Zawba 30

¹ “Atahmâ cha kei hlâta seihnaipa chhaota na pahneisao ei ta, ama pawzy ei sahroh vaihtuhpa i hryta ahlaopa chhao ei khoh leipa zy khata.

² Ama ku thatlôpa zy tawhna chata, khâpa e, ei thôh ha khei tly, chyhsa tha chhâpazy cha?

³ Phahlapa nata nodipa ta zao ei ta, râhchawhpa nata rohryhrapa chawhpa cha pakhei ei ta;

⁴ thobuh hnazy nata âhnalasi iapa cha thlie ei ta, râhchawhpa sibiepa thari cha ama pati a châ.

⁵ Chyhsa zy hry tawhta papuapa ta y ei ta, parutuhpa haw ta chyhsa zy ta awsao lymâ ei ta.

⁶ Saihao ryhpa zy liata pahrâ ei ta, khaotlô nata lôkhao liata zy.

⁷ Thobuh hry liata sa ei ta, thlahbei ry liata zy y pakhy ei ta,

⁸ Ahrupa zy saw ama châ, dyutlai leipa sawzy, lyurâh tawhta chhei chahriepa châ ei ta.

⁹ “Atahmâ la ama hla ei vaw châ haw, ama bierei thâh reina deita ei vaw châ haw.

¹⁰ Na pasi ei ta, einâ pasiesai ha ei; ei hmiakô liata pachih pachhaopa cha papeisa veih ei.

¹¹ Khazohpa ta ei khawhri cha pathlâ ta, eina panawhsa hapa vâta, ei hmiakô liata pakhâna hnei khao veih ei.

¹² Ei chachâh lâna cha chyhsa chhiepazy thyu ei ta, keizai eina phie ei, ama pahleipadiana cha ei chôta na thythlu ei ta.

¹³ Ei lâpi parao ei ta, ei vâchhiena ama baichha; Ahy hmahta a chado veih ei.

¹⁴ A pyupa kawhna liata a vy ei ta; a chopa hry liata na dô ei ta.

¹⁵ Rarôh ypa ei chôta vaw tlô ta, ei rôhnahna ziza ta a phaoh syulyu haw; ei nohlaona chhao meihdo hawhta a lei haw.

¹⁶ “Atahmâ keima tawhtapa ei thlahpa cha patypama a châ, rietheina nohzy chata eina patu haw.

¹⁷ Zâ na cha ei ruzy na chaihbawh hôlô ta, pasana na chaih ngâpa he a chalih vei.

¹⁸ Ei pasana heta ei chysia parao khai ta, ei viahpakao rao hawhta na rie ta.

¹⁹ Pasana ta chiatlao liata eina thy, buchâh nata meipaoh hawh deita ei vaw châ haw.

²⁰ Khazohpa, nâ cha aw na ta, nâ chhy tlôh chi va; a duah na ta, nâ ta na moh va chi.

²¹ Ei chôta na nôchhie haw ta, na ku thatlôna ta eina taola chi.

²² Nâ ta thlih hryta na chalo chi ta, a chôta eina pakiasa chi, nâ ta thlihpi liata eina pahleipadia chi.

²³ Nâ ta thina eina tlôkhei chi aw tahpa ei pahno. Ahrohpa zydua châta su raopa liana cha.

²⁴ “Rietheipa ta a ku a chahu thlyu vei mâ? A vâchhiena kyh ta bao awpa ta a aw tina cha?

²⁵ Tymâna a tyhtuhpa zy châta cha tyh vana mâ? Rietheipa châta ei palôhrupa riethei vei mâ?

²⁶ Hmo phapa ei sai nona chata hmo chhiepa na tlôthlu ta, khaihna hâ na ta, zohna tlao a vaw tlô haw.

²⁷ Ei pathi a chalyu ta, a chalih thai vei, pasa taona noh cha ei chôta tlô ha ta,

²⁸ noh sana vâta châ leipa ta, vyh na ta; thlah na palôhtuhpa y veih ei, ahmaoh pakhypa hryta a duah na ta, baona ei hiah.

²⁹ Sihâ châta unawhpa ei châ, pavawpizy châta viasa ei châ.

³⁰ Ei vo cha vaw vyh ta, ky ta, ei rupa zy cha a palopa ta a duah ngâ ta.

³¹ Ei totâ cha mâchhiesana ta a châ haw, ei ramo cha chapa ao lâta a châ haw.