2 Thatihzy Rona 16

¹ Asa kô sythôh nata kô charu a bei kô ta Izarel beipa Baasha chata Zudah zy adyuh ta, Zudah beipa Asa lâta a ngia awpa nata a pua awpa pakhâ nawpa ta Ramah khih tao ta.

² Asa ta ABEIPA o nata abei o liata ryu tâkâri nata ngôhzy cha la ta, Damaska liata Suria beipa Benhada hnohta,

³ “Ei pâ nata na paw likawh ta biehraipa a ypa hawh hra ta, eima likawh liata biehrai y ta; tâkâri nata ngôh zy ei cha paphao; Izarel beipa Baasha hnohta na biehraipa kha parao la, ano cha eina paisai nawpa ta,” tahpa ta paphao ta.

⁴ Benhada chata Abei Asa bie cha a vaw pyh ta; chatawhcha Izarel khih zy cha adyuh awpa ta pheisaih hyutuhpa zy tuah ta, Izô zy, Dana zy, Abelamai zy, Nathalai râh liata hmobaoh sona khih zydua adyuh ei ta.

⁵ Chatawhcha Baasha ta cha bie cha a vaw thei pata nahta Ramah khih a sa haipa cha a chalih sai ta, a hmotao a chhuahpa cha bâhsai haw ta.

⁶ Chatanachata Abei Asa chata Zudah chyhsa zydua cha a chhi ta, Baasha ta Ramah khih sa nawpa ta alô nata tho a hmâpa zy cha la khai ei ta, cha chata Keba nata Mizpah khih tao ta.

⁷ Cha nona chata hrohsopa Hanani cha Zudah beipa Asa lâta a vy ta, a hnohta, “ABEIPA na Khazohpa ngâ leipa ta Suria beipa ngâ chi ta, chavâta Suria beipa pheisaih sahlaozy cha na pathlie haw.

⁸ Ethiôpia mo nata Libia mozy cha pheisaih sahlao lai ngaitapa talaili nata arâ a kiahpa hluh ngaitapa châ vei ei mâ? Châhrasala ABEIPA na ngâpa vâna khata na ku liata a cha pie.

⁹ Ano lâta palôhrupa do ngaitapa a phaohtuhpa zy chô liata a thatlô zie palâsa awpa ta khizaw zydua liata ABEIPA mo cha tawpâ tyh ta. Hru ngaitapa ta hmo na tao he; atahmâ tawhta la adyuhpa na hnei ngâthlâh ha aw,” tah ta.

¹⁰ Chatanachata Asa cha hrohsopa chô liana chata a pathi-ia ta, patâhna o liata khô ha ta, a bie reipa vâta a pathi-ia ngaita ta. Asa chata chyhsa thokha zy chhao taolapâ lymâ ta.

¹¹ Asa thâtih cha a thaona tawhta a chhâna taihta, Zudah nata Izarel abeizy Châbu liata a y.

¹² Kô sythôh nata kô chaki a bei kô ta, Asa cha a phei pasa haw ta, a pasapa cha thata a châ; châhrasala a pasana liana chata ABEIPA a chhohia leipa ta thohna a thaipa zy tlao a chhohia ta.

¹³ Asa cha a mahpaw zy hnohta a mô ta, kô sypalih nata kô kha a bei kô ta thi ta.

¹⁴ Davi khihpi liata ano châta taopa ano thlâ liata pabu ei ta. Rohpahâhpa pahâh ngaitapa rohpahâhpa a taotuhpa zy ta rohpahâhpa chi nanopa ama taopa ta a biepa a rakhô liata pazia ei ta; ano châta mei thata patih ei ta.