw ta. Chatawhcha a puhpa, laihsa paw chata a hnohta y awpa ta thlyu ta, a hnohta noh thôh y ta; nie nata do khoh ei ta, cha liana chata tlô ei ta.

5 Chatawhcha a noh palih noh chata mydi ta thyu ei ta, ano cha pua a chhuahpa ta thyu ta; laihsa paw chata a piahpa hnohta, “Viahchhâ a chyhta chhâ niepa ta na pathipalôh a patlâpazia chy la, cha hnôh lâna chata si lavâh eichi,” tah ta.

6 Chatanachata a tyuh ei ta, ama pano ta nie do khoh ei ta; laihsa paw chata cha chyhsa hnohta, “Palôh tlâhpata ta a rie teh, na pathipalôh cha thapha ngaitapa ta y mawh sy,” tah ta.

7 Cha chyhsa cha sie a chhuahpa ta thyu ta, châhrasala a puhpa chata reipasao chaimâh ta, a rie haw heih ta.

8 Chatawhcha a noh pangawh noh mydi ta sie a chhuahpa ta thyu ta; laihsa paw chata, “Na pathipalôh cha a patlâpazia chy teh, zâlâ noh nai râhsâ taih chhâ ta y chy teh,” tah ta. Chatawhcha ama pano ta pati zy nie khoh heih ei ta.

9 Cha chyhsa cha a nôtho nata a chakaotuhpa chhaota sie a chhuahpa ta a thao nahta, a puhpa laihsa paw chata a hnohta, “Moh teh, zâlâ ha ta, atazâ he a rie heih chy tua teh; a zoh daihmâ ha mâ tâh. He liana he a rie heih la, na pathipalôh cha thapha ngaitapa ta a y thei nawpa ta; chatanachata mylâ mydi ta thyu aw chi ta, na sie thlâh ha aw mâ tâh,” tah ta.

10 Châhrasala cha chyhsa chata cha zâ cha a rie khoh leipa ta; thyu ta pua haw ta, Zebu khih kei tlô ta, (cha cha Zerusale khih a châ). Alâ pô no ky padia chiehpa a chhi ta, a nôtho chhao a hlao hra ta.

11 Zebu khih kiapâh ama tlô nahta zâlâ ha ta, chakaotuhpa chata a zibeipa hnohta, “A vy tua, he Zebu mo khihpi liana heta a ngia thlâh ha ei si, a rie thlâh ha ei suh u,” tah ta.

12 Chatawhcha a zibeipa chata a hnohta, “Izarel pathlazy châ tlôh leipa ta pho hropa khihzy liana chata a ngia bao va, Kibia khih lâ tlao pangai lymâ ei suh u,” tah ta.

13 chatawhcha a chakaotuhpa hnohta, “A vy teh, he su kheihawhpa he ma pangai ei si, Kibia khih liata tlyma, Ramah khih liata tlyma ei rie aw,” tah ta.

14 Chatanachata sie lymâ ha heih ei ta; Benzami mo Kibia khih kiapâh ama tlô nahta noh tla haw ta,

15 Kibia khih liata a rie awpa ta a ngia ei ta. Chatawhcha a ngia ta, cha khihpi khih liah liana chata a tyuh ta; ahyhmah a patlôsa khohpa rai y leipa ei ta.

16 Chatawhcha pawpipa pakha lyu lâ a siepa zâlâ ta vaw tlô ta; cha chyhsa cha Ephrai tlâh râh liatahpa châ ta, Kibia khih liana chata a kei y chypa a châ; cha liata chyhsa zy deikua cha Benzami chizy ama châ.

17 Chatawhcha a heih ta, khihliah liata khichhaipa cha hmô ta; pawpipa chata, “Khataih lâ na sie aw? Khataih lâ tawhta a vypa e na châ?” tah ta.

18 Ano chata a hnohta, “Bethlehe Zudah râh tawhta Ephrai tlâh chhâna râh lâta sie a chhuahpa ei cha, cha liata a ypa cha châ na ta. Bethlehe Zudah râh lâ vawh na ta; atahmâ he ABEIPA o lâta sie ei chhuah ahyhmah na patlôsa khohpa y veih ei.

19 Eima alâ châta cha sâhkô nata sahroh laozy hnei pi ta, kei nata na seichanônô nata na chakaotuhpa zy hnohta a y hrapa satliapa châta zy chhao viahchhâ nata kresawti y hra ta, khâpahmah a phahlapa ta hnei ma pi,” tah ta.

20 Chatawhcha pawpipa chata, “Thlalôh ngaitapa ta y teh; na byuhpa zydua cha keima ta ei tao khai aw na; khihliah liata la a rie chacheita khâ,” tah ta.

21 Chatanachata o lâ a chhi ta, alâ zy cha a lao pie ta, ama pheizy a si ei ta, nie dopa ta y ei ta.

22 Cha hawhta thaphapa nata aly ngaitapa ta ama y nona chata, cha khihpi moleipa sawchapawpa zy thokha chata o cha vaw dôh ei ta, ochhi a vaw chô ngâ kaw ei ta; o a hneituhpa pawpipa hnohna chata, “Na o liata a vaw tlôpa kha vaw papua teh, eima y khei aw,” tah ei ta.

23 Chatawhcha o hneituhpa cha âmo lâta kei pua ta, ama hnohta, “Châ bao va, unawh saih u, cha tlatluta moleipa cha tao chacheita khah u; he chyhsa he ei khichhaipa a châ hih, he hawhpa hmo pasichhipa la tao aw veih eichi.

24 Moh teh u, he liana heta ei sawchanônô laihsapa nata nôtho y ei ta; âmo cha vaw papua aw na ta. Âmo cha hnei ula, a pha nama tahpa hawhta ama chô liata tao teh u; he chyhsa chô liana deikua he cha hawhpa hmo pasichhihpa cha tao khah u,” tah ta.

25 Châhrasala cha chyhsa zy chata a rei a ngiah leipa ei ta. Chatanachata chyhsa chata a nôtho patu ta âmo lâta papua ta; âmo chata vaw y khei ei ta, khihdei hlâ lei cha zâkhihdei ta tao chhie ei ta.

26 Chatawhcha khih a vaw deih pata nahta sie ta, a zibeipa tlônapa chhikao kiapâh liata pao ta, khih pavâna taihta y thlâh ha ta.

27 Chatawhcha a zibeipa cha my ta kaw thyu ta, chhikao zy cha pahy ta, sie a chhuahpa ta pua ta, a nôthonô cha chhikao thaby liana chata a thy thlâh ha ta.

28 Chatawhcha ano chata a hnohta, “Thyu teh, sie ei si,” tah ta. Châhrasala a chhy khao leipa ta. Chatanachata a alâ chô liana chata khaih ta, thyu ta, a su lâna chata sie haw ta.

29 Chatawhcha a o a kei tlô nata chaizôh la ta, a nôtho pôhpa cha suhrawhleino ta pachhaih ta, Izarel râh zydua liata paphao ta.

30 Chatawhcha a vaw hmôpa maih cha, “Izarel pathlazy Izi râh tawhtapa ama vaw pua rakha tawhta he hawhta hmotaopa rai he atahmâ taihta y beih leipa ta hmôpa châ beih hra vei; pachâ ula, a chhohia ula, reih teh u,” tah ei ta.

  
Scroll to see more.