1 Abeizy 18

Studie

          |

1 Noh hluhpi hnôh lâna chata a kô thôhpa kô liana chata ABEIPA bie Elaiza hnohta vaw tlô ta, “Sie la, Ahaba lâta a kei luah teh; alei chô liana heta vâsua ei vaw pasuasa aw na,” tahpa ta.

2 Chatawhcha Elaiza cha Ahaba lâta a luah awpa ta sie ta. Samari râh liana chata chakâhna cha ru ngaita ta.

3 Ahaba ta Ôbadia a o chhôh lâta hyutuhpa cha aw ta. (Ôbadia cha ABEIPA a chi ngaitapa chyhsa châ ta;

4 Zezebel ta ABEIPA hrohsopa zy a thie nona khata Ôbadia chata hrohsopa za kha a chhi ta, lôpu liata sypangawh sai ta nyu ta, viahchhâ nata ti ta a pasa tyh.)

5 Chatawhcha Ahaba ta Ôbadia hnohta, “Tihnawh zydua nata saikao zydua yna lâ râh chahryh teh; arâ nata sabaitu zy he eima pachha thei nawpa ta sibiepa zy eima hmô thei ngyu aw, chata leipa ta cha sahroh zy he eima pahlei khai pathlei aw na,” tah ta.

6 Chatanachata râh chahry awpa ta a rai ei ta; Ahaba cha ano deita lâpi hropa lâta sie ta, Ôbadia cha ano deita lâpi hropa lâta sie ta.

7 Chatawhcha cha hawhta Ôbadia a sie nona chata Elaiza nata a tyh ei ta; ano chata pahno thlâh ha ta, chatanachata â khu lâta pao ta, “Nâma ma na châ, ei zibeipa Elaiza?” tah ta.

8 Ano chata a chhy ta. “Ei châ na, sie la, ‘Elaiza hao liana hao ta a y,’ tahpa ta na zibeipa kei chho teh,” tah ta.

9 Ano chata, “Khâpa hmo ma parao na ta, na chakaotuhpa he thie awpa ta Ahaba ku liata pie na khoh tly?

10 ABEIPA na Khazohpa hrona reipa ta ei reih, ei zibeipa ta nâma patluasa leina pho nata râh rai hnei vei, ‘He liata y vei,’ ama tah khiahtala, ama cha hmô leina kyh liata râh nata pho cha chhie a pasasa lymâ.

11 Atahmâ he nâma ta, ‘Sie la, “Elaiza hao liana hao ta a y,” tahpa ta na zibeipa kei chho teh,’ tah chi ta.

12 Ei cha siesai pata nahta ABEIPA Thlahpa ta ei pahno leina lâ cha chhi tlôh aw ta; chatanachata Ahaba kei chhopa ta, a cha hmô thei tlôh vei khiahta cha eina thie thlâh ha aw mâ tâh, châhrasala na chakaotuhpa heta ei thyutlia no tawhta ABEIPA cha chi tyh tlôh na ta.

13 Zezebel ta ABEIPA hrohsopa zy a thie nota ei hmotaopa ABEIPA hrohsopa zy hry liatahpa chyhsa za kha, sypangawh sai ta, lôpu liata nyupa ta viahchhâ nata ti ta ei pasazie zy kha ei zibeipa he cha chho vei ei mâ? Atahmâ he nâma ta, ‘Sie la, “Elaiza cha hao liana hao ta a y,” tahpa ta na zibeipa kei chho teh,’ tah chi ta, eina thie aw mâ tâh,” tah ta.

15 Elaiza chata, “A kiapâh liata ei y tyhna Pheisaih zy ABEIPA hrona reipa ta ei reih, atanoh he ano lâta ei luah thlyu awpa a châ,” tah ta.

16 Chatanachata Ôbadia cha Ahaba bie a chho awpa ta sie ta. kei chho haw ta; Ahaba cha Elaiza hmô a chhuahpa ta sie haw ta.

17 Ahaba ta Elaiza a kei hmô nahta Ahaba ta a hnohta, “Nâma na châ, Izarel sahlao nô a papotuhpa chi cha?” tah ta.

18 Ano chata a hnohta, “Izarel sahlao nô papo va na; nâma nata na paw chhôhkha zy ta ama nô tlao nama papo, ABEIPA biepiepa zy he a heisaipa ta, Baal tlao nâ pyhpa liana heta.

19 Chatanachata atahmâ he Izarel sahlao zydua nata Baal hrohsopa za palih nata sypangawh nata Ashera hrohsopa Zezebel tlâhkhai liata pati a dôh tyhpa za palih zy kha, kei lâta Kamel Tlâh liana heta kei pa-awsa teh,” tah ta.

20 Chatanachata Ahaba ta Izarel pathla zydua lâta chyhsa tuah ta, hrohsopa sahlao zy cha Kamel Tlâh liana chata aw pakhy ta.

21 Elaiza chata zawpi sahlao zydua cha a kei hnia ta, “Noraipa ta khachâ e nama y aw, ABEIPA cha Khazohpa a châ khiahtala, ano cha zi ula; Baal a châ khiahta ano cha zi teh u,” tah ta. Zawpi zy chata kawh kha hmahta a chhy leipa ei ta.

22 Elaiza ta zawpi zy hnohna cha, “ABEIPA hrohsopa a ypa cha keima deita he châ na ta; Baal hrohsopa zy deikua cha chyhsa za palih nata sypangawh châ ei ta.

23 Viahchao tôhpa pô no maniah vaw pie ei sala; âmo ta viahchao tôhpa pô kha cha âmo chata a tlyh ei sala, pachhaih khai ei sala, tho chô liana chata soh ei sala, a ry liata mei pati leipa ta; keima ta viahchao tôhpa pô kha cha a chhuahno hra aw na ta, tho chô liana chata soh aw na ta, mei pati hra aw va na.

24 Chatawhcha nâmo ta nama khazoh moh cha pado ula, kei chhaota ABEIPA moh pado aw na ta; chatanachata mei ta a vaw chhytuhpa Khazohpa cha Khazohpa châ mawh sy,” tah ta. Chatawhcha chyhsa zydua chata a chhy ei ta, “Â do na,” tah ei ta.

25 Chatanachata Elaiza ta Baal hrohsopa zy hnohna chata “Nâmo ta viahchao tôhpa pô kha he, nâmo a tlyh ula, a chhuahnoh tua teh u, nâmo lâ nama hluh via hih; nama khazoh moh cha pado ula, anodeikuacha a ry liata mei pati khah u,” tah ta.

26 Chatawhcha viahchao tôhpa âmo chata la ei ta, a chhuahnoh ei ta, “Hy Baal y, maniah a chhy teh;” tahpa ta my tawhta nohchhô taihta Baal moh cha pado ei ta. Châhrasala ao pyury rai cha y leipa ta, a chhytuhpa rai y hra veih ei. Chatawhcha ama maisâh taopa kiapâh liana chata a chotlai ngâ ei ta.

27 Chatawhcha nohchhô locho ta Elaiza chata âmo cha taolapa ta, “A paropa ta aw tuh châ, khazoh châ tlôh ta; a pachâ chy tlyma, â nyu chy tlyma, a sie ha chy tlyma, a châ vei khiahtala phie a mô ha ta, pahra awpa tlyma a châ aw na,” tah ta.

28 Chatawhcha ao paro ngaitapa ta awh ei ta, ama tao tyhna zie hawhta chaizôh nata asei ta thi loh ngâna taihta a âpa ta a dy ei ta.

29 Chatawhcha noh a kia nahta zâlâ atheihna daihti taihta a chia ngâ ei ta, châhrasala ao pyury rai y leipa ta; a chhytuhpa rai tlyma, a vaw pachâtuhpa rai tlyma y hra veih ei.

30 Chatanachata Elaiza ta zawpi zydua hnohna chata, “Nâ vaw hnia teh u.” tah ta; zawpi zydua chata a kei hnia ei ta. ABEIPA maisâh pacho hawpa cha tao pathi ta;

31 “Na moh cha Izarel a châ aw,” tahpa ta ABEIPA bie a totuhpa Zakaw sawzy pho hluhna zie alô miahrawhleino Elaiza ta la ta;

32 alô zy chata ABEIPA moh ta maisâh tao ta. Chatawhcha maisâh chheipâh cha sâh chi panuana hmo no tuna tlai a kawhpa ta chao ta.

33 Chatawhcha tho cha a phapa ta pacho ta, viahchao tôhpa cha pachhai ta, tho chô liana chata soh ta. “Beih mia palih ti ta pabie ula, rao hlâta tho he vaw hry teh u,” tah ta.

34 “Ei nona ta vaw hry heih teh u,” tah ta; ei nona ta vaw hry heih ei ta. “Ei thôhna ta vaw hry heih teh u,” tah ta, vaw hry chanei heih ei ta.

35 Chatawhcha ti cha maisâh kiapâh liana chata loh ngâ kaw ta, ama chaopa cha ti ta pabi hra ta.

36 Chatawhcha zâlâ atheihna daihti no ta, hrohsopa Elaiza chata a kei hnia ta, “Hy ABEIPA Abaraha zy, Aisika zy, Izarel zy Khazohpa y, nâma he Izarel râh liata Khazohpa na châpa nata keima he na chakaotuhpa châ na ta, he zydua he nâma bieta a taopa ei châ, atanoh heta pahno chyu ei se.

37 Nâ vaw chhy la, he zawpi zy heta nama ABEIPA chi he Khazohpa châ chi ta, ama pathipalôh zy na pakuasa haw heih tahpa he ama pahno thei nawpa ta hy ABEIPA y, nâ vaw chhy mah y,” tah ta.

38 Chatawhcha ABEIPA mei cha vaw tla ta, raopa hlâna zy, tho zy, alô zy, buhchâh zy cha kâ patlô ta, chaopa liata ti cha pali khai haw ta.

39 Chatawhcha zawpi zydua ta cha cha ama hmô nahta a khu lâta pao ei ta; ABEIPA he Khazohpa cha a châ na; ABEIPA he Khazohpa cha a châ na,” tah ei ta.

40 Elaiza ta ama hnohta, “Baal hrohsopa zy he patu ula; pakha hmahta pathlie khah u,” tah ta. Chatawhcha patu ei ta; Elaiza ta Kisaw chavah lâta za chhihtha ta, cha liana chata thie khai ta.

41 Chatawhcha Elaiza ta Ahaba hnohta, “Khy la, niepa ta doh teh, vâkatlâh a suah awpa pyu a y na,” tah ta.

42 Chatanachata Ahaba cha nie nata do awpa ta khy ta. Elaiza cha Kamel Tlâh laki lâta khy ta; alei lâ a khu ta, a keih likawh liata a hmia soh ta.

43 Chatawhcha a chakaotuhpa hnohta, “Khy la, tilaipi la kei sai tua,” tah ta. Chatawhcha khy ta, kei sai ta, “Khâpa hmah y vei,” tah ta. Ano chata, “Khy heih teh, ei sari ta,” tah ta.

44 A ei sarina liana chata, “Tilaipi tawhta chyhsapa ku tie ta ameih a kaw kiah ngâpa ei hmô,” tah ta. Chatawhcha ano chata, “Va vawh la, Ahaba hnohta, ‘Na talaili a chhuahnoh la zu bâ teh, vâsua ta a cha pakhâ pathlei aw,’ tah mah y,” tah ta.

45 Chatawhcha buakha ta tawhta avâ cha thlih nata ameih ta vaw zoh ta, vâkatlâh vaw suah haw ta. Chatawhcha Ahaba cha talaili liata kiahpa ta Zezrel khih lâta sie haw ta.

46 ABEIPA hmotaotheina cha Elaiza chô liata y ta; chatanachata a poh a sai ta, Ahaba hmiakô lâna chata Zezrel khih a ngiana taihta a râ haw ta.