Ryhpachaneina 8

Studie

          |

1 A hrohpa ta ypa ta, pôh lymâpa ta, pie awpa ta nama mahpaw zy hnohta chhie a sapa râh cha nama hnei thei nawpa ta biepiepa atanoh ta ei cha piepa ei he, zyh awpa ta namâ chado awpa a châ.

2 A biepiepazy cha nama zyh aw ma, zyh vei aw ma, nama palôhrupa pahno nawpa ta pasia awpa nata rie cha pathei awpa ta râhpathohpa liata kô sypalih a cha chhihthana kyh cha a thei thlâh ha teh u.

3 Chyhsapa he viahchhâ deita ta hroh leipa ei ta, ABEIPA pakah liata bie to a puapa ta tlao ama hroh tahpa a cha pahnosa thei nawpa ta rie cha pathei ei ta, nama chakâpa zy pasai ta, nama pahno beih leipa, nama mahpawzy chhaota ama pahno beih leipa mâna ta cha pasa ei ta.

4 He kô sypalih chhôh heta nama chysiazy cha paroh leipa ta, nama pheizy chhao tlô leipa ta.

5 Chyhsa ta a saw a chhorei tyhpa hawhta ABEIPA nama Khazohpa chata a cha chhorei tyh ei, tahpa he nama palôhrupa ta pahno thlâh ha teh u.

6 Chatawhcha a lâpi a chhih awpa nata ano cha chi awpa ta ABEIPA nama Khazohpa biepiepa zy cha nama zyh awpa a châ.

7 ABEIPA nama Khazohpa chata saikao nata tlâh tawhta a vaw puapa chavah ti zy, tikhaoh nata ti a thuh ngaitapa yna râh.

8 sâh zy, bali sâh zy, kre zôh zy, theiku kô zy, pawmikranat zy yna râh, thaw a hneipa, ôli nata kheihti yna râh.

9 phahla leipa ta viahchhâ nama nie tyhpa awpa râh, khâpahmah namâ phahla leina awpa, alôzy cha thua, a tlâhzy cha dawh chao theina râh pha ngaitapa liana chata cha chhihtha tlôh aw ei ta.

10 Niepa ta lôhrâ tlôpa ta y aw eichi ta, râh pha ngaitapa a cha piepa vâna chata ABEIPA nama Khazohpa cha nama reithai aw.

11 A biepiepa zy, a pachiana zy, a ryhpa zy, atanoh ta ei cha piepa ei he zyh leipa ta ABEIPA nama Khazohpa cha nama my pathlei awna, a chado teh u.

12 chata leipa ta cha niepa ta lôhrâtlôpa ta, o pha ngaitapa zy sapa ta nama pahrâ tita nata.

13 nama sahroh zaw zy, nama mietahkupa zaw zy, vaw pôhpa ta, nama tâkâzy, nama ngôh zy vaw pôhpa ta, nama hmo hneipa zydua a vaw pôh tina chata.

14 nama palôh zy lai aw ta, seichâna tawhta, Izi râh tawhta cha chhihthatu pa ABEIPA nama Khazohpa cha nama my thlâh ha aw.

15 ano chata râhpathohpa kawh ngaitapa nata rarôh y ngaitapa, parih pachu sapa ta zy nata râhcha-ia zy yna, ti y leina, râh chawhkaraipa liata cha chhihtha ei ta, meilô lôpanô tawhta ti cha papuapa ei ta.

16 nama mahpawzy pahno beih leipa, mâna ta cha pasa ei ta, atahmâ tawhta namâ pha thei nawpa ta rie cha pathei ei ta, a cha pasia thei nawpa ei ta.

17 He eima sôh zy he, keimo thatlôna nata eima ku tao theina a châ,’ nama palôhrupa ta nama tah pathlei aw na, a chado hra teh u.

18 Atahmâ ta â ipa hawhta nama mahpawzy hnohta chhiesapa ta bie a hraihpa cha a pa-i nawpa ta, ABEIPA nama Khazohpa cha a thei thlâh ha teh u, hneirôna nama hmô thei nawpa ta hmotao theina cha pietuhpa cha, ano cha tlao a châ mâ tâh.

19 Chatawhcha ABEIPA nama Khazohpa cha mypa ta, khazoh hropa zy zipa ta, chakaopa ta, namâ chhy tlai khiahtala, nama leidia tlai aw tahpa atanoh ei cha pahnosa ei.

20 Nama hmiakô liata pho hropa zy a pahleipadiapa hawhta, nâmo chhao nama leidia aw. ABEIPA nama Khazohpa ao cha, nahthlie khoh leipa nama cha awpa vâta.