Ryureihtuhpazy 21

¹ Izarel mozy chata Mizpah khih liata, ”Eima hry liatahpa ahyhmah ta eima sawchanô zy he Benzami mo lahpinô ta pahneisa kha ei suh u,” tahpa ta chhie sa ei ta.

² Zawpi sahlao cha Bethel lâta sie ei ta, Khazohpa hmiakô liata zâlâ taihta a tyu ei ta, ama aozy papuapa ta thata cha ei ta.

³ Âmo chata, “Hy ABEIPA Izarel Khazohpa, kheihta zie ta e, Izarel zy hry liata he hawhpa hmo he vaw y ta, atanoh he Izarel zy he pho kha ta a ki khao leipa ma a châ tly?” tah ei ta.

⁴ Chatawhcha a mylâ chata zawpi sahlao cha mydi ta thyu ei ta, cha liana chata maisâh tao ei ta, raopa hlâna zy nata adyhna hlâna zy hlâ ei ta.

⁵ Chatawhcha Izarel pathlazy chata, “Izarel pho zydua hry liata ABEIPA lâta pôhpakhypa sahlao hry liata a hlao hra leipa cha ahyma a châ tly?” tah ei ta. Mizpah khih liata ABEIPA lâta a sie hra leipa maih cha thie thlyu awpa a châ aw,” tahpa ta chhie liahsa sa haw tlôh ei ta.

⁶ Chatawhcha Izarel pathlazy cha, ama unawhpa Benzami sahlao kyh liana cha a ngiapachhi haw ei ta, “Atanoh he Izarel sahlao hry liata pho kha cha chhawh pathlapa châ haw tlôh ei ta.

⁷ A laibâhpa zy chata ama lahpinô châta kheihta e, eima tao aw tly? Eima sawchanô zy he lahpinô ta pahneisa chachei lei awpa ta, ABEIPA moh reipa ta chhie sa haw tlôh pi ta,” tah ei ta.

⁸ Chatawhcha âmo chata, “Izarel sahlao pho hry liatahpa, kheihawhpa pho he ma Mizpah khih liata ABEIPA hmiakô liata a luah leipa tly?” tah ei ta. Chatawhcha pôhpakhypa sahlao yna su liana chata Zabesakilia mozy cha pakha hmah sie hra leipa ei ta.

⁹ Zawpi sahlao ama reih nahta, Zebesakilia râh liata a ypa zy cha pakha hmah y leipa ei ta.

¹⁰ Chatawhcha apakhypa sahlao zy chata chyhsa riahphapa thy kha nata sâh no tuah ei ta, “Sie ula Zebesakilia râh liata a ypa zy cha chanô nata ama sawnawh chyhpa ta zy chhaota, zaozi ta chhawhsao khai teh u.

¹¹ Nama taona zie awpa cha he hawhta a châ; chapaw zydua nata chanô, chapaw a zialâh hawpa maih cha pahleipadia khai muh vy,” tahpa ta bie pie ei ta.

¹² Chatawhcha Zabesakilia râh liata a ypa zy hry liana chata laihsa za palih chapaw a pahno pathei beih leipa hmô ei ta, chatanachata ama yna Shilôh khih lâna chata a chhi ei ta, cha cha Kana râh a châ.

¹³ Chatawhcha apakhypa sahlao zydua chata chyhsa tuah ei ta, Rimô lôpanô liata a ypa Benzami sahlao bie kei chho ei ta, âmo lâta adyhna bie phuah ei ta.

¹⁴ Cha khai pata nahta Benzami sahlao cha kua haw ei ta; Zabesakilia râh liata chanô sahlao ama pahlôhpa zy cha pie ei ta; cha chôna chhaota a khi khao leipa ei ta.

¹⁵ Chatawhcha Izarel pho hry liata ABEIPA ta a pananona a vaw tao hawpa vâta zawpi sahlao cha Benzami sahlao kyh liana chata a ngiapachhi haw ei ta.

¹⁶ Chatanachata apakhypa sahlao machâ zy chata, “A hrohpa zy lahpinô awpa he, kheihta e eima tao aw, Benzami sahlao hry liata ama chanô zy cha pahleipadiapa châ haw tlôh ei ta?” tah ei ta.

¹⁷ Âmo chata, “Izarel pho he pamuapa ta a y lei nawpa ta Benzami sahlao laibâhpa zy he kheihta e pathla eima pahneisa aw tly?

¹⁸ Eima sawchanônô zy he lahpinô ta pahneisa thei tlôh lei khâh pi ta,” tah ei ta. Izarel pathlazy chata, “Ahyrai Benzami sahlao lahpinô ta a pahneisapa maih cha chhiesapa ta y mawh sy,” tahpa ta, chhie sa haw tlôh ei ta.

¹⁹ Chatawhcha âmo chata Bethel maw lâ, Bethel tawhta Sekhe siena lâlai nochhi lâchhâh ta; Lebanaw chho lâta a ypa Shilôh khih liata kô chareih ta ABEIPA châta kyhchhi a y tyhpa kha,” tah ei ta.

²⁰ Chatawhcha âmo chata, Benzami pathla sahlao hnohna chata, “Sie ula, kre thih liata a ru lata a byh teh u,

²¹ sai ula; chatanachata Shilôh khih liata laihsa sahlao lâna liata, la awpa ta ama vaw pua khiahtala kre thih tawhtapa cha vaw pua ula, Shilôh laihsa sahlao cha nama lahpinô châta patu chyu ula, Benzami sahlao râh lâta sie khei muh vy.

²² Chatawhcha ama pawzy tlyma, ama rilâhpa zy tlyma, reipasipasua awpa ta amâ vy nahta, ama hnohta, ‘Maniah ngiachhie teh u, adyuhna liana khata lahpinô châta patupa tlôh lei khâh pi ta, nâmo hra ta maniah vaw pie tlôh lei khâh eichi ta, maniah vaw piepa châ ula, thai lei châ tlôh eichi ta,’ tahpa ta bie pie ei ta.

²³ Chatawhcha Benzami pathlazy chata cha hawhna chata tao ei ta. A lâhpa sahlao hry liatahpa âmo hluh zie chyu lahpinô ta patu ei ta, siekhei syulyu haw ei ta; ama râh lâna chata a di ei ta, khihpi zy cha pangai heih ei ta, cha liana chata pahrâ haw ei ta.

²⁴ Chatawhcha Izarel pathlazy) cha âmo chi chyu nata âmo pho chyu ta a panano heih ei ta, cha tawhtapa cha âmo râh chyu lâta a di haw heih ei ta.

²⁵ Cha nona chata Izarel zy hry liata abei y leipa ei ta; chyhsa to ta, âmo a pha ama tahna zie hawhta ama tao.