Daniel 11

Study

         

1 ‘Kei cha Medai chyhsa Daria kô khana liana khata ano pa-i awpa nata thapatlô awpa ta aduah na ta."

2 Atahmâ he bie dopa cha ei cha chho aw ei. “Persia liana chata abei pathôh vaw pua aw ei ta; a papalihna cha a hropa zydua hlâna khata a hneirôh via chai aw; a hneirôna vâta a tha a patlô tita cha Krika râh adyu awpa ta chyhsa zydua a pathyu aw.

3 Chatawhcha abei thatlô ngaitapa, biehneina rôhnah ngaitapa ta ryu a reih awpa cha vaw pua aw ta, ano reisai ta a tao aw.

4 A vaw pua tina chata a khihnarâh cha a hie patlapa châ aw ta, kaokih miapalih lâta pachhaihpa ta a y aw, a pathlazy hnohta châ leipa ta, a biehneina ta a pachia tyhnazie hawhta châ leipa ta a khihnarâh cha he chyhsazy a châ leipa, chyhsa hropa châta chhupa ta tlao a y aw.

5 “Chatanachata chho lâ abei cha a thatlô aw ta; a hyutuhpazy hry liata pakha deikua cha ano hlâta a thatlô via aw ta, biehneina hnei aw ta, a biehneina cha biehneina rôhnah ngaitapa a châ aw.

6 Kô thokha a lei tawhta mianopazy cha a pazao aw ei ta; chho lâ bei sawchanônô cha maw lâ bei hnohna chata adyhna tao awpa ta a vy aw; châhrasala a thatlôna cha bopi ta hnei leipa aw ta, ano chhao kha aduah hra leipa aw ta; a thatlôna chhao abei sawchanô cha pie khaipa ta y aw ta, a vaw chhituhpa nata a satuhpa, cha nota ano tha a patlôtuhpa chhaota.

7 “Châhrasala a thari tawhta a kaw thaopa tawhtapa cha chyhsa pakha ano su liata aduah aw ta; cha cha pheisaih sahlao chhaota a vy aw ta, maw lâ abei kuh liana chata angia aw ta, âmo adyuh aw ta, a pahnie aw.

8 Ama khazohzy, ama khazoh nohthlahpa leipazy chhaota, ama tâkâri nata ngôh hmobaoh pha ngaitazy chhaota, Izi lâta siekhei khai aw ta; kô khazie tlyma cha maw lâ bei liata a pahâ chy aw.

9 Chatawhcha chho lâ bei khihnarâh liana chata maw lâ bei cha a vaw ngia aw ta, châhrasala ano râh lâta angia heih aw.

10 “A sawchapawpazy ta adyuh aw ei ta, pheisaih hri hluh ngaitapa aw pakhy aw ei ta, adyu aw ei ta, a kuh tlai chhao.

11 Chho lâ bei cha a pathi-ia ngaita aw ta, vaw puapa ta ano adyuh aw, maw lâ bei tlai cha; chatawhcha zawpi hluh ngaitapa chhaota pua aw ta, chyhsa hluhpi a ku liata piepa a châ aw.

12 Chyhsa hluhpi cha paviasapa châ aw ei ta, a pathipalôh a sa aw ta, thy hluhpi papao aw ta, châhrasala aduah patlô aw vei.

13 Maw lâ abei cha vaw thyu heih aw ta, zawpi a hmiakô liatahpa hlâta hluh via chhaota pua aw ta; daihti chhâna, kô chhâna tlai liana chata pheisaih hri hluh ngaitapa nata chhaichhi hluh ngaitapa chhaota a vaw pangai aw.

14 “Cha daihtizy liana chata chyhsa hluhpi, chho lâ bei adyuh awpa ta amâ duah aw; na chizy hry liata thachahra ta a taotuhpa zy chhaota aluahna cha patlôsa awpa ta a hmâh aw ei ta; châhrasala ama pao aw.

15 Chatanachata maw lâ bei cha a vy aw ta, tlâh byuhpa tao aw ta, khihpi kuh a ipa a hneipa cha a la aw. Chatawhcha chho lâ thatlôna chata pakhâ thei aw vei, a chyhsa tlypazy chhaota; a pakhâ thei awpa thatlôna rai y aw vei.

16 Chatanachata a vaw dyuhtuhpa chata a khopa hawhta tao aw ta, a hmiakô liata ahyhmah ta aduah aw veih ei; ano cha khihnarâh rôhnahpa liana chata a duah aw ta, a ku liata paraona a y aw.

17 A khihnarâh tlokhu thatlôna chhaota a vy a chhuah aw ta, a dyhna ta” ô aw ta, cha hawhta a tao aw. A parao nawpa ta a hnohta chanôzy sawchanônô pie aw ta, châhrasala aduah leipa aw ta, ano chata cha hra aw vei

18 He hnôh lâ heta cha liahpahlô lâ a heih aw ta, a hluhpi a la aw; châhrasala hyutuhpa pakha chata reipachhiena a reipa cha pabâ aw ta; a reipachhiena cha ano chô lilaw liata a paliesa aw.

19 Chatanachata ano khihnarâh tlai kuhzy lâna cha a heih aw ta; châhrasala a hluahpa ta pao aw ta, hmô theipa châ khao aw vei.

20 “Ano su liana chata chyhsa pakha, khihnarâh rôhnahna liata chhiekheituhpa a sie pahliesatuh awpa cha a vaw duah aw ta; châhrasala bohpi leipa ta pathi-iana vâta châ leipa ta, adyuhna vâta chhao châ hra leipa ta, pahleipadiapa ta a y aw.

21 A su liana chata chyhsa mohnao chhihpa, palyupalihna ama pie leipa cha a vaw duah aw; châhrasala khihnarâh thlahlôh nota a vy aw ta, reikah thaipa ta khihnarâh cha a to aw.

22 A hmia lâta chyhsa cha ti laipa thatlôna ta pahleipa ta y aw ta, kei parao khaipa ta ama y aw; biehrai hyutuhpa taihta.

23 A hnohta biehrai tao hnôh lâna chata piepie ngaitapa ta y aw ta; a vaw duah aw ta, zawpi chyhpatazy chhaota a tha vaw tlô aw.

24 Thlahlôhna daihti nota khihnarâh kao pha chaipa liata vaw hria aw ta; a pawzy nata a paw pawzy tao beih leipa cha a tao aw, chyhsazy hry liana chata hraona nata hraona hmozy, sôhzy a hie patla aw: kuh a ipazy chô liana chata daihti buakha chhôhta adyuh awpa ta a chhuahnoh aw.

25 A hmotaotheina nata a riahphana cha pheisaih hri hluh ngaitapa chhaota, chho lâ abei chô liata pathyu aw ta; chatawhcha chho lâ bei chata pheisaih hri hluh ngaitapa nata thatlô ngaitapa chhaota adyuh aw ta; châhrasala aduah thei aw vei, a chô liana chata teina kheihawhpa tlyma vaw tei aw ei ta.

26 A pati pahâhpa a nietuhpazy tlai chata ano pahleipadia aw ei ta; a pheisaih hrizy cha topa ta y aw ei ta, a hluhpi cha thiepa ta ama y aw.

27 He abei panozy he ama pathipalôh liata hmo peipa tao khohpa cha rairieh aw ei ta; tlâhkhai su kha liata haipa ama reih aw, châhrasala khâpa hrao leipa a châ aw; a chhâna cha daihti raopa liata châ tlôh aw ta.

28 Sôh hluhpi chhaota ano khihnarâh lâta kua heih aw ta, a pathipalôh cha pathipalôh pathaihpa adyuhpa ta a y aw. Cha hawhta tao aw ta, ano khihnarâh tlai lâta aduah heih aw.

29 “Daihti raopa liana chata vaw kua heih aw ta, chho lâta sie aw ta; châhrasala a hnôh lâ viapa liana heta cha a hmia lâtahpa hawhna cha châ aw vei.

30 Kitima balyhzy chata ano amâ vaw dyuh aw, chatanachata a palôh châ leipa aw ta, kua aw ta, biehrai pathaihpa chô liana chata a pathi-ia aw ta, cha hawhta a tao aw, kua heih aw ta, biehrai pathaihpa a heisaituhpazy cha a ly aw.

31 Pheisaihzy chata ano châta adyuh aw ei ta, supathaihpazy papuapalei aw ei ta, kuh tlai chhao cha; raopa hlâna a y lymâpa cha pahlei aw ei ta. Roryhrana pasichhihna cha tlao ama paduasa aw.

32 Biehrai chô liata molei ngaitapa ta a taotuhpazy cha reikah thaipa ta parao aw ta; châhrasala chyhsa ama Khazohpa a pahnotuhpazy kha cha a i aw ei ta, hmo rôhnah ngaitapa ama tao aw.

33 Chyhsa hryta a sopazy chata chyhsa hluhpi pachu aw ei ta, châhrasala zaozi zy, mei paleih zy, seichâna zy nata hraona zy ta chyhsa hluhpi ama pao aw.

34 Ama pao no chhaota baona a chyhta ta deipa ta y aw ei ta. Chyhsa hluhpi ta reikah thaipa ta âmo ama vaw zy aw;

35 a sopazy hry ta thokhazy chata âmo pasia awpa nata pathai awpa nata padisa awpa ta ama pao pâ aw, chhâna daihti taih chhaota, daihti raopa liata khâ a châpa vâta.

36 “Abei chata a khopa hawhta tao aw ta; ano a pasâhsa aw ta, khazoh to chô liata a palai aw ta, khazohzy Khazohpa adyuhpa ta hmo noâhchhi ngaitapazy a reih aw. Pathi-iana papaipa a châ hlâta cha tao thei aw ta; rao chiehpa cha tao tlai awpa châ tlôh ta.

37 A pathlatuhpazy khazohzy cha apapeisa leipa aw ta, chanôzy kho viapa nata khazoh rai a papeisa hra aw vei, chyhsa zydua chô liata a palai tlôh aw ta.

38 Cha hlâta cha cha kuhzy khazoh cha palyupalih aw ta; khazoh, a pawzy chhaota ama pahno beih leipa kha ngôh zy, lôsôhpazy nata hmo khochhihpazy chhaota a palyupalih aw.

39 Khazoh nano ngaitapa baona ta kuh a i ngaitapazy cha adyuh aw ta; ahyrai a pyhpa maih cha a parôhnahsa aw. A hluhpi chô liata ryu pareisa aw ta, khihnarâh cha a ty hneipa ta a rai aw.

40 “Chhâna daihti liana chata chho lâ abei ta ano a vaw dyuh aw ta; maw lâ bei chata talaili zy, arâ a kiahpa chyhsa nata balyh hluhpi chhaota khisô hawh tlaita ano a vaw dyuh aw; khihnarâh cha a ngia aw ta, pahnie aw ta, a siepalâh aw.

41 Khihnarâh rôhnahpa chhao a ngia aw ta. A hluhpi papaopa a châ aw, châhrasala a ku tawhtapa hezy he cha pachhapa ama châ aw: Edôma nata Môaba nata Amawna chyhsa phapazy.

42 Khihnarâhzy chô liata chhao a ku hy aw ta, Izi chhaota khôkhâh aw vei.

43 Ano cha ngôh nata tâkâri so pakhypazy chô liata nata Izi hmo sôhpa zydua chô liata bie a hnei aw; chatawhcha Libia mozy nata Ethiôpia mozy cha ano baokhâtuhpa ama châ aw.

44 Châhrasala nochhi lâ nata maw lâ tawhta bie pathâhpa ta ano a patypamâ aw, chatanachata chyhsa hluhpi pahleipadia awpa nata pamo awpa ta pathi-ia ngaitapa ta a pua aw.

45 Chatawhcha tilaipi nata tlâh pathaihpa rôhnah ngaitapa likawh liana chata abei poh-o cha patyu aw ta; châhrasala a chhâna a tlôpa châ aw ta, ahy hmah ta bao aw veih ei.

  
Scroll to see more.