¹ כי יגנב איש שור או שה וטבחו או מכרו חמשה בקר ישלם תחת השור וארבע צאן תחת השה׃

² אם במחתרת ימצא הגנב והכה ומת אין לו דמים׃

³ אם זרחה השמש עליו דמים לו שלם ישלם אם אין לו ונמכר בגנבתו׃

⁴ אם המצא תמצא בידו הגנבה משור עד חמור עד שה חיים שנים ישלם׃

⁵ כי יבער איש שדה או כרם ושלח את בעירה ובער בשדה אחר מיטב שדהו ומיטב כרמו ישלם׃

⁶ כי תצא אש ומצאה קצים ונאכל גדיש או הקמה או השדה שלם ישלם המבער את הבערה׃

⁷ כי יתן איש אל רעהו כסף או כלים לשמר וגנב מבית האיש אם ימצא הגנב ישלם שנים׃

⁸ אם לא ימצא הגנב ונקרב בעל הבית אל האלהים אם לא שלח ידו במלאכת רעהו׃

⁹ על כל דבר פשע על שור על חמור על שה על שלמה על כל אבדה אשר יאמר כי הוא זה עד האלהים יבא דבר שניהם אשר ירשיען אלהים ישלם שנים לרעהו׃

¹⁰ כי יתן איש אל רעהו חמור או שור או שה וכל בהמה לשמר ומת או נשבר או נשבה אין ראה׃

¹¹ שבעת יהוה תהיה בין שניהם אם לא שלח ידו במלאכת רעהו ולקח בעליו ולא ישלם׃

¹² ואם גנב יגנב מעמו ישלם לבעליו׃

¹³ אם טרף יטרף יבאהו עד הטרפה לא ישלם׃

¹⁴ וכי ישאל איש מעם רעהו ונשבר או מת בעליו אין עמו שלם ישלם׃

¹⁵ אם בעליו עמו לא ישלם אם שכיר הוא בא בשכרו׃

¹⁶ וכי יפתה איש בתולה אשר לא ארשה ושכב עמה מהר ימהרנה לו לאשה׃

¹⁷ אם מאן ימאן אביה לתתה לו כסף ישקל כמהר הבתולת׃

¹⁸ מכשפה לא תחיה׃

¹⁹ כל שכב עם בהמה מות יומת׃

²⁰ זבח לאלהים יחרם בלתי ליהוה לבדו׃

²¹ וגר לא תונה ולא תלחצנו כי גרים הייתם בארץ מצרים׃

²² כל אלמנה ויתום לא תענון׃

²³ אם ענה תענה אתו כי אם צעק יצעק אלי שמע אשמע צעקתו׃

²⁴ וחרה אפי והרגתי אתכם בחרב והיו נשיכם אלמנות ובניכם יתמים׃

²⁵ אם כסף תלוה את עמי את העני עמך לא תהיה לו כנשה לא תשימון עליו נשך׃

²⁶ אם חבל תחבל שלמת רעך עד בא השמש תשיבנו לו׃

²⁷ כי הוא כסותה לבדה הוא שמלתו לערו במה ישכב והיה כי יצעק אלי ושמעתי כי חנון אני׃

²⁸ אלהים לא תקלל ונשיא בעמך לא תאר׃

²⁹ מלאתך ודמעך לא תאחר בכור בניך תתן לי׃

³⁰ כן תעשה לשרך לצאנך שבעת ימים יהיה עם אמו ביום השמיני תתנו לי׃

³¹ ואנשי קדש תהיון לי ובשר בשדה טרפה לא תאכלו לכלב תשלכון אתו׃

¹ וזאת תורת האשם קדש קדשים הוא׃

² במקום אשר ישחטו את העלה ישחטו את האשם ואת דמו יזרק על המזבח סביב׃

³ ואת כל חלבו יקריב ממנו את האליה ואת החלב המכסה את הקרב׃

⁴ ואת שתי הכלית ואת החלב אשר עליהן אשר על הכסלים ואת היתרת על הכבד על הכלית יסירנה׃

⁵ והקטיר אתם הכהן המזבחה אשה ליהוה אשם הוא׃

⁶ כל זכר בכהנים יאכלנו במקום קדוש יאכל קדש קדשים הוא׃

⁷ כחטאת כאשם תורה אחת להם הכהן אשר יכפר בו לו יהיה׃

⁸ והכהן המקריב את עלת איש עור העלה אשר הקריב לכהן לו יהיה׃

⁹ וכל מנחה אשר תאפה בתנור וכל נעשה במרחשת ועל מחבת לכהן המקריב אתה לו תהיה׃

¹⁰ וכל מנחה בלולה בשמן וחרבה לכל בני אהרן תהיה איש כאחיו׃

¹¹ וזאת תורת זבח השלמים אשר יקריב ליהוה׃

¹² אם על תודה יקריבנו והקריב על זבח התודה חלות מצות בלולת בשמן ורקיקי מצות משחים בשמן וסלת מרבכת חלת בלולת בשמן׃

¹³ על חלת לחם חמץ יקריב קרבנו על זבח תודת שלמיו׃

¹⁴ והקריב ממנו אחד מכל קרבן תרומה ליהוה לכהן הזרק את דם השלמים לו יהיה׃

¹⁵ ובשר זבח תודת שלמיו ביום קרבנו יאכל לא יניח ממנו עד בקר׃

¹⁶ ואם נדר או נדבה זבח קרבנו ביום הקריבו את זבחו יאכל וממחרת והנותר ממנו יאכל׃

¹⁷ והנותר מבשר הזבח ביום השלישי באש ישרף׃

¹⁸ ואם האכל יאכל מבשר זבח שלמיו ביום השלישי לא ירצה המקריב אתו לא יחשב לו פגול יהיה והנפש האכלת ממנו עונה תשא׃

¹⁹ והבשר אשר יגע בכל טמא לא יאכל באש ישרף והבשר כל טהור יאכל בשר׃

²⁰ והנפש אשר תאכל בשר מזבח השלמים אשר ליהוה וטמאתו עליו ונכרתה הנפש ההוא מעמיה׃

²¹ ונפש כי תגע בכל טמא בטמאת אדם או בבהמה טמאה או בכל שקץ טמא ואכל מבשר זבח השלמים אשר ליהוה ונכרתה הנפש ההוא מעמיה׃

²² וידבר יהוה אל משה לאמר׃

²³ דבר אל בני ישראל לאמר כל חלב שור וכשב ועז לא תאכלו׃

²⁴ וחלב נבלה וחלב טרפה יעשה לכל מלאכה ואכל לא תאכלהו׃

²⁵ כי כל אכל חלב מן הבהמה אשר יקריב ממנה אשה ליהוה ונכרתה הנפש האכלת מעמיה׃

²⁶ וכל דם לא תאכלו בכל מושבתיכם לעוף ולבהמה׃

²⁷ כל נפש אשר תאכל כל דם ונכרתה הנפש ההוא מעמיה׃

²⁸ וידבר יהוה אל משה לאמר׃

²⁹ דבר אל בני ישראל לאמר המקריב את זבח שלמיו ליהוה יביא את קרבנו ליהוה מזבח שלמיו׃

³⁰ ידיו תביאינה את אשי יהוה את החלב על החזה יביאנו את החזה להניף אתו תנופה לפני יהוה׃

³¹ והקטיר הכהן את החלב המזבחה והיה החזה לאהרן ולבניו׃

³² ואת שוק הימין תתנו תרומה לכהן מזבחי שלמיכם׃

³³ המקריב את דם השלמים ואת החלב מבני אהרן לו תהיה שוק הימין למנה׃

³⁴ כי את חזה התנופה ואת שוק התרומה לקחתי מאת בני ישראל מזבחי שלמיהם ואתן אתם לאהרן הכהן ולבניו לחק עולם מאת בני ישראל׃

³⁵ זאת משחת אהרן ומשחת בניו מאשי יהוה ביום הקריב אתם לכהן ליהוה׃

³⁶ אשר צוה יהוה לתת להם ביום משחו אתם מאת בני ישראל חקת עולם לדרתם׃

³⁷ זאת התורה לעלה למנחה ולחטאת ולאשם ולמלואים ולזבח השלמים׃

³⁸ אשר צוה יהוה את משה בהר סיני ביום צותו את בני ישראל להקריב את קרבניהם ליהוה במדבר סיני׃