Zawhana 18

¹ Zisu ta cha biezy cha a rei khai nahta, a pachupazy chhaota pua ei ta, Kidraw chavah kao chaka ei ta, cha liana cha sahdô y ta, cha liana chata a ngia ei ta, ano nata a pachupazy chhaota.

² A patusatuhpa Zuda chhao chata cha su cha a pahno; Zisu cha a pachupazy hnohta cha liana chata charei tyh tlôh ta.

³ Chatanachata Zuda cha theihthaipa abeizy nata Pharisaizy tawhtapa pheisaih sahlao nata hyutuhpazy chhao a chhi ta, meiôhzy, meireizy, chaihraizy chabapa ta cha lâna chata a vy ei ta.

⁴ Zisu ta a chô liata hmo a tlô awpa zydua cha pahno thlâh ha ta, pua ta ama hnohta, “Ahy nama tlua?” tah ta.

⁵ Âmo chata a hnohta, “Nazari Zisu,” tah ei ta, a chhy ei ta. Zisu ta ama hnohta, “Keima he ei châ,” tah ta. Chatawhcha a patusatuhpa Zuda chhao cha ama hryta a duah ta.

⁶ “Keima he ei châ,” a tahpa ta nahta a sy ei ta, alei liata pao chyu ei ta.

⁷ Ano chata ama hnohta, “Ahy nama tlua?” tah ta hiahri heih ta. Chatawhcha âmo chata, “Nazari Zisu,” tah ei ta.

⁸ Zisu ta, “Keima he ei châ, tahpa ei cha chho ei mâ tâh; nâmo ta keima eina tlua khiah eichi tala, he sahlao he a phapa ta pasiesa teh u,” tah ta a chhy ta.

⁹ A bie reipa, “Nâma ta kei eina piepa chi sahlao pakha hmah pahlei va na,” a tahpa kha a tlô nawpa ta.

¹⁰ Chatawhcha Saimaw Pity ta zaozi a vao ta, phia ta, Theihthai Beichaipa sei chhaw ta, a nahkao chachâh lâ pathai ta, sei moh cha Malkusa châ ta.

¹¹ Zisu ta pity hnohta, “Zaozi kha a paih liata khô teh; Paw ta nyu eina piepa he doh aw va na mâ?” tah ta.

¹² Chatanachata pheisaih sahlao chhaota ama hyutuhpa beichaipa chhaota Zuzy hyutuhpazy chhao chata Zisu patu ei ta, chahry ei ta.

¹³ Ana lâta a chhi tua ei ta; Kaiapha puhpa a châpa vâta, Kaiapha cha cha kô liana chata Theihthai Beichaipa châ ta.

¹⁴ Kaiapha cha chyhsa zydua vyuhpa ta mo pakha thi a pha tahpa ta Zuzy a pahruakheituhpa kha a châ.

¹⁵ Saimaw Pity ta Zisu zi ta, a pachupa hropa pakha chhaota, cha pachupa cha Theihthai Beichaipa pahnopatheipa châ ta, Theihthai Beichaipa o dôhpachhôh tlyhmia liata Zisu hnohta a ngia hra ta,

¹⁶ châhrasala Pity cha khôtho lâ ochhi kiapâh liata a duah thlâh ha ta. Chatanachata pachupa hropa Theihthai Beichaipa pahnopatheipa cha pua ta ochhi vaihtuhpa bie chho ta, Pity pangiasa ta.

¹⁷ Ochhi vaihtuhpa laihsa chata Pity hnohta, “Nâ chhao he chyhsa pachupazy hryta a hlao hrapa châ va chi mâ?” tah ta. Ano chata, “Châ va na,” tah ta.

¹⁸ Chatawhcha seizy nata hyutuhpazy cha cha liana chata aduah chyu ei ta, a chasipa vâta meihei ta meipatih ei ta, a aih ei ta; Pity chhao ama hnohta a hlao ta, a duah hmahta mei a aih hra ta.

¹⁹ Theihthai Beichaipa chata Zisu cha a pachupazy thâtih nata a pachunazie kyh hiahri ta.

²⁰ Zisu ta a chhy ta a hnohta, “Khizaw chyhsa hnohta vâtlâh pahnopa ta bie ei reih tyhpa kha; apakhyna-o nata Khazohpa achhyna-o, Zu zydua y pakhyna zy liana chata ei pachu tyhpa kha; a ru lâta khâpahmah reih va na.

²¹ Khazia kei eina hiahri chi? Ama hnohta ei bie a theituhpazy hiahri teh; chazy chata ei bie reipa cha ama pahno mâ tâh,” tah ta.

²² Cha cha a reipa ta nahta a kiapâh liata a duahpa hyutuhpa pakha ta Zisu chabaih ta, “Theihthai Beichaipa he tana heta nâ chhy ma?” tah ta.

²³ Zisu ta a hnohta, “Bie do leipa a reipa ei châ khiahtala, ei do leina na pahnosa teh; châhrasala bie dopa ei reipa chhaota khazia eina chabaih chi?” tah ta a chhy ta.

²⁴ Ana chata a ku chahryna chôta Theihthai Beichaipa Kaiapha lâ tuah ta.

²⁵ Saimaw Pity ta aduah hmahta mei a aih ta, “Nâ chhao a pachupa hryta a hlao hrapa châ va chi ma?” tah ei ta. “Châ va na,” tahpa ta a papha ta.

²⁶ Theihthai Beichaipa sei pakha, Pity ta a nahkao a pathaipa heinawh chata, “A hnohta sahdô liana khata cha hmô va na mâ?” tah ta.

²⁷ Pity a papha heih ta; awh khoh pâ ha ta.

²⁸ Zisu cha Kaiapha o tawhna chata abei o lâta a chhi heih ei ta. My châ ta. Âmo cha abei o liata a ngia veih ei, amâ ngia khiahta cha pathaih leipa châ aw ei ta, Zawpakhô pati nie thei aw veih ei.

²⁹ Chatawhcha Pila âmo lâ kei pua ta, ama hnohta, “He chyhsa chô liana heta biepeipa khâpa nama hnei?” tah ta.

³⁰ Âmo chata a hnohta, “He chyhsa he moleipa châ leipa sala nâ lâ a vaw chhi aw ma pi,” tahpa ta a chhy ei ta.

³¹ Pila chata ama hnohta, “Nâmo ta a chhi ula, nama ryhpa hawhta a bie pachia teh u,” tah ta. Zuzy chata a hnohta, “Keimo rei ta ahyhma thie hraopa châ vei,” tah ei ta.

³² A thinazie awpa kyh Zisu ta a reipa hawhta a tlô nawpa ta.

³³ Pila cha a o lâ a ngia heih ta, Zisu aw ta a hnohta, “Zuzy Beipa na châ ma?” tah ta.

³⁴ Zisu ta, “He he nâma palôhrupa ta a puapa ma na reih ma, mo hropa ta ama cha chhopa ma, keima kyh he?” tah ta a chhy ta.

³⁵ Pila ta, “Kei Zu chyhsa ei châ ma? Nama chizy nata theihthaipa abeizy ta kei lâta ama châ vaw chhipa a châ he; khâpa hmo na tao?” tah ta a chhy ta.

³⁶ Zisu ta, “Ei khihnarâh cha he khizaw liatahpa he châ vei; ei khihnarâh cha he khizaw liatahpa he châ sala, na chakaotuhpazy ta amâ dyu aw, Zuzy lâta piepa ta ei y lei nawpa ta; châhrasala ei khihnarâh cha he liatahpa he châ vei,” tah ta a chhy ta.

³⁷ Pila ta a hnohta, “Abei châ khiah chi?” tah ta. Zisu ta, “Ei châ cha, abei ei châ mâ tâh, bie hmeiseihpa pahnosapa he ei bie chhopa nata khizaw liata ei vy chhâpa a châ. Ahyrai bie hmeiseihpa liatahpa maihta ei bie ama zyh tyh,” tah ta.

³⁸ Pila ta a hnohta, “Bie hmeiseihpa khâpa maw?” tah ta.

³⁹ Châhrasala Zawpakhô kyhchhi liata mo pakha ei cha papuapa awpa ta ryhpa hnei eichi ta; chatanachata Zuzy Beipa he cha papuapa aw ei sala nama khoh ma?” tah ta.

⁴⁰ Âmo cha awh heih ei ta, “He chyhsa he châ kha se, Baraba kha tlao châ se!” tah ei ta. Baraba cha phihmâhpa a châ.;