1223. Vers. 22. Filii Shemi, Elam et Asshur, et Arpachshad, et Lud, et Aram. Per ‘Shemum’ significatur, hic ut prius, Ecclesia interna: per ‘filios Shemi’ significantur illa, quae sunt sapientiae: ‘Elam, Asshur, Arpachshad, Lud et Aram’ fuerunt totidem gentes per quas significantur illa quae sunt sapientiae; per ‘Elam’ fides ex charitate; per ‘Asshur’ ratio inde; per ‘Arpachshad’ scientia inde; per ‘Lud’ cognitiones veri; per ‘Aram’ cognitiones boni.