¹ אני הגבר ראה עני בשבט עברתו׃

² אותי נהג וילך חשך ולא אור׃

³ אך בי ישב יהפך ידו כל היום׃

⁴ בלה בשרי ועורי שבר עצמותי׃

⁵ בנה עלי ויקף ראש ותלאה׃

⁶ במחשכים הושיבני כמתי עולם׃

⁷ גדר בעדי ולא אצא הכביד נחשתי׃

⁸ גם כי אזעק ואשוע שתם תפלתי׃

⁹ גדר דרכי בגזית נתיבתי עוה׃

¹⁰ דב ארב הוא לי אריה במסתרים׃

¹¹ דרכי סורר ויפשחני שמני שמם׃

¹² דרך קשתו ויציבני כמטרא לחץ׃

¹³ הביא בכליותי בני אשפתו׃

¹⁴ הייתי שחק לכל עמי נגינתם כל היום׃

¹⁵ השביעני במרורים הרוני לענה׃

¹⁶ ויגרס בחצץ שני הכפישני באפר׃

¹⁷ ותזנח משלום נפשי נשיתי טובה׃

¹⁸ ואמר אבד נצחי ותוחלתי מיהוה׃

¹⁹ זכר עניי ומרודי לענה וראש׃

²⁰ זכור תזכור ותשיח עלי נפשי׃

²¹ זאת אשיב אל לבי על כן אוחיל׃

²² חסדי יהוה כי לא תמנו כי לא כלו רחמיו׃

²³ חדשים לבקרים רבה אמונתך׃

²⁴ חלקי יהוה אמרה נפשי על כן אוחיל לו׃

²⁵ טוב יהוה לקוו לנפש תדרשנו׃

²⁶ טוב ויחיל ודומם לתשועת יהוה׃

²⁷ טוב לגבר כי ישא על בנעוריו׃

²⁸ ישב בדד וידם כי נטל עליו׃

²⁹ יתן בעפר פיהו אולי יש תקוה׃

³⁰ יתן למכהו לחי ישבע בחרפה׃

³¹ כי לא יזנח לעולם אדני׃

³² כי אם הוגה ורחם כרב חסדו׃

³³ כי לא ענה מלבו ויגה בני איש׃

³⁴ לדכא תחת רגליו כל אסירי ארץ׃

³⁵ להטות משפט גבר נגד פני עליון׃

³⁶ לעות אדם בריבו אדני לא ראה׃

³⁷ מי זה אמר ותהי אדני לא צוה׃

³⁸ מפי עליון לא תצא הרעות והטוב׃

³⁹ מה יתאונן אדם חי גבר על חטאו׃

⁴⁰ נחפשה דרכינו ונחקרה ונשובה עד יהוה׃

⁴¹ נשא לבבנו אל כפים אל אל בשמים׃

⁴² נחנו פשענו ומרינו אתה לא סלחת׃

⁴³ סכתה באף ותרדפנו הרגת לא חמלת׃

⁴⁴ סכותה בענן לך מעבור תפלה׃

⁴⁵ סחי ומאוס תשימנו בקרב העמים׃

⁴⁶ פצו עלינו פיהם כל איבינו׃

⁴⁷ פחד ופחת היה לנו השאת והשבר׃

⁴⁸ פלגי מים תרד עיני על שבר בת עמי׃

⁴⁹ עיני נגרה ולא תדמה מאין הפגות׃

⁵⁰ עד ישקיף וירא יהוה משמים׃

⁵¹ עיני עוללה לנפשי מכל בנות עירי׃

⁵² צוד צדוני כצפור איבי חנם׃

⁵³ צמתו בבור חיי וידו אבן בי׃

⁵⁴ צפו מים על ראשי אמרתי נגזרתי׃

⁵⁵ קראתי שמך יהוה מבור תחתיות׃

⁵⁶ קולי שמעת אל תעלם אזנך לרוחתי לשועתי׃

⁵⁷ קרבת ביום אקראך אמרת אל תירא׃

⁵⁸ רבת אדני ריבי נפשי גאלת חיי׃

⁵⁹ ראיתה יהוה עותתי שפטה משפטי׃

⁶⁰ ראיתה כל נקמתם כל מחשבתם לי׃

⁶¹ שמעת חרפתם יהוה כל מחשבתם עלי׃

⁶² שפתי קמי והגיונם עלי כל היום׃

⁶³ שבתם וקימתם הביטה אני מנגינתם׃

⁶⁴ תשיב להם גמול יהוה כמעשה ידיהם׃

⁶⁵ תתן להם מגנת לב תאלתך להם׃

⁶⁶ תרדף באף ותשמידם מתחת שמי יהוה׃

¹ למנצח על שושנים לדוד הושיעני אלהים כי באו מים עד נפש׃

² טבעתי ביון מצולה ואין מעמד באתי במעמקי מים ושבלת שטפתני׃

³ יגעתי בקראי נחר גרוני כלו עיני מיחל לאלהי׃

⁴ רבו משערות ראשי שנאי חנם עצמו מצמיתי איבי שקר אשר לא גזלתי אז אשיב׃

⁵ אלהים אתה ידעת לאולתי ואשמותי ממך לא נכחדו׃

⁶ אל יבשו בי קויך אדני יהוה צבאות אל יכלמו בי מבקשיך אלהי ישראל׃

⁷ כי עליך נשאתי חרפה כסתה כלמה פני׃

⁸ מוזר הייתי לאחי ונכרי לבני אמי׃

⁹ כי קנאת ביתך אכלתני וחרפות חורפיך נפלו עלי׃

¹⁰ ואבכה בצום נפשי ותהי לחרפות לי׃

¹¹ ואתנה לבושי שק ואהי להם למשל׃

¹² ישיחו בי ישבי שער ונגינות שותי שכר׃

¹³ ואני תפלתי לך יהוה עת רצון אלהים ברב חסדך ענני באמת ישעך׃

¹⁴ הצילני מטיט ואל אטבעה אנצלה משנאי וממעמקי מים׃

¹⁵ אל תשטפני שבלת מים ואל תבלעני מצולה ואל תאטר עלי באר פיה׃

¹⁶ ענני יהוה כי טוב חסדך כרב רחמיך פנה אלי׃

¹⁷ ואל תסתר פניך מעבדך כי צר לי מהר ענני׃

¹⁸ קרבה אל נפשי גאלה למען איבי פדני׃

¹⁹ אתה ידעת חרפתי ובשתי וכלמתי נגדך כל צוררי׃

²⁰ חרפה שברה לבי ואנושה ואקוה לנוד ואין ולמנחמים ולא מצאתי׃

²¹ ויתנו בברותי ראש ולצמאי ישקוני חמץ׃

²² יהי שלחנם לפניהם לפח ולשלומים למוקש׃

²³ תחשכנה עיניהם מראות ומתניהם תמיד המעד׃

²⁴ שפך עליהם זעמך וחרון אפך ישיגם׃

²⁵ תהי טירתם נשמה באהליהם אל יהי ישב׃

²⁶ כי אתה אשר הכית רדפו ואל מכאוב חלליך יספרו׃

²⁷ תנה עון על עונם ואל יבאו בצדקתך׃

²⁸ ימחו מספר חיים ועם צדיקים אל יכתבו׃

²⁹ ואני עני וכואב ישועתך אלהים תשגבני׃

³⁰ אהללה שם אלהים בשיר ואגדלנו בתודה׃

³¹ ותיטב ליהוה משור פר מקרן מפריס׃

³² ראו ענוים ישמחו דרשי אלהים ויחי לבבכם׃

³³ כי שמע אל אביונים יהוה ואת אסיריו לא בזה׃

³⁴ יהללוהו שמים וארץ ימים וכל רמש בם׃

³⁵ כי אלהים יושיע ציון ויבנה ערי יהודה וישבו שם וירשוה׃

³⁶ וזרע עבדיו ינחלוה ואהבי שמו ישכנו בה׃