Zeremiah 35

¹ Zudah beipa Zôsiah sawchapawpa Zehôiki a bei nota ABEIPA tawhta Zeremiah hnohta bie a vaw tlôpa chata;

² ‘Rekaba chhôhkhazy hnohta sie la, reih la, ABEIPA o liata chhôhpadâh miakha liata a chhi la, kresawti do awpa ta pie teh,” tah ta.

³ Chatawhcha Habazinia sawchapawpa Zeremiah sawchapawpa Zazaniah nata a unawhzy, a sawchapaw zydua zy, Rekaba chhôhkha zydua zy chhao a chhi na ta.

⁴ Khazohpa chysa Ikdaliah sawchapawpa Hana sawzy chhôhpadâhpa ABEIPA o liana chata a chhi na ta, cha chhôhpadâhpa cha abeisawzy chhôhpadâhpa kiapâh ta a vaihtuhpa Shaluma sawchapawpa Maasei chhôhpadâhpa chô liata a ypa a châ.

⁵ Chatawhcha Rekaba chhôhkhapa sawchapawpazy hmiakô liana chata biebuzy, nyuzy kresawti a biepa ta patyu na ta; âmo hnohta, “Kresawti he doh teh u,” tah na ta.

⁶ “Kresawti cha doh chachei aw ma pi, maniah pathlatuhpa Rekaba sawchapawpa Zônada chata, ‘Nâmo nata nama sawchapawpazy chhao chata chhâzaw ta kresawti nama doh awpa cha vei; ozy sapa ta, chi tupa ta, kresahdôzy taopa ta nama hnei awpa châ hra vei; nama hro chhôh nohzy liana chata nama hro pareih thei nawpa ta,’ tahpa ta bie maniah a pie.

⁸ Eima pathlazy Rekaba sawchapawpa Zônada bie maniah piepa zydua eima hro chhôhta, keimo nata eima lahpinôzy, eima sawchapawpa zy, nata eima sawchanôzy ta kresawti doh leipa zy,

⁹ eima pahrâ nawpa o sa lei awpa zy taihta a ao eimâ ngiah. Kresahdô tlyma, lyu tlyma, chi cheipa tlyma hnei leipa pi ta,’

¹⁰ poh-o zy liana chata tlao pahrâ pi ta, maniah pathlatuhpa Zônada biepiepa zydua cha zyhpa ta eimâ ngiah khai.

¹¹ Châhrasala Babylaw beipa Nebukaneza a râh a vaw dyuh nona khata keimo chata, ‘A vy teh u; Kaldia pheisaih sahlaozy nata Suria pheisaih sahlaozy chipa vâta Zerusale lâta sie suh u,’ tah pi ta. Chatanachata Zerusale liana heta eima pahrâ,” tah ei ta.

¹² Chatawhcha ABEIPA bie cha Zeremiah hnohta vaw tlô ta:

¹³ “Izarel Khazohpa Pheisaihzy ABEIPA chata he tana heta a tah: Sie la, Zudah râh liata chyhsazy nata Zerusale liata a pahrâpazy hnohta reih la, ei biezy nahthlie awpa ta ei pachuna cha uasa aw vei eichi ma? ABEIPA ta a tah.

¹⁴ Rekaba sawchapawpa Zônaba bie a sawchapawpazy hnohta a piepa kresawti do lei awpa kha a ngiah ei ta; atanoh taihta khâpa hmah ta doh veih ei, ama pathlatuhpazy biepiepa cha a ngiah tlôh ei ta. Kei deikua chata mydi ta thyupa ta nâmo hnohta bie rei na ta, nahthlie leipa eichi ta.

¹⁵ Na chakaotuhpa hrohsopa cha mydi ta thyupa ta nama hnohta tuah na ta, ‘Chyhsa to nama yzie moleina tawhta vaw kua khai ula, nama taopazy cha a phapa ta tao pathi ula, khazoh hropazy cha chakao awpa ta zi leipa ula, chatawhcha nâmo nata nama pathlazy hnohta râh ei cha piepa liana chata nama pahrâ aw,’ tahpa ta. Châhrasala nama nah pachôh leipa eichi ta, na nahthlie hra veih eichi.

¹⁶ Rekaba sawchapawpa Zônada pathlazy chata ama pathlatuhpa biepiepa a ngiah ei ta, he chyhsazy deikua heta na nahthlie veih ei.

¹⁷ Chavâta ABEIPA Izarel Khazohpa, Pheisaihzy Khazohpa chata he tana heta a tah: Pachâ teh, Zudah nata Zerusale liata a pahrâpa zydua chô liana chata hmopha leipa ama chô liata a vaw tlô awpa ei rei haw chiehpa zy kha ei vaw patlô aw; âmo hnohta bie reih na ta, nahthlie tlôh leipa ei ta, âmo aw na ta, nâ chhy hra veih ei,” tahpa ta.

¹⁸ Châhrasala Zeremiah chata Rekaba chhôhkhazy hnohta, “Pheisaihzy ABEIPA Izarel Khazohpa chata he tana heta a tah: Nama paw Zônada biepiepa zyh eichi ta, a bie zydua a ngiah eichi ta, a biepiepa zydua lymâ hawhta nama taopa vâta,

¹⁹ Rekaba sawchapawpa Zônada chata chhâzaw ta ei hmiakô liata chyhsa a duah awpa ta a phahla beih aw vei,” tahpa ta Pheisaihzy ABEIPA, Izarel Khazohpa chata a tah.