1
Rehôbaw cha Sekhe khih lâta vawh ta, Izarel sahlao zydua cha Sekhe lâna chata abeipa ta tao awpa ta sie haw tlôh ei ta.
2
Chatawhcha Neba sawchapawpa Zerôbaw ta cha kyh cha thei ta (Abei Sawlawmaw tawhta â râna Izi râh liata a ypa châ ta), chatanachata Zerôbaw cha Izi râh liata y tlôh ta.
3
Ano cha va pa-awsa ei ta; Zerôbaw nata Izarel ahmaohpakhypa zydua cha a vy ei ta, Rehôbaw hnohta,
4
“Na paw khata eima raopakypa pahri ngaita tyh ta. Chavâta na paw rie maniah patheipa nata a raopaky a hri ngaitapa eima chô liata a pahniehpa he maniah pahuapa la, chatanachata eima cha chakao aw na,” tahpa ta vaw reih ei ta.
5
Ano chata ama hnohta, “Noh thôh chhôh cha na siesai chy ula, chatawhcha kei lâta a vy heih teh u,” tah ta. Chatawhcha zawpi zy cha siesai haw ei ta.
6
Chatawhcha Abei Rehôbaw chata a paw Sawlawmaw a hro no ta, a kiapâh liata a y tyhpa machâ sahlao zy cha, “He zawpi sahlao zy he ei chhyna zie awpa a ryhpa khapa eina raokhei eichi?” tahpa ta a chhohia ta.
7
Âmo chata a hnohta, “Atahmâ he he sahlao chakaotuhpa ta y la, âmo cha chakao la âmo cha a chhypa ta, ama hnohta bie pha ngaitapa reih la, chatanachata chhâzaw ta na chakaotuhpa ta ama y aw.” tahpa ta reih ei ta.
8
Châhrasala machâ sahlao a ryraokheina cha a pyh leipa ta, ano rihchâhkha satlia sahlao a kiapâh liata a y tyhpa zy cha tlao a chhohia ta.
9
Ama hnohta, “He zawpi sahlao ei hnohta, ‘Na paw ta eima chô liata raopakypa a pahniehpa he maniah pahuapa teh,’ tahpa ta a reituhpa zy he, ei chhynazie awpa a ryhpa kheihta ei na raokhei eichi?” tah ta.
10
Chatawhcha a rihchâhkha satlia sahlao zy chata a hnohta, “He zawpi sahlao, ‘Na paw khata eima raopakypa pahri ngaita tyh ta, na chata maniah pahuapa teh,’ cha tahtuhpa zy hnohna chata he tana heta tah la, ama hnohta, ‘Ei pâ chai hlâta cha ei tieta he a lai via.
11
Ei pâ khata raopakypa a hri ngaitapa cha pakysa ei ta, kei ta cha nama raopakypa cha ei baichha aw mâ tâh. Ei pâ ta tuna ta cha chhei tyh ei ta, kei deikua cha byuthôh ta ei cha chhei aw ei,’ tahpa ta,” reih ei ta.
12
Chatanachata Zerôbaw nata zawpi sahlao zydua cha abeipa ta, “Noh thôh tawhta kei lâta a vy heih teh u,” tahpa ta a chhopa hawhta noh thôh noh ta Rehôbaw lâta vawh ei ta.
13
Chatawhcha abeipa chata zawpi zy cha a pachyu ngaitapa ta a vaw chhy ta, machâ sahlao a ryhraokheipa kha a pyh leipa ta,
14
satlia sahlao a ryraokheipa hawhna khata, “Ei pâ ta nama raopakypa pahri ta, kei chata nama raopakypa cha ei baichha aw mâ tâh, ei pa ta tu nahta cha chhei tyh ei ta, kei deikua chata byuthôh ta ei cha chhei aw ei,” tah ta.
15
Chatanachata abeipa chata zawpi zy bie reipa kha nahthlie leipa ta; cha cha ABEIPA vâta a châ, ABEIPA ta Silôni chyhsa Ahizah hmâpa ta Neba sawchapawpa Zerôbaw hnohta a bie a vaw reih hawpa kha a pa-i thei nawpa ta.
16
Chatawhcha Izarel sahlao zydua chata abeipa ta ama bie reipa a pyh vei tahpa ama pahno nahta, zawpi zy chata, “Davi liana heta tovyuh khâpa eima hnei tly? Zese sawchapawpa liana chata ryuto awpa hnei hra ma pi. Hy Izarelzy saih u, nama poh-o lâta a di teh u; Davi y, na chhôhkha tlâ pachâ teh, ”tahpa ta abeipa cha a chhy ei ta. Chatawhcha Izarel sahlao cha ama poh-o lâta a di haw ei ta.
17
Izarel pathla Zudah râh khih liata a ypa zy deikua cha ama chô liata Rehôbaw ta ryureih ta.
18
Chatawhcha Abei Rehôbaw ta rai pahriasapa zy hyutuhpa Adôra tuah ta, ano cha Izarel sahlao zydua chata alô ta vawh ei ta, thie haw ta. Chatawhcha Abei Rehôbaw cha Zerusale lâta a râ a chhuahpa ta talaili liata thlai kiah ta.
19
Chatanachata Izarel sahlao zy cha Davi chhôhkha zy chô liata amâ vaw ty haw, atanoh taihna heta.
20
Izarel sahlao zydua ta Zerôbaw cha a vaw kua haw heih tahpa ama thei nahta ahmaohpakhyna liata a vy awpa ta pa-awsa ei ta, Izarel sahlao zydua chô liata abei ta tao ei ta. Zudah pho dei leipa ta cha Davi chhôhkha zy a zipa ahyhmah y veih ei.
21
Rehôbaw chata Zerusale a kei tlô nahta, Izarel chhôhkha zy cha adyuhpa ta Sawlawmaw sawchapawpa Rehôbaw khihnarâh lâta palie awpa ta Zudah chhôhkha zydua nata Benzami pho chyhsa riahphapa a tlypa thy sykha nata thy charie tlai pakhy ta.
22
Châhrasala Khazohpa chyhsa Shemaiah hnohta Khazohpa bie vaw tlô ta;
23
“Zudah râh abei Sawlawmaw sawchapawpa Rehôbaw hnohta nata Zudah nata Benzami chhôhkha zydua hnohta nata zawpi hropa zy hnohna chata,
24
‘ABEIPA ta he tana heta a tah, khy khah u, Izarel pathla nama unawhpa zy cha adyuh hra khah u. Nama o lâta a di khai teh u. he he keima ta ei tahpa a châ na,” tahpa ta reih teh” tahpa ta. Chatanachata ABEIPA bie cha a ngiah ei ta, ABEIPA bie hawhna chata kua ei ta, a di khai haw ei ta.
25
Chatanachata Zerôbaw chata Ephrai tlâh râh liata Sekhe khih tao ta, cha liana chata pahrâ ta; cha tawhna chata pua ta, Penuel khih tao ta.
26
Zerôbaw chata a palôhrupa ta, “Khihnarâh he, Davi chhôhkha zy eih a châ thlâh ha heih ualua na;
27
he chyhsa zy he Zerusale liata ABEIPA o liata atheihna zy hlâ awpa ta amâ khy nahta, he chyhsa zy pathipalôh he ama beipa Rehôbaw Zudah râh beipa lâna heta a heih heih aw ei ta, chatanachata kei he na thie aw ei ta, Zudah râh abeipa Rehôbaw lâta amâ palie heih ualua na,” tah ta.
28
Chatanachata abeipa ta chyhsa a chhohia ta, ngôh viahchao taw nohthlahpa miano tao ta. Ama hnohta, “Nama châta Zerusale lâta khypa cha ru kaw ta, hy Izarel zy saih u, moh teh u, Izi râh tawhtapa cha chhihthatuhpa nama khazoh zy hih,” tah ta.
29
Chatawhcha miakha cha Bethel liata soh ta, miakha cha Dana liata soh ta.
30
Cha hmo cha moleipa a vaw châ haw, zawpi zy cha a miano ta a chhy awpa ta Dana taihta sie tlôh ei ta.
31
Ano ta su sâhpa o zy sa ta, Livai sawzy a châ leipa, vâtlâh hry liatahpa theihthaipa zy ta tao ta.
32
Zerôbaw chata Zudah râh liata kyhchhi ama hneipa hawh hra ta, thla chariena noh hrawhleipangawh noh cha kyhchhi noh ta rao hra ta, maisâh lâna chata vawh ta; Bethel liana chata viahchao taw nohthlahpa lâta atheihpa ta, cha hawhna hra chata a tao. Chatawhcha a taopa su sâhpa theihthaipa zy cha Bethel liata soh ta.
33
Ano ta a khohpa hawhta a raopa thla tlai, thla chariena, noh hrawhleipangawh liana chata Bethel liata a maisâh taopa lâta vawh ta; Izarel pathlazy chata kyhchhi rao ta, maisâh liata rohpahâhpa rao awpa ta vawh ta.
