Ryhpachaneina 7

Studie

         |

1 ABEIPA nama Khazohpa ta nama hnei awpa râh lâta cha chhihtha ei ta, nama hmiakô liata pho hluhpi, Hiti mozy, Kirkasi mozy, Amawri mozy, Kana mozy, Periza mozy, Hivi mozy, Zebu mozy, nâmo hlâta a rôhnahpa nata hmo tao thei viapa pho sarizy a papua daihti nahta.

2 ABEIPA nama Khazohpa ta a cha pie tita, nama thi tina chata; nama pahleipadia khai awpa a châ. Âmo nata bie nama hraih awpa châ leipa ta, nama ngiachhie awpa châ hra vei.

3 Nama sawchanôzy cha ama sawchapawpazy nama pahneisa awpa châ leipa ta, ama sawchapawpazy nama pahneisa awpa châ leipa ta, ama sawchanôzy cha nama sawchapawzy nama pahneisa awpa châ hra vei.

4 Nama sawchapawzy ta eina zi haina ei tawhtapa khazohpa hrohpa achhyna lâta cha chhihtha aw ei ta; ABEIPA pathi chhao cha nama chô liata ia aw ta, thlai a cha pahleidia aw ei.

5 Ama chô liata he hawhna heta tlao nama tao awpa a châ; ama maisâhzy pacho aw eichi ta, ama lôbôzy pakei aw eichi ta, ama tlyliah bônazy thlu aw eichi ta, ama khazoh nohthlah taopazy mei ta nama rao khai awpa a châ.

6 ABEIPA nama Khazohpa châta pho pathaihpa châ tlôh eichi ta; alei liata pho zydua hlâta ano eih pachaipa châ awpa ta ABEIPA nama Khazohpa ta a châ tlyhpa châ eichi ta.

7 Pho hropa hlâta nama hluhpa vâta ABEIPA ta nama chô liata a kyhpachâna paysapa ta a châ tlyhpa ei châ leipa ta, pho zydua hlâta pho chyh chaipa nama châ mâ tâh.

8 ABEIPA ta nâmo kyh a pachâpa vâta nata nama mahpaw zy hnohta chhie a vaw sapa cha patlô a khohpa vâta ABEIPA ta Izi beipa Phirao ku tawhtapa ku thatlô ngaitapa ta lei tawhtapa a cha chatlai ei.

9 Chavâta ABEIPA nama Khazohpa cha Khazohpa a châ tahpa pahno teh u, Khazohpa ngâchhihpa, ano kyhpachâ ta a bie a zyhtuhpa chô liata chhâ sâh hluhpi taihta, bie a hraihpa nata ngiachhiena hneipa ta.

10 ano a haotuhpazy pahleipadia awpa ta âmo chô lia tlaita viari a thô tyhpa a châ, âmo a haotuhpazy cha pahlôh leipa aw ta, âmo chô liata tlaita viari a thô aw.

11 Chavâta biepiepazy, ryhpa zy, pachiana zy, zyh awpa ta atanoh ta bie ei cha piepa ei he nama zyh awpa a châ.

12 Chatawhcha he pachiana zy he nahthliepa ta, zyhpa ta nama taopa vâta ABEIPA nama Khazohpa ta, nama mahpawzy hnohta chhie a vaw sapa biehrai nata ngiachhiena cha nama chô liata soh aw ta.

13 Nama kyh cha pachâ aw ei ta; pie awpa ta nama mahpawzy hnohta chhie a sapa râh liana chata nama saw sapa nata nama alei theilâpa chhao byhnâ a pi hra aw, nama sâh zy, nama kresawti zy, nama sathaw zy, nama viahchao taw nata nama mietahkupa taw zy chhao.

14 Pho zydua hlâta byhnâ piepa châ aw eichi ta; nâmo hry liata chanô a chapaw ta saw leipa rai y aw veih ei, nama sahroh hry liata chhao.

15 Chatawhcha ABEIPA ta hri zydua cha papaipa aw ei ta; nama pahno chiehpa Izi râh hrizy cha nama chô liata patlôsa leipa aw ta, châ haotuhpa zydua chô liata tlao a patlôsa aw.

16 ABEIPA nama Khazohpa ta a cha pie awpa pho zydua nama pahleipadia khai awpa a châ, nama ngiachhie awpa châ leipa ta; ama khazohzy nama chakao awpa châ vei, nama châta khohei châ tlôh aw ei ta.

17 Nama palôhrupa ta, ‘He phozy he keimo hlâta hluh tlôh ei ta, kheihta e eima papua thei aw?’ nama tah thei aw.

18 âmo cha chi khah u, ABEIPA nama Khazohpa ta Phirao nata Izi chyhsa zydua chô liata a hmo taopa kha namâ thei thlâh ha aw.

19 pasiana rôhnah ngaitapa nama mo tlaita nama hmôpa zy, pahnona zy, hmonoâhpa zy, ku thatlô ngaitapa zy, bâh pazawhpa zy ta, ABEIPA nama Khazohpa ta a cha chhihthana ei kha; kha hawhna khata ABEIPA nama Khazohpa ta nama chyhsa chipazy chô liana chata a tao lymâ aw.

20 ABEIPA nama Khazohpa ta ama hry liata a nyupa zy cha ama leidia khaina taihta.

21 Âmo cha nama chi awpa châ vei; ABEIPA nama Khazohpa cha nama hry liata y tlôh ta, Khazohpa rôhnah ngaitapa, chichhih ngaitapa cha.

22 ABEIPA nama Khazohpa ta cha phozy cha dusawta ta cha papuapa aw ei ta; thlai nama pahleipadia awpa châ leipa ta, chata leipa ta cha sahrâhpa zy nâmo lâta a pei tyhna taihta a vaw pôh aw.

23 Ama leidia hlâ lei cha ABEIPA nama Khazohpa ta cha pie aw ei ta, thata atymâ aw.

24 Ama abeizy cha nama ku liata pie aw na ta, âmo cha avâ ry tawhtapa nama pahleipadia awpa a châ; nama pahleipadia khaina taihta cha pakhâ awpa ahyhmah y aw veih ei.

25 Ama khazoh nohthlapa taopa zy cha mei ta nama rao awpa a châ; cha liata tâkâri tlyma, ngôh tlyma cha, nama uava awpa châ leipa ta, nama châta nama la awpa châ hra vei, chata leipa ta cha namâ ao pathlei aw na; ABEIPA nama Khazohpa pachâ ta hmo pasichhihpa châ tlôh ta.

26 Nâmo o chhôh liata hmo pasichhihpa nama pangia awpa châ vei, thata pasipa ta namâ hao hawh awpata a châ; chhiesapa hmo châ tlôh ta.