2 Thatihzy Rona 17

Studie

  

1 Asa sawchapawpa Zehôsapha cha ano vyuhpa ta a bei ta, Izarel mozy adyuh awpa ta a ipa ta a padua ta.

2 Zudah râh liata kuh a hneipa khih zydua liata pheisaih zy soh ta, Zudah râh nata a paw Asa ta a vaw lapa Ephrai râh liata khihzy liana chata riahvaihtuhpa zy soh ta.

3 Zehôsapha hnohna chata ABEIPA y ta, Baal zy tlua leipa ta, a mahpaw Davi ta a chhih hawpa lâpi cha a chhihpa ta,

4 ama mahpaw zy Khazohpa cha tluapa ta, Izarel mozy tao hawhpa tao leipa ta, a biepiepa zy tlao a zyhpa vâta.

5 Chavâta ABEIPA ta a khihnarâh cha a ku liata pa-i ta; Zudah râh liata chyhsa zydua ta Zehôsapha cha lymâ vaw pie ei ta; vaw hneirôh ta, za a chhih ngaita kaw ta.

6 A palôhrupa cha ABEIPA lâta pahei ta; Zudah râh liatahpa su sâhpa zy nata Ashera zy pahleipadia khai hra ta.

7 Kô thôh a bei kô ta, a chyhsa laipa Benhai zy, Ôbadia zy, Zekariah zy, Nethanel zy, Mikai zy cha Zudah râh khih liata chyhsa zy pachu awpa ta tuah hra ta;

8 Livai chyhsa Shemaiah zy, Nethaniah zy, Zebadiah zy, Asahel zy, Shemiramô zy, Zehônatha zy, Adônizah zy, Tôbizah zy, Tôbadônizah zy a hlao hra ei ta; Livai chyhsa zy hnohta theihthaipa Elishama nata Zehôra zy a hlao hra ei ta.

9 ABEIPA ryhpa châbu cheih ei ta, Zudah râh liana chata pachu ei ta; Zudah râh khih zydua chahryh ei ta, chyhsa zy pachu ei ta.

10 Zudah râh chheipâh râh zydua liata chyhsa zy chata ABEIPA cha chi ei ta, ahyhmah ta Zehôsapha cha adyuh ngâh leipa ei ta.

11 Philistina mo thokha ta Zehôsapha cha lymâ vaw pie ei ta, chhie châta tâkâri zy pie hra ei ta; Arabia mozy chhaota ama sahroh zaw mietahkupa tôhpa sâh sari nata za sari nata mie tôhpa sâh sari nata za sari a vaw chhi ei ta.

12 Chatanachata Zehôsapha cha rôhnah via lymâ ta; Zudah râh liata kuhzy nata hmo sopakhyna khihzy sa ta,

13 Zudah râh khihzy liana chata raihria hluhpi hnei ta. Zerusale liata pheisaih thatlôpa riahphapa zy thata hnei hra ta.

14 Ama chhôhkha lymâ ta ama yzie cha he tana he a châ: Zudah chhôhkha liata sâh kha hyutuhpa zy cha, hyutuhpa Adnah chata chyhsa thatlôpa riahphapa thy sythôh hyu ta,

15 a pazipa hyutuhpa Zehôhana ta thy syno nata thy charie hyu ta.

16 a pazipa Zikri sawchapawpa Amasiah cha a pasaih ngaitapa ta ABEIPA châta a piepa chyhsa thatlôpa riahphapa thy syno hyu ta,

17 Benzami chhôhkha zy, chyhsa thatlôpa riahphapa Eliada ta libaw nata vyhphao a hmâhpa chyhsa thy syno hyu ta,

18 a pazipa Zehôzaba chata chariah adyuh awpa ta amâ chhipa thy sy kha nata thy charie hyu ta.

19 He zydua he Zudah râh liata kuh a hneipa khih liata abei ta a sopa zy rei leipa ta a bei hnohta a ypazy ama châ.