Zawhana 14

Study

         

1 “Nama pathipalôh nôpo kha se; Khazohpa namâ ngiapâ na, kei chhao nâ ngiapâ hra teh u.

2 Ei Paw o liata yna hluhpi a y; a y vei khiahtala ei cha chho ha awpa ei a châ, nama châta su a chhuahdy awpa ta ei sie aw hih.

3 Chatawhcha nama châta su ei vaw tao khiahtala, vaw kua heih aw na ta, ei hnohta ei cha la aw ei, ei yna liata nâmo chhao nama y thei nawpa ta.

4 Ei siena awpa lâpi nama pahno na,” tah ta.

5 Thawma ta a hnohta, “Abeipa, na siena awpa pahno ma pi; a lâpi kheihta e eima pahno aw,” tah ta.

6 Zisu ta a hnohta, “Kei he lâthlôh nata Hmeiseihna nata hrona ei châ; keima lâta a sie leipa cha ahyhma ta Paw lâta tlô beih veih ei.

7 Kei na pahnopa châ ula, ei Paw chhao nama pahno ha bâ awpa; atahmâ tawhta ano cha nama pahno na, ano nama hmô haw hra,” tah ta.

8 Phili ta a hnohta, “Abeipa, Paw cha keimo maniah pahmôsa teh, chatanachata eima châta a daih aw,” tah ta.

9 Zisu ta a hnohta, “Phili, he châ dua he na hnohta y na ta, chatana chhaota na pahno va chi ma? Ahyrai nâ hmôpa cha Paw hmôpa a châ; ‘Paw cha keimo maniah pahmôsa teh,’ kheihtazie ta a tahpa ma na châ?

10 Kei Paw liata ei ypa nata Paw keima liata a ypa zo va chi ma? Nama hnohta he bie ei reipa he keima tao chhypa ta reih va na; Paw keima liata y ta, hmo tlao a tao tyh.

11 Kei Paw liata ei ypa nata Paw keima liata a ypa he nâ ngiapâ teh u; cha leipa ta ei hmo taopazy chhâ angiapâ teh u.

12 “Hmeiseihta ta, hmeiseihta ta, ei cha chho ei chuh, ahyrai nâ ngiapâpa chata hmo ei taopazy he ano chhaota a tao hra aw; hezy hlâta hmo rônahpa chhao a tao aw, Paw lâta ei sie awpa vâta.

13 Ei moh ta khâparai nama hiapa maih cha ei tao lymâ aw, Sawchapawpa vâta Paw parônahsapa ta a y thei nawpa ta;

14 nâmo ta ei moh ta khâparai nama hiah khiahtala, cha cha ei tao lymâ aw.

15 “Nâmo ta ei kyh eina pachâ khiah chi tala, ei biepiepazy namâ ngiah aw.

16 Chatawhcha Paw hiah aw na ta, ano chata Thlahpalôhtuhpa hropa a cha pie aw ei, chhâzaw ta nama hnohta a y awpa ta,

17 cha cha hmeiseihna Thlahpa cha a châ, khizaw ta cha cha hnei thei vei, ano hmô leipa ei ta, ama pahno hra leipa vâta, nâmo ta ano cha nama pahno na, nama hnohta y thlâh ha tlôh ta, nâmo liana chata a y aw.

18 “Hârapa ta cha siesai aw veih ei na, nama hnohta ei vy heih aw.

19 Bohpi leipa tawhta khizaw ta na hmô khao aw vei, châhrasala nâmo tala eina hmô aw ei chi; keima ei hrohpa vâta nâmo chhao nama hroh hra aw.

20 Cha noh liana chata kei ei Paw liata ei ypa zy, nâmo keima liata nama ypa zy, kei nâmo liata ei ypa zy nama pahno aw.

21 Ahyrai ei biepiepazy hnei ta a zyhpa cha, kyh na pachâtuhpa a châ; ahyrai ei kyh na pachâpa cha ei Paw ta a kyh a pachâ aw,” tah ta.

22 Zuda (Iskari a châ leipa) chata a hnohta, “Abeipa keimo hnohta a luah aw chi ta, khizaw hnohta nâ luah tlôh lei awpa cha khazia?” tah ta.

23 Zisu ta a chhy ta a hnohta, “Chyhsa ta ei kyh eina pachâ khiahtala, ei bie a ngiah aw ta, ei Paw ta ano cha a kyh pachâ aw ta, a hnohta a vy aw pi ta, a hnohta eima y thlâh ha aw.

24 Ahyrai ei kyh na pachâ leipa chata ei biepiepazy zyh vei; bie nama theipazy he keima eih châ vei, Paw nâ tuahtuhpa eih tlao a châ.

25 “Nama hnohta ei y chhôh heta he biezy he ei cha chho ei hih.

26 Thlahpalôhtuhpa, Thlahpa Pathaihpa, Paw ta ei moh ta a vaw tuah awpa khata, cha chata a to cha pachu aw ei ta, nama hnohta ei reipa zydua a cha patheisa pathi heih aw ei.

27 Thlahlôhna ei cha sopa ei hih; keima thlahlôhna ei cha pie ei hih; khizaw ta a piepa hawhta ei cha pie leipa ei he. Nama pathipalôh nôpo khah se, chi rai chi kha se.

28 ‘Sie aw na ta, nâmo lâ ei vy heih aw,’ ei cha tahpa ei kha nama thei haw. Nâmo ta ei kyh na pachâpa châ ula, Paw lâta ei sie awpa vâta namâ ly awpa a châ; Paw cha keima hlâta rônah via tlôh ta.

29 Atahmâ a vaw tlô hlâta ei cha chho haw ei hih, a vaw tlô tita namâ ngiapâ nawpa ta.

30 Nama hnohta bie rei hlei khao aw va na, khizaw bei a vy tlô aw ta. Ano chata keima liata bie khâpahma hnei vei:

31 châhrasala kei ta Paw kyh ei pachâpa nata Paw ta bie eina piepa lymâ hawhta hmo ei tao tahpa, khizaw ta ama pahnona awpa ta a châ hih.Thyu teh u,he tawhtapa pua ei suh u.;