1 Thatihzy Rona 23

Studie

         |

1 Davi cha a hro pasih ta, vaw machâ kaw ha ta, chatanachata a sawchapawpa cha Izarelzy abei ta tao ta."

2 Izarel sahlao pawhrâhpa zydua cha theihthaipa zy nata Livai sahlao zy chhaota Davi ta awpakhy ta.

3 Livai sahlaozy cha kô sythôh tawhta a chô lâ reipa châ ei ta, ama hluhna zie cha pitlohpa thy thôh nata sâh charie ama châ.

4 Davi ta, “Chazy hry liata thy no nata sâh palih cha ABEIPA o a satuhpa sahlao hyutuhpa châ ei ta, chatawhcha sâh charu cha hyutuhpa zy nata ryureituh awpa zy châ ei ta,

5 sâh palih cha ochhivaihtuhpa awpa zy châ ei ta, sâh palih cha reithai nawpa ta paro pasyupa a tôpa chi ei taopazy hmâpa ta ABEIPA a reithaituh awpa zy ama châ,” tah ta.

6 Chatawhcha Livai saw Kesaoma zy, Kôha zy, Merari zy hluhzie ta Davi ta py zy tao ta.

7 Kesaoma mozy cha Ladana nata Shimei ama châ.

8 Ladana sawzy cha: pawhrâh chaipa Zeiel zy, Zethama zy, Zôel zy pathôh ama châ.

9 Shimei sawzy cha: Shelômô zy, Haziel zy, Harana zy, pathôh ama châ. Hezy he Ladana pathla chhôhkha pawhrâhpa zy cha ama châ.

10 Shimei sawzy cha: Zaha zy, Zina zy, Zeusa zy, Beriah zy ama châ. He papalih he Shimei sawzy cha ama châ.

11 Zaha cha a uhthei chaipa châ ta, Zizah cha a panona a châ; Zeusa nata Beriah deikua cha saw a hluh hnei leipa ei ta, chavâta chhôhkha hawhta reipa ama châ.

12 Kôha sawzy cha: Amira zy, Izha zy, Hebraw zy, Uziel zy, papalih ama châ.

13 Amira sawzy cha: Arawna nata Mawsi ama châ. Arawna cha ano nata a pathlazy cha chhâzaw châta hmo pathaih ngaitapa zy pathaisapa ta chhâzaw ta ABEIPA hmiakô liata rohpahâhpa raopa ta chakaopa ta a moh ta byhnâ a awtuh awpa ta pananopa ama châ.

14 Khazohpa chyhsa Mawsi sawzy deikua cha Livai pho hry liata reipa ama châ.

15 Mawsi sawzy cha: Kesaoma nata Elieza ama châ.

16 Kesaoma sawzy liata uhthei chaipa cha Shebuel a châ.

17 Elieza sawzy liata uhthei chaipa cha Rehabiah a châ; Elieza chata sawchapawpa hropa rai hnei vei, Rehabiah deikua chata sawchapawpa hluhpi a hnei.

18 Izha sawzy liata uhthei chaipa cha Shelômô a châ.

19 Hebraw sawzy liata uhthei chaipa cha Zeriah châ ta, a panona cha Amariah, a pathôhna cha Zahaziel, a papalihna cha Zekamia a châ.

20 Uziel sawzy liata uhthei chaipa cha Mika châ ta, a panona cha Zesia a châ.

21 Merari sawzy cha: Mahli nata Musi ama châ. Mahli sawzy cha: Eliaza nata Kisa ama châ.

22 Eliaza cha thi ta, sawchapawpa zy hnei leipa ta, sawchanôzy deita hnei ta; Kisa sawchapawpa ama rilâhpa heihpa zy ta lahpinô ta hnei ei ta.

23 Musi sawzy cha: Mahli zy, Edera zy, Zeremô zy, pathôh ama châ.

24 Chazy cha Livai pathla ama chhôhkha lymâ hawhta moh ropa ta ama reipa chhôhkha pawhrâhpa, ABEIPA o sapa ta a hriapa kô syno chô lâta reipa zydua ama châ.

25 Davi ta, “ABEIPA Izarel zy Khazohpa ta a chyhsa zy cha thlahlôh ngaitapa ta paysa ta; Zerusale liata chhâzaw ta pahrâ thlâh ha ta.

26 Livai mozy chhao heta achhyna byureih nata a chakao nawpa ta hmobaoh zydua he amâ sy awpa byuh khao vei,” a tah.

27 Davi biepiepa hnôh chaipa a châpa vâta Livai mozy cha kô syno tawhta a chô lâ taihta reipa châ tlôh ei ta.

28 Ama raihria cha Khazohpa o liata chakaopa ta Arawna sawchapawpa zy baopa ta, dôhpachhôh nata chhôhpadâhpa chhôh liata hmo pathaihpa zydua pathaisapa ta, ABEIPA o liata chakaopa châ tlôh ta;

29 viahchhâ a rao awpa zy, niepa hlâna châta viahdie di ngaitapa thinô pahlao leipa ta viahchhâ a pahpa tlyma, beih liata pakâhpa tlyma, chateipa tlyma, panuapa nata a laina zie zydua awpa a chhuahnohpa zy chhaota.

30 Chatawhcha my chareih a duahpa ta ABEIPA lâta alyna bie reipa nata ano reithaipa zy chhao, zâlâ chhao cha hawhta hra,

31 pahânoh liata zy, thla thiehpa liata zy, kyhchhi daihti a hneipa liata zy a tao awpa ta raopa lymâ hawhta, ABEIPA lâta raopa hlâna zydua, ABEIPA hmiakô liata khâ hlâpa zy chhaota.

32 Chatawhcha achhyna poh-o mohôhpa zy, su pathaihpa mohôhpa zy, ABEIPA o liata chakaopa ta ama unawhpa Arawna sawchapawpa zy ta tao awpa ama raopa maih taopa zy chhao,” tah ta.