2836. ‘Vocavit Abraham nomen loci illius’: quod significet quale status illorum, nempe spiritualium, ex Divino Humano Domini, constat a significatione ‘vocare nomen’ quod sit nosse qualis est, seu quale, de qua n. 144, 145, 1754, 1896, 2009; ex significatione ‘loci’ ¹ quod sit status ² , de qua n. 1273-1277, 1376-1381, 2625; et a repraesentatione ‘Abrahami’ quod sit Dominus quoad Divinum Humanum, de qua n. 2833; inde patet quod ‘vocavit Abraham nomen loci illius’ significet quale status spiritualium ex Divino Humano Domini. Quod spirituales per Adventum Domini in mundum salventur, n. 2661, 2716 ostensum est; et quod illis illuminatio ex Divino Humano Domini, n. 2716; et quod provisum sit quod illi salventur qui in fide charitatis, hoc est, in charitate sunt, in hoc versu sequitur; hic status est qui per illa verba significatur.

脚注: