5906. ‘Festinate et ascendite ad patrem meum’: quod significet ad bonum spirituale, constat ex repraesentatione ‘Israelis’ qui hic est ‘pater’, quod sit bonum spirituale e naturali, de qua n. 5801, 5803, 5806, 5812, 5817, 5819, 5826, 5833. Quod bonum spirituale ¹ sit ‘pater’ caelestis interni, cum tamen bonum spirituale est ² externum respective quia e naturali, est inde quoniam homo antequam internus homo existit, erit externus; progressio enim fit ordine ab exterioribus ad interiora, ut a scientificis ad intellectualia, exteriora enim dein inservient pro plano interioribus; ³ ex hac progressione, seu ex hac nativitate, est quod externum dicatur ‘pater’ interni, consequenter bonum spirituale e naturali quod ‘Israel’, pater caelestis interni quod ‘Joseph’.

脚注: