Daniel 10

¹ Persia beipa Kôrasa kô thôhna liana chata, Daniel, a moh Beltesaza ama bipa hnohna chata bie a vaw lâ ta. Cha bie cha a dopa châ ta, cha cha adyuhna ru ngaitapa a châ. Chatanachata hmo cha pahno thai ta, aluahna pahno theina a hnei.

² Cha nohzy chata kei, Daniel, cha noh sari ei thôh bohlo mâchhiesapa hawhta y na ta.

³ Nie pahâhpa rai nie leipa na ta, sa tlyma, kresawti tlyma chhao ei pakah liata a ngia hra vei, nohsari ei thôh bohlo a tlô hlâta cha sathaw chhao athu hra va na.

⁴ Thla khana, noh syno nata noh palih noh liata chavah rôhnah ngaitapa Hidekel ngiakâ liata ei y nona chata,

⁵ mohmia kaw pasai na ta; chyhsa poh rih dipa a bupa, a chai liata Upha ngôh suapa ta a saihpa vaw y ta:

⁶ a pôhpa chhao bery lô hawhta châ ta, a hmia cha dôhla alânazie hawhta, a mokhaohzy cha mei meiôh hawhta, a bâhzy nata a pheipazah zy cha dawh pathliepa hawhta, a reih pyu cha zawpi pyu hawhta a châ.

⁷ Cha aluahna cha kei, Daniel deita heta hmô na ta; ei hnohta a ypazy chata aluahna cha hmô hra leipa ei ta, châhrasala thata achalyu ei ta, anyu khai haw ei ta.

⁸ Chatanachata keima deita y na ta, aluahna rôhnah ngaitapa cha hmô na ta, tha rai hnei khao leipa na ta; ei pizy phana hneipa cha rao khai ha ta, tha rai hnei khao va na.

⁹ Châhrasala a rei pyu cha thei na ta; a reih pyu ei thei nahta akhupa ta, hmia alei supa ta a rao ha na ta.

¹⁰ Chatawhcha ku heta na vaw hria ta, cha chata pakhu paneihpa ta na paysa ta.

¹¹ Ano chata ei hnohta, “Hy Daniel, chyhsa khochhih ngaitapa y, na hnohta bie ei reipa he pahno thai la, a dopa ta aduah teh; atahmâ he nâma lâta tuapa châ tlôh na ta,” tah ta. He bie he ei hnohta a rei khai nahta, chalyuna chôta aduah na ta.

¹² Ano chata ei hnohta, “Chi khâ, Daniel y, na Khazohpa hmiakô liata a panawh awpa nata pahno thai awpa ta na pathipalôh na pie tuana tawhna khata na biezy nahthliepa châ ta, na biezy vâna chata ei vy.

¹³ Persia râh hyutuhpa chata noh syno nata noh kha nâ dyuh ta; anodeikuacha Mikhael, hyutuhpa laipa cha na bao awpa ta a vy ta; chatanachata Persia beipa hnohta y haw na ta,

¹⁴ nohhro ta na chyhsazy chô liata hmo a vaw tlô awpazy cha pahnosa awpa ta atahmâ he ei vy. Aluahna cha noh hluhpi hnôh lâta châ tlôh aw ta,” tah ta.

¹⁵ He biezy lymâ hawhta ei hnohta a rei tina chata, kei cha a khu na ta, reih pathlie thei khao leipa na ta.

¹⁶ Chyhsa pakha, chyhsapa a lyupa ta a lâpa heta ei hmao vaw hria ta; chatanachata ei pakah â ha na ta. Ei hmiakô liata a vaw duahpa hnohna chata, “Hy ei beipa y, aluahna vâna chata ei pachârôhnazy chata na vi ta, tha rai hnei khao leipa na ta.

¹⁷ He ei beipa chakaotuhpa heta he ei beipa he kheihta e a chhy thei aw? Kei hra cha, keima liata tha rai y khao leipa châ tlôh ta, hu chhao so thei va na,” tah na ta.

¹⁸ Chyhsa hawh tlaita alâpa chata na vaw hria ta, tha na patlô ta.

¹⁹ Ano chata, “Hy chyhsa khochhihpa y, chi khâ, thlahlôhpa ta y teh; thatlôpa ta y la, riahphapa ta y teh,” tah ta. Ei hnohta bie a reih hai nona chata ei tha vaw tlô haw ta. “Ei beipa ta bie reih mawh sy, nâma ta tha na patlô haw tlôh chi ta,” tah na ta.

²⁰ Ano chata, “Na hnohta ei vy chhâpa he na pahno ma? Atahmâ cha Persia râh hyutuhpa adyuh awpa ta ei kua aw; chatawhcha ei thyu tita cha, pachâ teh, Krika râh hyutuhpa a vy aw.

²¹ Châhrasala bie dopa rona liata ropa cha ei cha chho aw: hezy liana heta, nama hyutuhpa Mikhael dei leipa cha, ahyma na chakhei awpa y veih ei.