1 Abeizy 19

Study

          |

1 Ahaba ta Elaiza hmotaopa zydua, zaozi ta hrohsopa zydua a thiepa THÂTIHZY chhao, Zezebel chho ta.

2 Chatanachata Zezebel chata Elaiza hnohta, “Kha chyhsa zy hry liata mo pakha hrona hawhna khata mylâ atahmâ ti hlâta na hrona ei cha taopa leipa khiahtala khazoh zy ta âmo tao ta tao ei sala, cha hlâta tha via chhaota,” tahpa ta chyhsa tuah ta.

3 Chatanachata chi ta, thyu ta, a râ haw ta, Zudah râh liata Besheba khih kei tlô ta, cha liana chata a chakaotuhpa siesai ta.

4 Ano deikua cha râhpathohpa lâta noh kha siena liata sie ta, zunipa tho ry liata a tyuh ta; thi awpa ta hiah ta, “Â daih ha na; hy ABEIPA y, atahmâ heta ei hrona he la thlâh ha teh, ei mahpaw zy hlâta pha via tlôh lei khâh na ta,” tah ta.

5 Chatanachata zunipa tho ry liana chata a zia ta, a mô haw ta; vâlyuhchâpa ta vaw hria ta, a hnohta, “Thyu la, nie teh,” tah ta.

6 Chatawhcha mohmia pasaih ta, a luh chô liana chata viahchhâ alô sapa liata pakâhpa nata titheih vaw y ta. Chatanachata nie ta doh ta, a zia haw heih ta.

7 ABEIPA vâlyuhchâpa cha a ei nona ta a vy heih ta, vaw hria ta, “Thyu la, nie teh, na siena awpa na châta a ru tu ha na,” tah ta.

8 Chatawhcha thyu ta, nie ta, doh ta, cha pati vâna chata a tha vaw y ta, Khazohpa tlâh Hôriba taihta noh sypalih nata zâ sypalih sie ta.

9 Cha liata lôpu miakha cha kei tlô ta, cha liana chata y haw ta, ABEIPA bie cha a hnohta vaw tlô ta, a hnohta, “Elaiza he liana heta khâpa na tao?” tah ta.

10 Ano chata, “ABEIPA Pheisaih zy Khazohpa châta pahnai a ngiah ngaita tyh na ta; Izarel pathlazy hra chata na biehrai a heisai ei ta, na maisâh zy pacho ei ta, na hrohsopa zy zaozi ta chhawh sao tlôh ei ta; a laibâpa cha keima, keima tlai deita he châ na ta; ei hrona na lapa amâ chhuah,” tah ta.

11 Chatawhcha ano chata, “Pua la, tlâh lâna haota ABEIPA hmiakô liata a kei duah teh,” tah ta. ABEIPA ta sie pakhô ta, thlihpi ru ngaitapa ta tlâh zy cha ABEIPA hmiakô liata a keina taihta vaw hmô ta, lôpanô zy cha a patlaw chheih ta, châhrasala thlih liana chata ABEIPA cha y vei, thlih a pathli khai tawhna chata alo a vaw sih ta, châhrasala alosihpa liana chata ABEIPA cha y vei;

12 alo a sih khai tawhna chata mei vaw pua ta, châhrasala mei liana chata ABEIPA cha y vei; mei khai tawhna chata ao dipa, a naipa he vaw pua ta.

13 Elaiza ta cha cha athei nahta a poh ta a hmia a khu ta, kei pua ta, lôpu paka liata a kei duah ta. Chatawhcha ao ta a hnohta, “Elaiza, he liana heta khâpa na tao?” vaw tah ta,

14 Ano chata, “ABEIPA Pheisaih zy Khazohpa chata phahnai a ngiah ngaita tyh na ta; Izarel pathlazy hra chata na biehrai a heisai ei ta, na maisâh pacho ei ta, na hrohsopa zy zaozi ta chhawh sao tlôh ei ta; a laibâhpa cha keima tlai deita he châ na ta; ei hrona na lapa amâ chhuah,” tah ta.

15 ABEIPA ta a hnohta, “Kua heih la, râhpathohpa lâta Damaska khih lâta sie teh; na kei tlô nahta Suria beipa chata Ahazael sathaw thu aw chi ta;

16 Izarel abeipa chata Nimshi sawchapawpa Zehu sathaw thu aw chi ta; nâma vyuhpa ta hrohsopa a châ awpa ta Abelmehôlah khihpa Shapha sawchapawpa Elaisa sathaw na thu hra aw.

17 Chatawhcha Hazael zaozi a khôkhâhpa maih cha Elaisa ta a thie aw.

18 Châhrasala Izarel râh liana heta Baal hmiakô liata pakhu paneih beih leipa na ta, a sy beih leipa chyhsa sâh sari kei châta ei pahlôh aw,” tah ta.

19 Cha tawhtapa cha pua ta, Shapha sawchapawpa Elaisa cha kei hmô ta, ano chata alei vaw palie ta, a hmiakô liana chata viahchao bao hrawhleino y ta, a miahrawhleinona cha ano ta haoh ta. Elaiza ta kei pangai ta, a poh cha thythlu ta.

20 Chatawhcha viahchao zy cha siesai ta, Elaiza cha a chadai ta, “Ei nâ nata ei pâ kei sy tua aw na ta, chatanachata ei cha vaw zi aw,” tah ta. Chatawhcha ano chata a hnohta, “Va kua mah y; khâpa ei cha tah tly?” tah ta.

21 Chatawhcha a kei zipa cha kua ta, viahchao bao kha a haopa cha thie ta, a sapa cha viahchao chhaichhi zy chata pasyu ta, chyhsa zy rai ta, nie haw ei ta. Chatanachata thyu ta, Elaiza cha a chadai ta, chakao haw ta.